ၼႂ်းၸိုင်ႈတႆးပွတ်းဢွၵ်ႇ ၸႄႈတွၼ်ႈမိူင်းသၢတ်ႇ ၸွမ်းသၢပ်ႇလႅၼ်လိၼ်တႆး – ထႆး ၸိူဝ်းၼၼ်ႉ ၵူၼ်းမိူင်းၵႂႃႇမႃး ၺႃး သိုၵ်းဝႃႉ UWSA ၵူတ်ႇထတ်းႁၢဝ်ႈႁႅင်း ဝႃႈၼႆ။
ဝၼ်းတီႈ 10/09/2018 ယၢမ်းၵၢင်ၼႂ် ထိုင် တၢမ်းၶမ်ႈ တပ်ႉသိုၵ်းဝႃႉ UWSA ဢၼ်တူၵ်းပုၼ်ႈၽွၼ်း တၢင်းပွတ်း ၸၢၼ်းၼၼ်ႉ တင်ႈလၢၼ်ႇၵူတ်ႇထတ်းၵူၼ်းမိူင်းၵႂႃႇမႃးႁၢဝ်ႈႁႅင်း တီႈတၢင်းၽႄၶဝ်ႈဝၢၼ်ႈၼႃးပႃႇၵၢဝ်၊ ဝူဝ်ႇလွႆး၊ တၢင်း ၽႄၶဝ်ႈမိူင်းၶိတ်ႈလႄႈ တၢင်းၽႄၶဝ်ႈထမ်ႈမိူင်းႁၢင် ၼႂ်းၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်း ဢွၵ်ႇၶူင်း ဝႃႈၼႆ။
ၸၢႆးသႅင် ၵူၼ်းမိူင်းတူၼ် ၵေႃႉၼိုင်ႈလၢတ်ႈ တီႈၽူႈတွႆႇႁွၵ်ႈဝႃႈ “ သိုၵ်းဝႃႉၶဝ် ၵူတ်ႇထတ်း ၵူၼ်းမိူင်း ဢၼ်မႃး ၸွမ်းၼႂ်းၵႃး/ ၸွမ်းရူတ်ႉၶိူင်ႈ ၺႃးႁွင်ႉလူင်းရူတ်ႉသေ ၵူတ်ႇၵူၼ်း/ၵူတ်ႇၼႂ်းရူတ်ႉၸႂ်ႈဢေႃႈ။ မိူဝ်ႈလိူၼ် 7 သိုၵ်းဝႃႉၶဝ် ယၢမ်ႈပိုၼ်ၽၢဝ်ႇဝႆႉဝႃႈ ပေႃး ၽႂ်ၵႃႉယႃႈ ပေႃးၸႅတ်ႈၺႃး တေယိုတ်းဢဝ်ႁိူၼ်းယေး၊ သူၼ်ႁႆႈၼႃး ယဝ်ႉၵေႃႈ တေတီႉသႂ်ႇၶွၵ်ႈ” ဝႃႈၼႆ။
ၼႂ်းၵႄႈပုင်ႇပႃႇၶႅမ် မိူင်းတူၼ် တီႈတၢင်းၽႄၶဝ်ႈဝၢၼ်ႈၼႃးပႃႇၵၢဝ် ၶဝ်မီးတပ်ႉၶဝ်ၼႆႉ 2 တီႈ တီႈၼၼ်ႈ ၶဝ်ဢမ်ႇ ယၢမ်ႈတင်ႈလၢၼ်ႇၵူတ်ႇထတ်းၸိူင်ႉၼႆသေပွၵ်ႈ ၵူၼ်းမိူင်းဝၢၼ်ႈၼႃးပႃႇၵၢဝ်လၢတ်ႈ။
ဢၼ်ၵူတ်ႇထတ်းၵူၼ်းၵႂႃႇမႃးဢၼ်ဝႃႈၼၼ်ႉတႄႉ ႁဝ်းၶႃႈႁဵတ်းၸွမ်းၶေႃႈၸီႉသင်ႇပႃႈၼိူဝ်၊ ၸွမ်းၼင်ႇ ပိူင်ၽဵဝ်ႈ ယႃႈမဝ်းၵမ်ၵူၺ်း၊ ၵဵဝ်ႇၵပ်းလွင်ႈသိုၵ်းလွင်ႈသိူဝ်ၵေႃႈပႃးယူႇ – ယီႈလူး ၽူႈမီးၸၼ်ႉၼႂ်းသိုၵ်းဝႃႉ UWSA ဢၼ်ယူႇ ၼႂ်းၸႄႈဝဵင်းမိူင်းတူၼ်လၢတ်ႈ။
ပူၼ်ႉမႃးပႆႇႁိုင် မိူဝ်ႈၵၢင်လိူၼ်ဢေႃႊၵတ်ႊသ် ဝၼ်းတီႈ 19-26 ၼၼ်ႉၵေႃႈ သိုၵ်းလူင်ပွင်ၸိုင်ႈမၢၼ်ႈ တပ်ႉၶလယ 65 ပႂ်ႉၵူတ်ႇထတ်း ၵူၼ်းမိူင်းတင်း သိုၵ်း RCSS/ SSA ဢၼ်တူင်ႉၼိုင်တၢင်းပွတ်းတွၼ်ႈၼၼ်ႉ တီႈလွႆဢႃႇလူး ၼႂ်း ၵႄႈမိူင်းတူၼ် – ပုင်ႇပႃႇၶႅမ် ၼႂ်းၸႄႈ ဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆး ပွတ်းဢွၵ်ႇၶူင်း ၼင်ႇၵဝ်ႇ။ ယၢမ်းလဵဝ် သိုၵ်းမၢၼ်ႈ ဢမ်ႇပႂ်ႉၵူတ်ႇထတ်းသိုၵ်းဝႃႉသမ်ႉ ပႂ်ႉၵူတ်ႇထတ်း ဝႃႈၼႆ။
