ၼႃႈၶၢဝ်းသၢင်းၵျၢၼ်ႇၼႆႉ ၸၢဝ်းလႃးႁူႇၼႂ်းၵဵင်းႁၢႆးၸိုင်ႈထႆး ဢွၼ်ၵၼ်ၸတ်း ပၢင်ၼပ်ႉယမ် ႁွင်ႉၶႂၢၼ်ပႃႇထိူၼ်ႇလႄႈမႄႈၼမ်ႉမႃး ၵူႈပီပီ ဝႃႈၼႆ။

ၸၢဝ်းလႃးႁူႇ ဢၼ်ယူႇသၢင်ႈၵိၼ်သဝ်း ၸွမ်းသၢပ်ႇၼမ်ႉၵူၵ်း ႁူမ်ႈၵၼ် ၸတ်းပၢင်ၼပ်ႉယမ် ႁွင်ႉၶႂၢၼ် ပႃႇထိူၼ်ႇလႄႈမႄႈၼမ်ႉ တီႈမူႇဝၢၼ်ႈၽႃမုပ်ႉ ဢိူင်ႇမႄႈယၢဝ်း ၸႄႈဝဵင်းၵဵင်းႁၢႆး မိူဝ်ႈဝၼ်းတီႈ 08/04/2026 ။

တၢင်းယိူင်းဢၢၼ်း ၸတ်းပၢင်ဢၼ်ၼႆႉတႄႉ တႃႇၾိင်ႈၾႃႉရႃႇသီႇၽဵင်ႇၵၼ်လႄႈ တႃႇပၼ်ၾၢင်ႉႁႂ်ႈမေႃႁၵ်ႉသႃသိင်ႇဝႅတ်ႉလွမ်ႉ ၾိင်ႈတိုၼ်းပဵၼ် ။

ဢိင်ၼိူဝ် လွင်ႈၵိူဝ်းယမ်ၼႂ်းပိုၼ်ႉတီႈပၢၼ်သိုပ်ႇပၢၼ် မီးဝႆႉၾိင်ႈၵၼ်ႇတေႃးၼမ်ႉယမ် ၸဝ်ႈပႃႇၸဝ်ႈထိူၼ်ႇလႄႈ ၸၢဝ်းလႃးႁူႇႁုၼ်ႈလင် ၸင်ႇသိုပ်ႇပၼ်ႇပုတ်ႈၵၼ်ၸတ်းႁဵတ်းမႃး ပၢင်ႁွင်ႉၶႂၢၼ်လႄႈၼပ်ႉယမ်ထိူၼ်ႇပႃႇလႄႈမႄႈၼမ်ႉ ၼႆယဝ်ႉ။
ၶဵင်ႇဢၼ်ၸၢဝ်းလႃးႁူႇပူၵ်းတင်ႈတႃႇၵၼ်ႇတေႃးလမ်ႁူဝ်ၼၼ်ႉ ၵူၼ်းပိုၼ်ႉတီႈႁွင်ႉဝႃႈ “ သႃလႃးတေးဝေး ” ။ၾိင်ႈၼႆႉ မီးမႃး 200 ပီပၢႆ ။ ပိူင်လူင် တႃႇသိုပ်ႇၸႃးတႃလႄႈယွၼ်းၵၼ်ႇတေႃးၸဝ်ႈလွႆထိူၼ်ႇပႃႇလႄႈမႄႈၼမ်ႉ ၵွၼ်ႇပႆႇထိုင်ၶၢဝ်းၽုၵ်ႇသွမ်ႈၶၢဝ်းၾူၼ် ဝႃႈၼႆ ။

ၽူႈဢွၼ်ႁူဝ်ၵူၼ်းဝၢၼ်ႈၵေႃႉၼိုင်ႈ လၢတ်ႈတီႈသိုဝ်ႇၶၢဝ်ႇလႅၼ်လိၼ် transbordernews ဝႃႈ – “ၾိင်ႈဢၼ်သိုပ်ႇၸႃးတႃမႄႈၼမ်ႉ ပဵၼ်ၾိင်ႈယုမ်ႇယမ်ၵူၼ်းပိုၼ်ႉတီႈမႃးႁိုင်ယဝ်ႉ ။ မိူဝ်ႈဢွၼ်တၢင်း တေဢွၼ်ၵၼ်ယွၼ်းသူးႁႂ်ႈမႄႈၼမ်ႉ တူၺ်းထိုင်သၢႆၸႂ်ၵူၼ်း ၽွင်းလူင်းလဵၼ်ႈၼမ်ႉၸႂ်ႉၼမ်ႉၸိူဝ်းၼႆႉ။ မိူဝ်ႈလဵဝ်ၵေႃႈ မႄႈၼမ်ႉပဵၼ်ၵွင်ႉပဵၼ်ငူၼ်ႉဝႆႉလႄႈ ယွၼ်းသူးႁႂ်ႈၸဵဝ်းပူၼ်ႉပၼ်ႁႃၸိူဝ်းၼႆႉ။ ယွၼ်းသူးတႃႇ ၸဝ်ႈသူၼ်ၸဝ်ႈၼႃးလႄႈၸိူဝ်းႁႃပူႁႃပႃၼၼ်ႉယဝ်ႉ ” – ဝႃႈၼႆ။

လိူၼ်ဢေႊပရိူဝ်ႊၵူႈပီပီၼႆႉ ၸၢဝ်းလႃးႁူႇယုမ်ႇယမ်ဝႃႈ ပဵၼ်လိူၼ်ဢၼ်မီးမင်ႇၵလႃႇ ပဵၼ်လိူၼ်ဢၼ်လူဝ်ႇႁၢင်ႈႁႅၼ်းတႃႇႁဵတ်းၵၢၼ်ႁႃၵိၼ်လဵင်ႉတွင်ႉ ။
ၸင်ႇၼၼ် တေယွၼ်းသူးတီႈပႃႇထိူၼ်ႇလႄႈမႄႈၼမ်ႉ ႁႂ်ႈၶိုၵ်ႉၶႅမ်ႉ လိူဝ်ၼၼ်ႉၵေႃႈ တႃႇၵူႈၵေႃႉႁူႉၸၵ်းၵုင်ႇၶုၼ်းမုၼ်ငဝ်းမႄႈၼမ်ႉလႄႈပႃႇထိူၼ်ႇၸိူဝ်းၼႆႉ ။ ႁႂ်ႈၵူၼ်းႁဝ်းမေႃယိၼ်းၸူမ်းၶွပ်ႈၸႂ်ၼိူဝ်သိင်ႇဝႅတ်ႉလွမ်ႉ ၼႆ – ၵျၽူး ၽူႈၶဝ်ႈၸုမ်းသၽႃးလူင်ပွင်ၸိုင်ႈ สมาชิกสภาเทศบาล ဢိူင်ႇမႄႈယၢဝ်း လၢတ်ႈၼင်ႇၼႆ။

ၵျၽူး သိုပ်ႇလၢတ်ႈဝႃႈ ၸၢဝ်းလႃးႁူႇၼႆႉ ၵွၼ်ႇပႆႇၶဝ်ႈႁပ်ႉပဵၼ်သႃသၼႃပုတ်ႉ ၵမ်ႈၼမ် ၵိူဝ်းယမ် ၽီ ။ ထိုင်မႃးပၢၼ်ၼႆႉၵေႃႈ ၾိင်ႈၵိူဝ်းယမ်ပူႇၸေႃႇၽီ ပႆႇႁၢႆလၢႆ ။ ၵမ်ႈၼမ်ၵေႃႈ ၵိူဝ်းယမ်ၼႂ်းတွၼ်ႈတႃႇႁၵ်ႉသႃသိင်ႇဝႅတ်ႉလွမ်ႉ ။ မိူၼ်ငဝ်းလၢႆးမိူဝ်ႈလဵဝ် မႄႈၼမ်ႉၵူၵ်းၵေႃႈ ယွၼ်ႉၵၢၼ်ၶုတ်းႁႄႈၶုတ်းၶမ်းၼမ်လႄႈ ယဵၼ်းပဵၼ်ၵွင်ႉပဵၼ်ငူၼ်ႉဝႆႉလႄႈ ၸွမ်းၼင်ႇၾိင်ႈၵိူဝ်းယမ်မီးဝႆႉၼၼ်ႉ ၸတ်းႁဵတ်းၵႂႃႇ ဝႃႈၼႆ။

ဝၼ်းတီႈ 22 လိူၼ်မၢတ်ႉၶျ် ၼႆႉၵေႃႈ ၸုမ်းၵဝ်ႉငဝ်ႈသုၼ်ႇလႆႈၵူၼ်းၸိုင်ႈတႆး (SHRF) ပိုၼ်ၽၢဝ်ႇဢွၵ်ႇ လွင်ႈမႄႈၼမ်ႉၵူၵ်း ၺႃးငူၼ်ႉၵွင်ႉ ႁၢဝ်ႈႁႅင်းမႃးလိူဝ်ႇၵဝ်ႇ ၼႆႉပဵၼ်ယွၼ်ႉ ႁူင်း ၸၢၵ်ႈၾႆးၾႃႉ ၸႂ်ႉထၢၼ်ႇႁိၼ်ဢၼ်ၸုမ်းသိုၵ်းဝႃႉ ပဵၼ်ၸဝ်ႈၶွင်ဝႆႉ ၼႂ်းဝဵင်းမိူင်းသၢတ်ႇ မိူင်းတႆးပွတ်းဢွၵ်ႇ ဝႃႈၼႆ။

ႁူင်းၾႆးၾႃႉၽဝ်ထၢၼ်ႇႁိၼ် ဢၼ်ၵေႃႇသၢင်ႈၶိုၼ်ႈမႃးမႂ်ႇၼႆႉ မီးဝႆႉၾၢႆႇၸၢၼ်းဝဵင်းမိူင်းသၢတ်ႇ တိတ်းၸပ်း ၵၼ်ဝႆႉတင်း လႅၼ်လိၼ်တႆး-ထႆး ႁၢင်ႇၵႆၵၼ်တင်း ၸႄႈဝဵင်းမႄႈၾႃႉ လူင် ၸႄႈတွၼ်ႈၵဵင်းႁၢႆး 19 ၵီႊလူဝ်ႊမီႊတိူဝ်ႊၵူၺ်းလႄႈ ႁဵတ်းႁႂ်ႈမႄႈၼမ်ႉၵူၵ်းၶုၼ်ႇဢူၼ်ႁႅင်းလႄႈ ၼႂ်းၼမ်ႉပဵၼ်ငူၼ်ႉၵွင်ႉၼမ်မႃး လိူဝ်ၵဝ်ႇတေႉတေႉ ၼႆယဝ်ႉ။