ၸုမ်းၵေႃပွင်ပဵၼ်ပၢင်ပွႆး ၵေႃလိၵ်ႈလၢႆးလႄႈၾိင်ႈငႄႈတႆး ၊ ပႃႇတီႇႁူဝ်သိူဝ်လႄႈ ၵူၼ်းဝၢၼ်ႈၵူၼ်း မိူင်းႁူမ်ႈၵၼ်တေၸတ်း ႁဵတ်းပၢင်ပွႆးၶႅင်ႇႁိူဝ်း တႃႇပႅင်းမႅတ်ႇၾိင်ႈႁိတ်ႈႁွႆး။

ဝၼ်းတီႈ 16 – 17 /09/2018 ၼႆႉ ၵေႃလိၵ်ႈလၢႆးလႄႈ ၾိင်ႈငႄႈတႆး ပႃႇတီႇၵၢၼ်မိူင်း ၊ၵူၼ်းဝၢၼ်ႈ ၵူၼ်းမိူင်းၼႂ်းပိုၼ်ႉတီႈ တေႁူမ်ႈၵၼ်ၸတ်းႁဵတ်း ပၢင်ပွႆးၶႅင်ႇႁိူဝ်းပွၵ်ႈၵမ်းတီႈ 5 ပိူဝ်ႈပႅင်းမႅတ်ႇ ၾိင်ႈပွႆးတႆးၶႅင်ႇႁိူဝ်းဢၼ်ၵိုၵ်းၵပ်းပိုၼ်ႉတီႈ။

ၸၢႆးသီႇႁႃႉ ၽူႈၶၢၼ်ပၢၵ်ႇပၢင်ပွႆး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ယိူင်းဢၢၼ်းဢၼ်ႁဝ်းၶႃႈ ၸတ်းႁဵတ်းၼႆႉပိူဝ်ႈ   ပႅင်းမႅတ်ႇၾိင်ႈၽၢႆးႁိူဝ်း ၼင်ႇႁိုဝ်တေဢမ်ႇႁၢႆလႄႈ ႁႂ်ႈတိူဝ်းၶိုၼ်ႈယႂ်ႇ ၵႂႃႇမိူဝ်းၼႃႈ ။ ပီႈၼွင်ႉႁဝ်းၶႃႈ တီႈၸမ်တီႈၵႆ သင်ဝႃႈတူဝ်ႈတၼ်းၼႆ ၶႅၼ်းတေႃႈမႃးတူၺ်းမႃးပၼ်ႁႅင်းၼမ်ၼမ်သေၵမ်းၶႃႈ ” ဝႃႈၼႆ။

ပၢင်ၶႅင်ႇႁိူဝ်း ၼႂ်းပီ 2018 ၼႆႉတေမီးႁိူဝ်း 4 သႅၼ်း သႅၼ်းၵူၼ်းၸၢႆး 4 ၵေႃႉ၊ သႅၼ်းၼၢင်းယိင်း 5 ၵေႃႉ၊ သႅၼ်းၼေႃႇတႅၼ်းၶိူဝ်း 6 ၵေႃႉ လႄႈသႅၼ်းၵူၼ်းၼုမ်ႇၸိူဝ်းၼႆႉ။ ၵူၼ်းၸိူဝ်းဢၼ်မႃးၶဝ်ႈႁူမ်ႈၶႅင်ႇၼႆႉ ပဵၼ်တူဝ်တႅၼ်းဝၢၼ်ႈလႂ်ဝၢၼ်ႈၼၼ်ႉတႃႇ26 ဝၢၼ်ႈ သူင်ႇၶဝ်ႈၾိုၵ်းသွၼ်ယဝ်ႉသေ လိူၵ်ႈဢဝ်ၵူၼ်းဢၼ်ၶႅၼ်ႇ တူဝ်ႈတၼ်းတႃႇၶႅင်ႇၼၼ်ႉသေ ၶဝ်ႈ  ၶႅင်ႇၼႂ်းဝၼ်းပၢင်ပွႆး ။

ထုင်ႉပူင်းၼႆႉ ပဵၼ်ထုင်ႉဢၼ်ႁၢင်ႈလီ ဢွၵ်ႇမၢၵ်ႇၶဝ်ႈတဝ်ႈၼမ်ႉ ၼႂ်းမိူင်းတႆး ၼမ်လိူဝ်တၢင်ႇ တီႈ တၢင်ႇထုင်ႉ ။ ယူႇၼႂ်းၼမ်ႉ 6 လိူၼ် ၼိူဝ်ၵွင်း 6 လိူၼ် ။ ၵူၼ်းမိူင်းၼႂ်းထုင်ႉပူင်း ႁဵတ်းၵိၼ်ၵၢၼ်ၼႃး လဵင်ႉတွင်ႉၽုၵ်ႇၶဝ်ႈၼႃးၶဝ်ႈၸဝ်ႉ၊ ၼႃးလူင်ၼႃးလေႃၸိူဝ်းၼႆႉ။

ထုင်ႉပူင်းၼႆႉ လႆႈၸႅၵ်ႇဝႆႉပဵၼ် 3 ၾၢႆႇ ။ ၾၢႆႇၼိုင်ႈ တူၵ်းၵႂႃႇၼႂ်းၸႄႈဝဵင်းႁူဝ်ပူင်း ၊ ၾၢႆႇၼိုင်ႈ တူၵ်းၵႂႃႇၼႂ်း ၸႄႈဝဵင်းသီႇ   သႅင်ႇ ၊ ၾၢႆႇၼိုင်ႈ တူၵ်းတႂ်ႈၸႄႈဝဵင်း တူၼ်ႈတီး ။ ပၢင်ၶႅင်ႇႁိူဝ်း ၼႆႉတႄႇၸတ်းမႃးမိူဝ်ႈပီ 2013 ၼႆယဝ်ႉ ။