ၸၢႆးဝႃႇလိင်ႇ ၵေႃႉပဵၼ်လုၵ်ႈၶူၺ် တင်း ပေႃႈၸဝ်ႈ ၽိတ်းမေႃးၵၼ် ၵေႃႉပဵၼ်ပေႃႈၵႂႃႇႁွင်ႉ ၵူၼ်းမႃးၸွႆႈတွပ်ႇထဵင် ပေႃႉထုပ်ႉၵၼ်လႄႈ ထိုင်တီႈလႆႈလူႉတၢႆ ဝႃႈၼႆ။
ဝၼ်းတီႈ 08/09/2018 ယၢမ်းၵၢင်ဝၼ်း မွၵ်ႈ 12:30 မူင်းၼၼ်ႉ ၸၢႆးဝႃႇလိင်ႇ တင်း ပေႃႈၸဝ်ႈ လုင်းၸၢႆးၵျေႃႇ ၽိတ်းထဵင်မေႃးၵၼ်ႁၢဝ်ႈႁႅင်း တီႈႁိူၼ်း ဝၢၼ်ႈၼႃးႁူၺ်ႈ ဢိူင်ႇၶုမ်ႇပၢင် ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈ တႆးပွတ်းၸၢၼ်း။ ၵေႃႉပဵၼ်ပေႃႈၸဝ်ႈ လုင်းၸၢႆးၵျေႃႇ ၵႂႃႇႁွင်ႉၵူၼ်းၼႂ်းပိုၼ်ႉတီႈၸွႆႈ ပေႃႉထုပ်ႉၵၼ်လႄႈ ႁဵတ်းႁႂ်ႈ ၸၢႆးဝႃႇလိင်ႇလူႉတၢႆၵႂႃႇထင်တီႈ။
ၸဝ်ႈၸၢင်း သုၸႃႇတ ၵေႃႉပဵၼ်ၼွင်ႉၸၢႆး ၸၢႆးဝႃႇလိင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ၶဝ်ဝႃႈ မၼ်းယွင်ႇမႃႈၼႆဝႃႇ မိူဝ်ႈၸဝ်ႉတႄႉၵေႃႈ ၵူၼ်းဝၢၼ်ႈၶဝ်ၵေႃႈႁၼ်ယူႇ မၼ်းဢမ်ႇလႆႈယွင်ႇမႃႈသင်။ ၽိူဝ်ႇဝႃႈၵၢင်ဝၼ်းမႃး ၶဝ် သမ်ႉဝႃႈ မၼ်းၵိၼ်လဝ်ႈသေ ဝႃႈမၼ်းၵဝ်းၼႂ်းႁိူၼ်း။ ၵမ်းၼႆႉ ၶဝ်သမ်ႉၵႂႃႇႁွင်ႉသိုၵ်း မႃး 4 ၵေႃႉ ႁႂ်ႈမႃးတီႉၺွပ်း ပၼ်။ မိူဝ်ႈၵႂႃႇႁွင်ႉသိုၵ်းၼၼ်ႉ ၵေႃႉပဵၼ်ပေႃႈမေးၵႂႃႇလၢတ်ႈသင်တႄႉၵေႃႈ ႁဝ်းၸဝ်ႈဢမ်ႇလႆႈႁူႉၸွမ်း။ ၵမ်းၼႆႉ မိူဝ်ႈသိုၵ်းမႃးၺွပ်းၼၼ်ႉ ၵေႃႉပဵၼ်ပေႃႈမေးဢမ်ႇမႃးၸွမ်းၵမ်းလဵဝ်။ ပွႆႇႁႂ်ႈၵူၼ်းသိုၵ်းၶိုၼ်ႈမိူဝ်းႁဵတ်းၼၼ်” ဝႃႈၼႆ။
ပူၼ်ႉမႃး ဝၼ်းတီႈ 11 ၼၼ်ႉ ၵဵဝ်ႇၵပ်းလူၺ်ႈ လိူင်ႈၵၢၼ်တၢႆ ၸၢႆးဝႃႇလိင်ႇၼႆႉသေ လႆႈဢုပ်ႇဢူဝ်းၵၼ် ၼႂ်းဢိူင်ႇၶုမ်ႇ ပၢင်။ ဢုပ်ႇၵၼ်တႅပ်းတတ်း ဢမ်ႇလႆႈလႄႈ ၸင်ႇလႆႈ ဢဝ်တၢင်ႇထိုင် တီႈၸႄႈဝဵင်းမၢႆ 4 ၼႃႈလိၼ်ၽွင်းငမ်း SSPP ဝႆႉ။ ၾၢႆႇSSPP/SSA ၵေႃႈလၢတ်ႈဝႃႈတေလူင်းထတ်းႁႂ်ႈပေႃးထုၵ်ႇမႅၼ်ႈပဵၼ်ထမ်းၵႂႃႇ ဝႃႈၼႆ။
ၸဝ်ႈၸၢင်း သုၸႃႇတ လၢတ်ႈဝႃႈ ပဵၼ်ႁိုဝ်ၵေႃႈယဝ်ႉ ႁဝ်းၶႃႈတႄႉ ၶႂ်ႈႁႂ်ႈမၼ်းပဵၼ်လွင်ႈထုၵ်ႇမႅၼ်ႈ ပဵၼ်ၸွမ်းထမ်း ၵူၺ်းၶႃႈ။ ၵေႃႉဢၼ်တၢႆၵႂႃႇၵေႃႈ ဢမ်ႇၶႂ်ႈႁႂ်ႈတၢႆၵႂႃႇလၢႆလၢႆ မၼ်းၽိတ်းသင် မၼ်းထုၵ်ႇမႅၼ်ႈသင် ႁႂ်ႈပဵၼ်ၵႂႃႇၸွမ်း ထမ်း ႁႂ်ႈမီးလွင်ႈၽဵင်ႇပဵင်းပဵၼ်ထမ်းၵႂႃႇၵူၺ်းၶႃႈ” ဝႃႈၼႆ။
ၸၢႆးဝႃႇလိင်ႇ(ႁွင်ႉ) ၸၢႆးလႅင်ၼႆႉ ပဵၼ်လုၵ်ႈၸၢႆး လုင်းၸၢႆးသႃႇ လႄႈ ပႃႈပႂ်း မီးပီႈၼွင်ႉႁူမ်ႈၵၼ် 5 ၵေႃႉ ပဵၼ်ၵူၼ်း ဝၢၼ်ႈဝဵင်းၵွပ်ႈ ဢိူင်ႇၶုမ်ႇပၢင်။ ၵႂႃႇၶိုၼ်ႈၶူၺ် လုင်းၸၢႆးၵျေႃႇ ပႃႈၼၢင်းၵဵင် တီႈဝၢၼ်ႈၼႃးႁူၺ်ႈ ဢိူင်ႇၶုမ်ႇပၢင် ၵေႃႉ ပဵၼ်မေးၼၢင်းသမ်ႉ ၸိုဝ်ႈႁွင်ႉ ၼၢင်းၶမ်းဢိင်ႇ မီးလုၵ်ႈႁူမ်ႈၵၼ်ၵေႃႉၼိုင်ႈ ၸိုဝ်ႈႁွင်ႉ ၼၢင်းဢွၼ်ႇသႅင် ဢႃယု 7 ပီပၢႆပၢႆဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ