လုင်းၸၢႆးဢၢႆႈပဝ်း ၽူႈၼင်ႈၸိုင်ႈ CSSU ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP တူၵ်ႇလၢတ်ႈ တီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ ပေႃးဢမ်ႇလႆႈၶႂၢင်ႉ တီႈလူင်ပွင်ၸိုင်ႈၼႆ တေပႆႇၸတ်းႁဵတ်း ပၢင်ၵုမ် CSSU ယဝ်ႉ – ဝႃႈၼႆ။

ဝၼ်းတီႈ 11/09/2018 လုင်းၸၢႆးဢၢႆႈပဝ်း ၽူႈၼင်ႈၸိုင်ႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU လၢတ်ႈ တီႈၸုမ်းၶၢဝ်ႇ ၽူႈတွႆႇႁွၵ်ႈဝႃႈ – “ တႃႇတေၸတ်းႁဵတ်းပၢင်ၵုမ် CSSU ၼႆႉ ယိူင်းဢၢၼ်းတႃႇလွင်ႈငမ်းယဵၼ်သေ ႁဝ်းတႅမ်ႈလိၵ်ႈထိုင်တေႃႇဢွင်ႇသၢၼ်းၸုၵျီႇလႄႈ ၸွမ်ၸိၵ်းသိုၵ်းမိၼ်းဢွင်ႇလၢႆႇ ၵူၺ်းၵႃႈၶဝ်သမ်ႉ ၶိုၼ်းတႅမ်ႈလိၵ်ႈတွပ်ႇမႃးဝႃႈ ဢမ်ႇပၼ်ၶႂၢင်ႉ ၸတ်း။ လွင်ႈၼႆႉႁဵတ်းႁႂ်ႈၵႂင်ၸႂ် ယွၼ်ႉဝႃႈႁဝ်းၵေႃႈယိူင်းဢၢၼ်းတႃႇလွင်ႈငမ်းယဵၼ်ၵူၺ်းလူး ၶဝ်ထုၵ်ႇလီပၼ်ၶႂၢင်ႉႁဝ်းၸတ်း ဢိူဝ်ႈ ၊ သိုပ်ႇၼႆႉၵႂႃႇ ပေႃးၶဝ်ဢမ်ႇပၼ်ၶႂၢင်ႉႁဝ်းၸတ်းၵေႃႈ ႁဝ်းတေပႆႇၸတ်းယဝ်ႉ ဢမ်ႇၶႂ်ႈမီးပၼ်ႁႃ ၾၢႆႇၼိုင်ႈၵေႃႈမႆႈၸႂ်လွင်ႈႁူမ်ႇလူမ်ႈ ” ဝႃႈၼႆ။

မိူဝ်ႈဝၼ်းတီႈ 27/8/2018 ၽူႈမီးပုၼ်ႈၽွၼ်း တီႈလုမ်းသုၼ်ငမ်းယဵၼ်လႄႈ မႄးလီၼႂ်းၸိူဝ်ႉၸၢတ်ႈ NRPC ၵပ်းၾူၼ်း ၸူး လုင်းၸၢႆးဢၢႆႈပဝ်း ႁူဝ်ပဝ်ႈ ပႃႇတီႇသိူဝ်ၽိူၵ်ႇ ၽူႈတူၵ်းပုၼ်ႈ ၽွၼ်းၽူႈ ၼင်ႈ ၸိုင်ႈ CSSU သေလၢတ်ႈဝႃႈ သူင်ႇလိၵ်ႈပွၵ်ႈ ၶိုၼ်းဝႆႉ လွင်ႈဢမ်ႇ ပၼ်ႁဵတ်းပၢင်ၵုမ် ။ ၼႂ်းဝၼ်း လဵဝ်ၵၼ်လုင်းၸၢႆးၽူဝ်းဢွင်ႇ ၽူႈၼမ်းၼႂ်းလူင် CSSU တႅမ်ႈလိၵ်ႈ ၸူး လုၵ်ႈၸုမ်း CSSU လွင်ႈဝႃႈဢမ်ႇပဵၼ်ႁဵတ်းပၢင်ၵုမ် ယဝ်ႉဝႃႈၼႆ။

ပၢင်ၵုမ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ၼႆႉ ဢၢၼ်းၸတ်းႁဵတ်းတီႈဝဵင်းတူၼ်ႈတီး သွင်ဝၼ်း 3-4/9/2018 ၼႆႉ ဢၢၼ်းဢုပ်ႇၵၼ် ၵဵဝ်ႇၵပ်းၵၢၼ်ၶိုပ်ႈၼႃႈၶိုၼ်ႈသင်ႉမူႇၸုမ်း၊ ၵဵဝ်ႇၵပ်းငဝ်းလၢႆးၵၢၼ်မိူင်း ဢၼ်ပဵၼ်ယူႇ ၸိူဝ်းၼၼ်ႉဢၢၼ်း  ဢုပ်ႇဢူဝ်းၵၼ်ပဵၼ်တၢင်းၵၢၼ်လႄႈ လုင်းၸၢႆးဢၢႆႈ ပဝ်းၸင်ႇလႆႈတႅမ်ႈလိၵ်ႈထိုင် တီႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသုၵျီႇ၊ တင်း ၸိၵ်းၸွမ်သိုၵ်း လူင်ပွင်ၸိုင်ႈမၢၼ်ႈ ၸွမ်သိုၵ်းလူင်မိၼ်းဢွင်ႇလၢႆႇ ၵူၺ်းၵႃႈၾၢႆႇ လူင်ပွင်ၸိုင်ႈဢမ်ႇပၼ်ၸတ်း ႁဵတ်း – ဝႃႈၼႆ။