ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး ၼႆႉသၢင်ႈမႃးတႃႇႁႂ်ႈတႆးၽွမ်ႉႁူမ်ႈၵၼ်လႄႈ ပေႃးသိုၵ်းတႆး ပႆႇၽွမ်ႉၵၼ် ၼႃႈၵၢၼ် CSSU ၵေႃႈတေဢမ်ႇပဵၼ်ၵၢၼ်ၼႆ လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ ၽူႈတူၵ်း ပုၼ်ႈၽွၼ်း ၽူႈၼင်ႈၸိုင်ႈ CSSU လၢတ်ႈ။
ဝၼ်းတီႈ 11/09/2018 လုင်းၸၢႆးဢၢႆႈပဝ်ႈ ၽူႈၼင်ႈၸိုင်ႈ CSSU ႁူဝ်ပဝ်ႈပႃႇတီႇသိူဝ်ၽိူၵ်ႇ တူၵ်ႇလၢတ်ႈ တီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး ဢၼ်ဝႃႈၼႆႉ မၼ်းပွင်ႇဝႃႈ တႃႇၽွမ်ႉႁူမ်ႈ ၵၼ်ႁဵတ်းသၢင်ႈၼႃႈၵၢၼ် ။ ၵူၺ်းၵႃႈၼႂ်း CSSU ၼႆႉ တပ်ႉသိုၵ်းႁဝ်းသွင်ၸုမ်း ပႆႇႁူမ်ႈၵၼ်သေ ဢမ်ႇၵႃးပၢႆမီးလွင်ႈပိုတ်းယိုဝ်းၵၼ်ထႅင်ႈၼႆႉ ၸႂ်ဢမ်ႇလီၸွမ်းတႄႉတႄႉယဝ်ႉ ” ဝႃႈၼႆ။
“ မိူဝ်ႈလဵဝ်ၼႆႉႁဝ်းၸႂ်ဢမ်ႇလီတႄႉတႄႉ – ဝႃႈပဵၼ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆးဝႃႇ တႆးႁဝ်းၼင်ႇၵၼ် ၵူၺ်း ဢမ်ႇပႆႇၽွမ်ႉၵၼ် ပႃႇတီႇၵၢၼ်မိူင်းပႆႇၽွမ်ႉၵၼ်ၼႆႉဢမ်ႇၵႃႈႁိုဝ် ဢၼ်တပ်ႉသိုၵ်း ဢမ်ႇၽွမ်ႉၵၼ် ၼႆႉ မၼ်းယၢပ်ႇၼႃႇ ဢမ်ႇၽွမ်ႉၵၼ်ၵူၺ်းဢမ်ႇၵႃး ပၢႆပိုတ်းယိုဝ်းၵၼ်ထႅင်ႈၼႆႉ မၼ်းဢမ်ႇလီပဵၼ် သေဢိတ်း မီးၵူၼ်းမၢတ်ႇၸဵပ်းလူႉသုမ်း ၵူၼ်းမိူင်းလႆႈပၢႆႈ ဢမ်ႇလႆႈႁဵတ်းၵၢၼ်လီလီ ပီၼႃႈမႃး ၶဝ်တေ ၵိၼ်သင်လႃႇ ” ဝႃႈၼႆ။
မိူဝ်ႈႁူဝ်လိူၼ်သႅပ်ႊထႅမ်ႊၿိူဝ်ႊ 2018 ၼႆႉ သိုၵ်းဢူၺ်းလီပွတ်းႁွင်ႇ ဢၼ်မီးသိုၵ်း SSPP တင်းTNLA ႁူမ်ႈၵၼ်သေ တင်း သိုၵ်း RCSSတိုၵ်းယိုဝ်းၵၼ်ႁၢဝ်ႈႁႅင်း ႁဵတ်းႁႂ်ႈၵူၼ်းဝၢၼ်ႈ ၼွင်ငိုၼ်း၊ ၼႃးႁူၵ်ႉ၊ ၼမ်ႉသီႇလိၼ်း၊ မၢၼ်ႈမႂ်ႇ၊ ၵွင်းႁုင်း၊ သၢမ်ၶႃ၊ ၼႃးပုင်ႇ၊ လူင်မိူတ်ႇ၊ ဝၢၼ်ႈပၢင် လူင် ၸိူဝ်းၼႆႉ ႁူဝ်ၵူၼ်း 2,000 ပၢႆ ၸိူဝ်းယူႇဝူင်ႈ ၵၢင်သီႇပေႃႉၼမ်ႉတူႈ လႆႈပၢႆႈယၢၼ်ႁိူၼ်းယေးတီႈယူႇ။
