ႁွင်ႈၵၢၼ်ၽွင်းလူင်ၾၢႆႇႁႅင်းၵၢၼ်မိူင်းမၢၼ်ႈပိုၼ်ၽၢဝ်ႇဝႃႈ – ၵူၼ်းၸိူဝ်းႁၢပ်ႇၵၢၼ်သိုၵ်းယဝ်ႉၼၼ်ႉ သင်ဝႃႈၶႂ်ႈ ၵႂႃႇႁဵတ်းၵၢၼ်ၼွၵ်ႈမိူင်း တေႁႃၵၢၼ်ပၼ် –  ဝႃႈၼႆသေတႃႉ  ယူႇတီႈၸုမ်းၸွႆႈႁႃၵၢၼ်ၼွၵ်ႈမိူင်း လၢတ်ႈဝႃႈ တေမီးၽွၼ်းယွၼ်ႈၸွမ်းတၢင်းလင်ထႅင်ႈလႄႈဢမ်ႇၶႂ်ႈယုင်ႈၵဵဝ်ႇၸွမ်း ဝႃႈၼႆ။

ဢေႊၵျႅၼ်ႊသီႊ တႂ်ႈၸုမ်းႁႃၵၢၼ်ၼွၵ်ႈမိူင်း MOEAA ၸုမ်းၼိုင်ႈလၢတ်ႈဝႃႈ   – မိူဝ်ႈၵွၼ်ႇ သိုၵ်းမၢၼ်ႈ သင်ႇပိၵ်ႉ ၵူၼ်းဢွၵ်ႇၼွၵ်ႈမိူင်း ယွၼ်ႉဝႃႈ ၵူဝ်ၵူၼ်းပၢႆႈၵၢၼ်ၵဵပ်းသိုၵ်း။  တလဵဝ် ၶဝ်ၶႂ်ႈႁဵတ်းၼေဝႃႈ ဢၼ်ၵႂႃႇႁၢပ်ႇၵၢၼ်သိုၵ်းသေပွၵ်ႈမႃးၶိုၼ်းၸိူဝ်းၼၼ်ႉ မီးသုၼ်ႇလႆႈၵႂႃႇႁဵတ်းၵၢၼ်ၼွၵ်ႈမိူင်း၊ ၶဝ်ၸွႆႈထႅမ်ပၼ် – ၼႆသေ  ၶဝ်ၶႂ်ႈႁူၺ်းၵူၼ်းၵႂႃႇႁၢပ်ႇၵၢၼ်သိုၵ်းထႅင်ႈၵူၺ်း။  ယူႇတီႈၸုမ်းၸွႆႈႁႃၵၢၼ်ၼွၵ်ႈမိူင်းပၼ်သေ သင်ဝႃႈႁႃၵၢၼ်ပၼ်ၵူၼ်းၸိူဝ်းႁၢပ်ႇၵၢၼ်သိုၵ်းယဝ်ႉၸိူဝ်းၼၼ်ႉၸိုင် ၵူဝ်ၸိုဝ်ႈၼဝ်ႈၸွမ်း- ဝႃႈၼႆ။

ၵူၺ်းၵႃႈၸုမ်းဢေႊၵျႅၼ်ႉ ႁႃၵၢၼ်ၼွၵ်ႈမိူင်း တႂ်ႈ MOEAA ၼႆႉ ယၢမ်းလဵဝ် ၵမ်ႈၼမ်ပဵၼ်ၵူၼ်းၼႂ်းသိုၵ်းမၢၼ်ႈ မႃးႁဵတ်းၵၢၼ်ဝႆႉလႄႈ ပေႃးၶဝ်ၼင်ႇၵၼ်သင်ႇၵၼ်ၸိုင်ႈ ၸၢင်ႈတေမီးၸုမ်းႁဵတ်းၵၢၼ်ပၼ်ယူႇဝႃႈၼႆ။

ၵူၺ်းၵႃႈ သိုၵ်းမၢၼ်ႈၵူဝ်ၵူၼ်းၼုမ်ႇပၢႆႈလွင်ႈႁၢပ်ႇၵၢၼ်သိုၵ်းသေ ႁၢမ်ႈဝႆႉၼၼ်ႉဝႃႈ – ၵူဝ်ဢဵၼ်ႁႅင်းႁႅင်းၵၢၼ်ၼႂ်းမိူင်းယွမ်းလူင်းလႄႈ  ၵူၼ်းၼုမ်ႇၸိူဝ်းဢႃယု 18 ထိုင် 36 ပီ တေဢမ်ႇလႆႈဢွၵ်ႇၼွၵ်ႈမိူင်း – ၼႆဝႆႉလႄႈ ယၢမ်းလဵဝ် တႃႇၶိုၼ်းၸွႆႈႁႃၵၢၼ်ပၼ်ၵူၼ်းသႅၼ်းၼႆႉတႄႉ တေယၢပ်ႇယူႇ – ၵူၼ်းၸွႆႈႁႃၵၢၼ်ပၼ် ၶဝ်လၢတ်ႈၼင်ႇၼႆ။

သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းဝႆႉၼႆႉ ပိုၼ်ၽၢဝ်ႇပၵ်းပိူင်ၵူၼ်းမိူင်းတေလႆႈၸွႆႈၵၢၼ်သိုၵ်း ၼႆသေ တႄႇၸႂ်ႉမႃးပဵၼ်တၢင်းၵၢၼ်မိူဝ်ႈလိူၼ် ၾႅပ်ႉပိဝ်ႊရီႊ ပီ 2024 ။  ယၢမ်းလဵဝ်ပဵၼ်မႃးၸုပ်ႈတီႈ 20 ယဝ်ႉ။ ၵူၼ်းၸိူဝ်းၵႂႃႇၸုပ်ႈႁႅၵ်ႈ ၸုပ်ႈဢွၼ်တၢင်းသုတ်းၸိူဝ်းၼၼ်ႉ ၸင်ႇႁႃလႆႈၶႂၢင်ႉပွၵ်ႈႁိူၼ်းၶိုၼ်း။ တႃႇႁႂ်ႈၵူၼ်းၸိူဝ်းၾိုၵ်းၵၢၼ်သိုၵ်းယဝ်ႉသေ ဢမ်ႇၵႂႃႇတၢႆၼႃႈသိုၵ်းၼၼ်ႉ တေၶႂ်ႈသိုပ်ႇႁၢပ်ႇၵၢၼ်ၼႂ်းသိုၵ်းထႅင်ႈၼၼ်ႉၵေႃႈ – ၸိူဝ်းတၢၼ်ႇၶိုၼ်ႈပၼ်တႃၶုၼ်ၵေႃႈပၼ်ၶိုၼ်ႈသေ ပၼ်ၸႂ်ႉဢႃႇၼႃႇ ပဵၼ်တီႈပဵၼ်တၢင်း၊ မၢင်ၸိူဝ်း ၸိူဝ်းၶႂ်ႈပွၵ်ႈႁိူၼ်းၶိုၼ်းၵေႃႈ ပွႆႇပွၵ်ႈမိူဝ်း။ ၵူၺ်းၵႃႈ ၵူၼ်းၸိူဝ်းၵႂႃႇႁၢပ်ႇၵၢၼ်သိုၵ်းသေ ပွၵ်ႈၶိုၼ်းၼၼ်ႉဢွၼ်ၵၼ်မႃးလၢတ်ႈဝႃႈ – ၵူၼ်းၵႂႃႇႁၢပ်ႇၵၢၼ်သိုၵ်းၸုပ်ႈတီႈၼိုင်ႈ 1000 ၵေႃႉၼႆႉ ဢၼ်ဢမ်ႇတၢႆသေၸၢင်ႈပွၵ်ႈႁိူၼ်းၶိုၼ်း မီးမွၵ်ႈ 300 ၵေႃႉၼႆႉၵူၺ်းဝႃႈၼႆ။

Ref; DVB