ပၢင်ၶေႉၶဵင်ႇၶူဝ်းၼုင်ႈတၢင်းဝႆ ၾိင်ႈထုင်းၸဝ်ႈၵဝ်ႇ Natoinal Costume ၼၢင်းငၢမ်း Miss Grand Myanmar 2026 ၸတ်းႁဵတ်းၵႂႃႇတီႈႁူင်းႁႅမ်း Eravati Hotel ဝဵင်းလူင်တႃႈၵုင်ႈၼၼ်ႉ ၸုမ်းၸတ်းပၢင်ပွႆး Miss Grand Myanmar 2026 ပိုၼ်ၽၢဝ်ႇပူတ်းပႅတ်ႈၼၢင်းငၢမ်း ဢၼ်တၢင်တူဝ်ဝဵင်းတႃႈၶီႈလဵၵ်းသေၶဝ်ႈၶႅင်ႇ ၼၼ်ႉၵမ်းလဵဝ်။
ပၢင်ၶေႉၶဵင်ႇၶူဝ်းၼုင်ႈတၢင်းဝႆၾိင်ႈထုင်းၼႆႉၸတ်းႁဵတ်းၼႂ်းဝၼ်းတီႈ 5/5/2026 ။ မီးၼၢင်းငၢမ်း ၶဝ်ႈၶေႉၶဵင်ႇၵၼ် 27 ၵေႃႉ။ ၼႂ်းၼၼ်ႉ ဢၼ်လုၵ်ႉမိူင်းတႆးၵႂႃႇမီး 5 ၵေႃႉ။ မီးၼၢင်းငၢမ်း မူႇၸေႊ၊ၼမ်ႉၶမ်း၊ ၵဵင်းတုင်၊တူၼ်ႈတီး လႄႈ တႃႈၶီႈလဵၵ်း။
ဢၼ်လႆႈသူးၶူဝ်းၼုင်ႈတၢင်းဝႆၾိင်ႈထုင်းၵႂႃႇမိူဝ်ႈဝႃးၼႆႉပဵၼ် ထွႆႇၼုပၢၼ်ႇ ၼၢင်းငၢမ်း ဢၼ်လုၵ်ႉဝဵင်းၸေႈၼႃး (မျိတ်ႉၵျီးၼႃး) မႃးၶေႉၶဵင်ႇ။ မၼ်းၼၢင်းၼုင်ႈၶူဝ်းၸၢဝ်းၶၢင်သေၶေႉၶဵင်ႇၵႂႃႇ။ ၼၢင်းငၢမ်း မူႇၸေႊ ၵေႃႈလႆႈၶဝ်ႈပႃးၼႂ်း ၶူဝ်းၼုင်ႈတၢင်းဝႆဢၼ်ၶႅမ်ႉလႅပ်ႈႁၢင်ႈလီ 5 ၵေႃႉၼႂ်း 27 ၵေႃႉ။
ၵူၺ်းၵႃႈ ဢိမုၼ်ႇလုၼ်ႇ ၼၢင်းငၢမ်းဢၼ်တၢင်တူဝ်ဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇသေ ၶဝ်ႈၶေႉၶဵင်ႇၼၼ်ႉ ၼုင်ႈၶူဝ်းၼၢႆးၶၢဝ်သေ ၼႄတၢင်းႁၢင်ႈလီ။ မၼ်းၼၢင်း ၼုင်ႈပႃးသိူဝ်ႈၶူဝ်းၾိင်ႈပွႆးၸီးႁူမၢၼ်ႈ သေၶဝ်ႈၶေႉၶဵင်ႇ ။
ၸုမ်းၸတ်းပၢင်ပွႆး Miss Grand Myanmar 2026 ဝႃႈ ဢၼ်မၼ်းၼၢင်းၼုင်ႈၶူဝ်းၼၢႆးၶၢဝ်သေၶေႉၶဵင်ႇၼၼ်ႉ ပဵၼ်ဢၼ်ယႃႉသလေႇၼႃႈတႃ သႃႇသၼႃႇ ၼႆသေ ဢွၵ်ႇလိၵ်ႈပိုၼ်ၽၢဝ်ႇပူတ်းပႅတ်ႈမၼ်းၼၢင်း။ ၼႂ်းလိၵ်ႈပိုၼ်ၽၢဝ်ႇမီး 5 ၶေႃႈ။ ၼႂ်းၼၼ်ႉပႃးဝႆႉဝႃႈ – ယူႇတီႈၸုမ်းၸတ်းပၢင်ၶေႉၶဵင်ႇၼၢင်းငၢမ်းသေ ဝႆႉၼၵ်းလွင်ႈၵိူဝ်းလီၵူႈၽႃႇသႃႇ သႃႇသၼႃႇ။ ယူႇတီႈၸုမ်းၸတ်းၵၢၼ်သေ ၵႆႉလႆႈလၢတ်ႈယူႇတႃႇသေႇ လွင်ႈဝႃႈၵၢၼ်ၼႄတၢင်းႁၢင်ႈလီၼႆႉယႃႇႁႂ်ႈတုမ်ႉတိူဝ်ႉၼႂ်းၽႃႇသႃႇ သႃႇသၼႃႇတီႈၵိူဝ်းယမ် ၵူႈဢၼ်။ ၵွၼ်ႇတေၸတ်းပၢင်ၼႄၶူဝ်းၼုင်ႈတၢင်းဝႆ ၾိင်ႈငႄႈၾိင်ႈထုင်းၼႆႉၵေႃႈ လႆႈၸတ်းပၢင်ၾိုၵ်းသွမ်ႉယူႇ 2-3 ၵမ်း။ ၽွင်းၼၼ်ႉ လွင်ႈဢၼ်ၼုင်ႈၶူဝ်းၼၢႆးၶၢဝ်သေ ၶဝ်ႈၶေႉၶဵင်ႇၼၼ်ႉ ဢမ်ႇမီးပႃးၼႂ်းၶပ်းမၢႆ။ ဢမ်ႇလႆႈႁၼ်ၼုင်ႈမႃးၼႄပႃး။ လွင်ႈဝႃႈတေၼုင်ႈသိူဝ်ႈၽႃႈၼၢႆးၶၢဝ်(သီၶွင်ႇ) ၼၼ်ႉသေမႃးၼႄၼႆၵေႃႈ ယူႇတီႈၼၢင်းငၢမ်း ဢိၵ်ႇပႃးတင်းၽူႈၸတ်းၵၢၼ်သုၼ်ႇတူဝ် ဢမ်ႇလၢတ်ႈဢွၵ်ႇၼႄၽႂ်သေၵေႃႉ။ ၵွပ်ႈၼႆ – ယူႇတီႈမူႇၸုမ်းမၢႆဝႃႈ – ၼၢင်းငၢမ်းတႃႈၶီႈလဵၵ်း ပူၼ်ႉပႅၼ်ပၵ်းပိူင်မၢႆမီႈ ၵၢၼ်ၶေႉၶဵင်ႇၼၢင်းငၢမ်း၊ ယႃႉသလေႇၼႃႈတႃ သႃႇသၼႃႇ ၼႆသေ ဢွၵ်ႇလိၵ်ႈသင်ႇပူတ်းထွၼ်ပႅတ်ႈၼၢင်းငၢမ်းတႃႈၶီႈလဵၵ်း ဢွၵ်ႇၵၢၼ်ၶေႉၶဵင်ႇတင်းမူတ်း- ဝႃႈၼႆ။
ၵၢၼ်ၶေႉၶဵင်ႇ Preliminary Competition (ၵွၼ်ႇၼႃႈႁွပ်ႈလိုၼ်းသုတ်း) ပဵၼ်ဝၼ်းတီႈ 7/5/202 – ၵၢၼ်ၶေႉၶဵင်ႇ ဝၼ်းလိုၼ်းသုတ်း တေပဵၼ် ဝၼ်းတီႈ 9/5/2026 ။ ၸၢင်ႈပၼ်ႁႅင်းလႆႈတီႈ ဢႅပ်ႊပလီႊၵေႊသျိၼ်ႊ သၵၢႆးၼႅတ်ႉ။ ဢမ်ႇၼၼ်ၶဝ်ႈပၼ်ႁႅင်း ပၼ်သဵင်လႆႈတီႈ Page – Miss Grand Myanmar လႆႈၵမ်းသိုဝ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ