ႁူဝ်လိူၼ်ၼူဝ်ႊဝႅမ်ႊၿိူဝ်ႊ တေမႃးၼႆႉ ၶွမ်ႊမသျိၼ်ႊပၢင်လိူၵ်ႈတင်ႈ တေၸတ်းပၢင်လိူၵ်ႈတင်ႈသွမ်ႈ တႃႇတီႈယူႇ ၽူႈ တႅၼ်းသၽႃး ၵူၼ်းမိူင်းလၢႆးၶႃႈၼၼ်ႉ ၵူၼ်းမိူင်းပႆႇသူၼ်ၸႂ်ၵႂႃႇတူၺ်းၸိုဝ်ႈၸဝ်ႈၵဝ်ႇ။
ယူႇတီႈၶွမ်ႊမသျိၼ်ႊပၢင်လိူၵ်ႈတင်ႈမိူင်းႁူမ်ႈတုမ် ပိုၼ်ၽၢဝ်ႇသဵၼ်ႈၸိုဝ်ႈ ၽူႈမီးသုၼ်ႇတွတ်ႈၶႅပ်းၵၢင်ၸႂ် တႃႇပၢင် လိူၵ်ႈတင်ႈသွမ်ႈ ဢၼ်တေႁဵတ်းဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊ တေထိုင်မႃး။ ၵူၼ်းမိူင်းလၢႆးၶႃႈ ႁူဝ်ၵူၼ်း ႁိမ်း 5 မိုၼ်ႇပၢႆ ၸိူဝ်းၵႂႃႇတူၺ်းလၢႆးၸိုဝ်ႈ တိုၵ်ႉမီးဢေႇယူႇ ဝႃႈၼႆ။
ၸၢႆးၵျေႃႇၸေႇယ ၽူႈတႅၼ်းသၽႃးၸႄႈမိူင်း ၶဵတ်ႇလိူၵ်ႈတင်ႈ မၢႆ 1 ၸႄႈဝဵင်းလၢႆးၶႃႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဝၢၼ်ႈၼွၵ်ႈၼႃးပၢင်ႇႁဝ်းၵမ်ႈပႃႈၼမ်ၼႆႉ ဢမ်ႇပေႃးမေႃလိၵ်ႈမၢၼ်ႈ၊ ဢၼ်ၵႂႃႇတူၺ်း ၸိုဝ်ႈၸဝ်ႈၵဝ်ႇ လွင်ႈဝႃႈ ပႃးၸိုဝ်ႈၸဝ်ႈၵဝ်ႇ ဢမ်ႇပႃးၸိုဝ်ႈၸဝ်ႈၵဝ်ႇ ၼႆႉပဵၼ်ႁႅင်းဢေႇတႄႉတႄႉ” ဝႃႈၼႆ။
ၼႂ်းတူဝ်ဝဵင်းလၢႆးၶႃႈ မီး 4 ပွၵ်ႉ။ ဢိူင်ႇသမ်ႉ မီး 19 ဢိူင်ႇ မူႇဝၢၼ်ႈ မီး 217 ဝၢၼ်ႈ။ ၵူၼ်းမီးသုၼ်ႇတွတ်ႈၶႅပ်းၵၢင်ၸႂ်မီး 5 မိုၼ်ႇပၢႆ ဝႃႈၼႆ။
ၸၢႆးၵျေႃႇၸေႇယ လၢတ်ႈဝႃႈ “ ယူႇတီႈႁဝ်းၶႃႈတႄႉ ၶႂ်ႈတိုၵ်းသူၼ်းထိုင် ၵူၼ်းမိူင်းလၢႆးၶႃႈႁဝ်း ႁႂ်ႈဢွၼ်ၵၼ်ၵႂႃႇတူၺ်း လၢႆးၸိုဝ်ႈၵၼ်။ တေႃႈလဵဝ် မၼ်းပဵၼ်သဵၼ်ႈတၢင်း ဢၼ်ယၢင်ႈၼိူဝ်ၻီႊမူဝ်ႊၶရေႊသီႊဝႆႉလႄႈ ၵၢၼ်တွတ်ႈၶႅပ်းၵၢင် ၸ်ႂ်ၼႆႉၵေႃႈ မၼ်းပဵၼ်ပုၼ်ႈၽွၼ်းၵူၼ်းမိူင်းဝႆႉ။ ယဝ်ႉၵေႃႈ ၵူၼ်းမိူင်းႁဝ်းလီလႆႈဝႆႉ လွင်ႈယႂ်ႇသေ ႁႂ်ႈဢွၼ်ၵၼ်ၵႂႃႇ တူၺ်းၸိုဝ်ႈသဵင်ၸဝ်ႈၵဝ်ႇ။ ၵွပ်ႈပိူဝ်ႈဝႃႈ ဢၼ်တေၵႂႃႇၼႆႉ ၵူၼ်းၵူႈၵေႃႉမီးသုၼ်ႇတွတ်ႈၶႅပ်းၵၢင်ၸႂ်လႄႈ ၵူၼ်းမိူင်း ႁဝ်းၼႆႉ ႁဵတ်းႁိုဝ်ၵေႃႈ တိုၼ်းတေလႆႈ ၶဝ်ႈၸႂ်ၵၢၼ်ဢၼ်ၼႆႉ” ဝႃႈၼႆ။
ၵဵဝ်ႇၵပ်းလွင်ႈ ပိုၼ်ၽၢဝ်ႇသဵၼ်ႈၸိုဝ်ႈၽူႈမီးသုၼ်ႇတွတ်ႈၶႅပ်းၵၢင်ၸႂ် တႃႇပၢင်လိူၵ်ႈတင်ႈသွမ်ႈၼႆႉ ပေႃးထိုင်မႃး ၼႂ်း လိူၼ်ဢွၵ်ႊထူဝ်ႊၿိူဝ်ႊၸိုင် တေပိုၼ်ၽၢဝ်ႇသဵၼ်ႈၸိုဝ်ႈၽူႈမီးသုၼ်ႇတွတ်ႈၶႅပ်းၵၢင်ၸႂ်ထႅင်ႈၵမ်းၼိုင်ႈ တႃႇၶၢဝ်း တၢင်း 14 ဝၼ်း ဝႃႈၼႆ။
ၼေႃႇၽူႈတႅၼ်းဢၼ်တေၶဝ်ႈၶႅင်ႇသမ်ႉ ပႃႇတီႇႁူဝ်သိူဝ် ၸၢႆးဢူၵ်ႉၵႃႇ၊ ပႃႇတီႇသိူဝ်ၽိူၵ်ႇ ၸၢႆးသူၺ်ႇသႅင်းလႄႈ ပႃႇတီႇ ၼူၵ်ႉယုင်း ၸၢႆးဢွင်ႇထုၼ်းလေး ၸိူဝ်းၼႆႉ ဝႃႈၼႆ။
