လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP ၽူႈၼင်ႈၸိုင်ႈ CSSU တုၵ်းယွၼ်းႁႂ်ႈ TNLA ပွႆႇပၼ်တူဝ်ၼၢင်းမူဝ်ႁွမ်ဝႆးဝႆး ဝႃႈၼႆ။
ဝၼ်းတီႈ 11/09/2018 လုင်းၸၢႆးဢၢႆႈပဝ်း ၽူႈၼင်ႈၸိုင်ႈ CSSU ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP တူၵ်ႇလၢတ်ႈဝႃႈ ယွၼ်းႁႂ်ႈၸုမ်းသိုၵ်း TNLA တူၺ်းႁၼ်ၼႃႈလုၵ်ႈဢွၼ်ႇ ႁၼ်ထိုင်ဝႃႈပဵၼ်ၼၢင်းယိင်းသေ ပွႆႇပၼ်တူဝ်ၼၢင်းမူဝ်ႁွမ်ဝႆးဝႆးဝႃႈၼႆ။
“ ၼၢင်းမူဝ်ႁွမ်ၼႆႉ ပဵၼ်ၼၢင်းယိင်း ၾၢႆႇၼိုင်ႈၵေႃႈမီးဝႆႉလုၵ်ႈသၢမ်ၵေႃႉ တေယူႇတေၵိၼ်ၸိူင်ႉႁိုဝ် ပၢႆးယူႇလီမၼ်းပဵၼ်ႁိုဝ် ႁဝ်းၵေႃႈၶႂ်ႈႁူႉ ယိၼ်းမႆႈၸႂ်ၸွမ်းမၼ်းၼၢင်းတႄႉတႄႉ ၼင်ႇႁိုဝ်မၼ်းၼၢင်း တေလွတ်ႈမႃးၼၼ်ႉၵေႃႈ လႆႈတႅမ်ႈလိၵ်ႈထိုင်လူင်ပွင်ၸိုင်ႈႁႂ်ႈၸွႆႈထႅမ်ပၼ်ယူႇ” ဝႃႈၼႆ။
ၵဵဝ်ႇလူၺ်ႈလွင်ႈၼႆႉ မၢႆးဢၢႆႈၵျေႃႇ ၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA လၢတ်ႈတီႈ သိုဝ်ႇၶၢဝ်ႇ BBC ဝႃႈ “ တီႈၼႂ်း ၼႃႈလိၼ် TNLA ႁဝ်းၶႃႈၼႆႉ တိုၼ်းမီးပၵ်းပိူင် (ဢုပတေႇ) ဝႆႉယူႇယဝ်ႉ။ လိူဝ်ၼၼ်ႉႁဝ်းၶႃႈလႆႈပိုတ်ႇဢမူႉ/ၶၻီႊ ၼၢင်းမူဝ် ႁွမ်ဝႆႉတီႈႁွင်ႈ ၵၢၼ်ၾၢႆႇတတ်းသိၼ် TNLA ယဝ်ႉ။ တွၼ်ႈတႃႈတေၸွႆး တြႃး/ ဢဝ်လိူင်ႈလၢဝ်းၵႂႃႇၼၼ်ႉႁဝ်းႁၢင်ႈႁႅၼ်းဝႆႉယဝ်ႉ။ လွင်ႈႁူမ်ႇလူမ်ႈလႄႈ လွင်ႈပၢႆးယူႇလီမၼ်းၼၢင်းၼၼ်ႉ ယႃႇမႆႈၸႂ်” ဝႃႈၼႆ။
ၼၢင်းမူဝ်ႁွမ်ၼႆႉ ထုၵ်ႇၺႃးၵူၼ်းသိုၵ်း TNLA တီႉၺွပ်း မိူဝ်ႈဝၼ်းတီႈ 17/08/2018 တေႃႇ ထိုင်ဝၼ်းမိူဝ်ႈၼႆႉယင်း ပႆႇပွႆႇ ဝႃႈၼႆ။
ၼၢင်းမူဝ်ႁွမ်ၼႆႉ မီးလုၵ်ႈ 3 ၵေႃႉ၊ ပဵၼ်ၵူၼ်းႁႃၵိၼ်လဵင်ႉတွင်ႉသိုဝ်ႈယူဝ်း မိူဝ်ႈပီ 2016 သိုၵ်း TNLA မႃးၵဵပ်း ငိုၼ်းၵႂႃႇ 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်း ငိုၼ်းၵမ်းလိုၼ်းၼၼ်ႉ သိုၵ်းလွႆ TNLA သွင်ၵေႃႉ ၼၼ်ႉၺႃးသိုၵ်းမၢၼ်ႈ မူၵ်းယိုဝ်းၸွမ်းတၢင်းတၢႆၵေႃႉၼိုင်ႈ၊ တီႉလႆႈတူဝ်လိပ်း ၵႂႃႇၵေႃႉၼိုင်ႈ။ လွင်ႈၼႆႉၾၢႆႇ TNLA ၸီႉၼႄးဝႃႈပဵၼ်ၼၢင်းမူဝ်ႁွမ်ပွင်ႇၶၢဝ်ႇ ၵပ်းၾူၼ်းလၢတ်ႈဝၼ်း ၼၼ်ႉၵမ်းလဵဝ်။ ၽွင်းၼၼ်ႉ ၼၢင်းမူဝ်ႁွမ် ယင်းတွပ်ႇလၢတ်ႈတီႈTNLA ဝႃႈ ယွၼ်ႉငိုၼ်း 11 သႅၼ်သေ ႁဝ်းဢမ်ႇဢဝ်သၢႆၸႂ်လႅၵ်ႈသေပွင်ႇၶၢဝ်ႇလေႃႇ – ဝႃႈၼႆ။
