ၼၢင်းမူဝ်ႁွမ် ၵူၼ်းမိူင်းၼမ်ႉၶမ်း ဢၼ်ၺႃးသိုၵ်းတဢၢင်း TNLA တီႉၵႂႃႇၼၼ်ႉ ထိုင်တေႃႈလဵဝ် ပႆႇပွႆႇ ယူႇတီႈ TNLA သေပိုတ်ႇလၢတ်ႈၵႂႃႇဝႃႈ တေႁဵတ်းၵႂႃႇၸွမ်းပၵ်းပိူင်ဢၼ် TNLA မီးၵူၺ်း ဝႃႈၼႆ။

လၢႆၾၢႆႇလၢႆၸုမ်း ပႃႇတီႇႁူဝ်သိူဝ် SNLD ၸုမ်းတူင်ႉၼိုင်ၼႂ်းဝဵင်းၼမ်ႉၶမ်း၊ လုမ်းငမ်းယဵၼ်ၾၢႆႇမႄးလီၶိုၼ်းၼႂ်းၸိူဝ်ႉ ၸၢတ်ႈ၊ သင်ၶ၊ ၵူၼ်းမိူင်း တုၵ်းယွၼ်းထိုင် TNLA ႁႂ်ႈပွႆႇတူဝ်ၼၢင်းမူဝ်ႁွမ်သေတႃႉ ႁိုင်မႃး 20 ဝၼ်းပၢႆၵေႃႈ TNLA ပႆႇပွႆႇပၼ်ၶိုၼ်း၊ လွင်ႈဢၼ်ဢမ်ႇပွႆႇပၼ်ၼၼ်ႉ ၽူႈၶၢၼ်ပၢၵ်ႇ TNLA မၢႆးဢၢႆႈၵျေႃႇ လၢတ်ႈၼႄတီႈ BBC ၼင်ႇၼႆ။

မၢႆးဢၢႆႈၵျေႃႇ ၽူႈၶၢၼ်ပၢၵ်ႇ တပ်ႉသိုၵ်းတဢၢင်း TNLA လၢတ်ႈတီႈ သိုဝ်ႇၶၢဝ်ႇ BBC ဝႃႈ “ တီႈၼႂ်းၼႃႈ လိၼ် TNLA ႁဝ်းၶႃႈၼႆႉ တိုၼ်းမီးပၵ်းပိူင်ဢုပတေႇဝႆႉယူႇယဝ်ႉ။ လိူဝ်ၼၼ်ႉ ႁဝ်းၶႃႈလႆႈပိုတ်ႇဢမူႉ/ၶၻီႊ ၼၢင်းမူဝ်ႁွမ်ဝႆႉတီႈႁွင်ႈ ၵၢၼ်ၾၢႆႇတတ်းသိၼ် TNLA ယဝ်ႉ။ တွၼ်ႈတႃႈတေၸွႆးတြႃး/ ဢဝ်လိူင်ႈလၢဝ်းၵႂႃႇၼၼ်ႉ ႁဝ်းႁၢင်ႈ ႁႅၼ်းဝႆႉယဝ်ႉ။ လွင်ႈႁူမ်ႇလူမ်ႈလႄႈ လွင်ႈ ပၢႆးယူႇလီမၼ်းၼၢင်းၼၼ်ႉ ယႃႇမႆႈၸႂ်” ဝႃႈၼႆ။

ၼၢင်းမူဝ်ႁွမ် ဢၼ်တပ်ႉသိုၵ်းတဢၢင်းတီႉၺွပ်းၵႂႃႇ မိူဝ်ႈဝၼ်းတီႈ 07/09/2018 ၵူၼ်းႁိူၼ်းၵူၼ်းယေး ၼၢင်းမူဝ်ႁွမ် ဢွၵ်ႇၼႄၵၢင်ၸႂ် တီႈပၢင်ႇပၢင်ပွႆး ၵၢင်ဝဵင်းၼမ်ႉၶမ်း မီးၵူၼ်းဝၢၼ်ႈၵူၼ်းမိူင်း ၼႂ်းဝဵင်းၼမ်ႉၶမ်း 1,200 ပၢႆ မႃးပႂ်ႉပၼ် ႁႅင်းၸႂ်။ မီးၸုမ်းၶွတ်ႇလိူတ်ႈ ၽွမ်ႉႁူမ်ႈ UP၊ ၸုမ်းၵူၼ်းၼုမ်ႇၼႂ်းပႃႇတီႇသိူဝ် ၽိူၵ်ႇ၊ ၸုမ်းၶႄၾႆးလႄႈ ပလိၵ်ႈလူင်ပွင် ၸိုင်ႈမၢၼ်ႈ ၸိူဝ်းၼႆႉမႃးဢဝ်ႁူမ်ႇလူမ်ႈပၼ်။

မိူဝ်ႈဝၼ်းတီႈ 17/08/2018 ယၢမ်းၵၢင်ၼႂ်ၼၼ်ႉ ၵူၼ်းသိုၵ်းတဢၢင်း TNLA ႁႃႈၵေႃႉ ပႃးၵွင်ႈၸေးမိုဝ်း ၶဝ်ႈတီႉဢဝ် တူဝ်ၼၢင်းမူဝ်ႁွမ်ၵႂႃႇ တေႃႇ ထိုင်ယၢမ်းလဵဝ် ပႆႇပွႆႇတူဝ် မီးၶၢဝ်းတၢင်း 26 ဝၼ်းယဝ်ႉ ဝႃႈၼႆ။

ၼၢင်းမူဝ်ႁွမ်ၼႆႉ မီးလုၵ်ႈ 3 ၵေႃႉ၊ ပဵၼ်ၵူၼ်းႁႃၵိၼ်လဵင်ႉတွင်ႉသိုဝ်ႈယူဝ်း မိူဝ်ႈပီ 2016 သိုၵ်း TNLA မႃးၵဵပ်း ငိုၼ်းၵႂႃႇ 3 သႅၼ်၊ ပီ 2017 မႃးၵဵပ်းငိုၼ်းၵႂႃႇထႅင်ႈ 11 သႅၼ်။ ၽွင်းမႃးၵဵပ်းငိုၼ်းၵမ်းလိုၼ်းၼၼ်ႉ သိုၵ်းလွႆ TNLA သွင်ၵေႃႉ ၼၼ်ႉၺႃးသိုၵ်းမၢၼ်ႈ မူၵ်းယိုဝ်းၸွမ်းတၢင်းတၢႆၵေႃႉၼိုင်ႈၵေႃႉ၊ တီႉလႆႈတူဝ်လိပ်းၵႂႃႇၵေႃႉၼိုင်ႈ။ လွင်ႈၼႆႉၾၢႆႇ TNLA ၸီႉၼႄးဝႃႈပဵၼ်ၼၢင်းမူဝ်ႁွမ်ပွင်ႇၶၢဝ်ႇ ၵပ်းၾူၼ်းလၢတ်ႈဝၼ်းၼၼ်ႉၵမ်းလဵဝ်။ ၽွင်းၼၼ်ႉ ၼၢင်းမူဝ်ႁွမ် ယင်းတွပ်ႇ လၢတ်ႈတီႈTNLA ဝႃႈ ယွၼ်ႉငိုၼ်း 11 သႅၼ်သေ ႁဝ်းဢမ်ႇဢဝ်သၢႆၸႂ်လႅၵ်ႈ သေပွင်ႇၶၢဝ်ႇလေႃႇ – ဝႃႈၼႆ။