ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဢိူင်ႇမၢၼ်ႈၸၢမ် 1,800 ပၢႆၼၼ်ႉ ၶိုၼ်းဢွၼ်ၵၼ်ပွၵ်ႈၶိုၼ်းႁိူၼ်းယေး ၽႂ်မၼ်းမူတ်းယဝ်ႉ ဝႃႈၼႆ။
ဝၼ်းတီႈ 08/09/2018 ဝၼ်းသဝ်ပူၼ်ႉမႃးၼႆႉ ၵူၼ်းပၢႆႈသိုၵ်းသိူဝ် 1,814 ၵေႃႉ ဢၼ်မႃးသွၼ်ႈဝႆႉတီႈဝတ်ႉ/ ၵျွင်းႁွင်ႇ ဝၢၼ်ႈၸၢမ်၊ ၵျွင်းၵုင်းၽြႃးဝၢၼ်ႈၸၢမ်၊ ဝတ်ႉၵမ်မထၢၼ်း ဝၢၼ်ႈၸၢမ်၊ ႁူင်းသဝ်း TEC ဝၢၼ်ႈၸၢမ်၊ ဝတ်ႉဝိ ႁၢရ်မိူင်းမူႉ၊ ဝတ်ႉပၢင်သပေႇလႄႈ ဝတ်ႉမၢၼ်ႈလီႈ ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇၼၼ်ႉ ဢွၼ်ၵၼ်ပွၵ်ႈ ၶိုၼ်းႁိူၼ်းၵၼ်ယဝ်ႉ ဝႃႈၼႆ။
လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈၶွမ်ႊမတီႊၵူၼ်းပၢႆႈၽေးသိုၵ်း ၼႂ်းၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် ပွၵ်ႈမိူဝ်းမူတ်းယဝ်ႉ။ ၶဝ်မိူဝ်းၶိုၼ်းမိူဝ်ႈဝၼ်းၽိတ်ႈၶႃႈဢေႃႈ။ တေလႆႈဝႃႈ ငဝ်းလၢႆးပၢင် တိုၵ်းယဵၼ်ဝႆႉယူႇ၊ တင်ႈတႄႇဝၼ်းၽိတ်ႈ(ဝၼ်းသဝ်) မႃးတေႃႇယၢမ်းလဵဝ် သဵင်ၵွင်ႈတႄႉ ပႆႇႁၼ်တႅၵ်ႇ” ဝႃႈၼႆ
ၵူၼ်းပၢႆႈၽေးသိုၵ်း ဢၼ်မီးတီႈ ဢိူင်ႇဝၢၼ်ႈၸၢမ် ႁူဝ်ၵူၼ်း 1,814 ၵေႃႉၶၢဝ်းတၢင်း 8 ဝၼ်းၼၼ်ႉ ၵမ်ႈၼမ်ပဵၼ် ၸဝ်ႈႁႆႈၸဝ်ႈ ၼႃး မႆႈၸႂ်လွင်ႈၽုၵ်ႇသွမ်ႈၵေႃႈပိူင်ၼိုင်ႈ၊ သမ်ႉမီးၵူၼ်းဢဝ်လၢႆၶူဝ်းႁႆႈၶူဝ်းသူၼ် ထူၺ်ႈဢဝ်ထူဝ်ႇ လိၼ်ၵႂႃႇ ၵၢၼ်ႉဢဝ်ၶဝ်ႈၵၢပ်ႇၵႂႃႇ၊ ၶူဝ်းၼႂ်းႁိူၼ်းၼႂ်းယေးၵေႃႈ ၺႃးလၵ်ႉလႄႈ ၸင်ႇဢွၼ်ၵၼ်မိူဝ်းၶိုၼ်းႁိူၼ်း။
ဝၢၼ်ႈပၢင်လူင် ဢၼ်ပၢႆႈၵႂႃႇသွၼ်ႈဝႆႉတီႈ တႃႈတေႈ တင်း ဝတ်ႉဢွင်ႇမင် ၵလႃႇၽူဝ်းတေႃႇ တီႈသီႇပေႃႉၵေႃႈ ဢွၼ်ၵၼ်ပွၵ်ႈၶိုၼ်းႁိူၼ်းယေးၽႂ်မၼ်းယဝ်ႉ။ တီႈတႃႈတေႈတႄႉ တေႃႈလဵဝ် ၵိုတ်းဝႆႉ ၵူၼ်းဝၢၼ်ႈၼမ်ႉၵႅင်း 60 ပၢႆ ပႆႇၸၢင်ႈပွၵ်ႈ ယွၼ်ႉငဝ်းလၢႆးၼႂ်းပိုၼ်ႉတီႈပႆႇၼိမ် ဝႃႈၼႆ။
မိူဝ်ႈႁူဝ်လိူၼ်သႅပ်ႊထႅမ်ႊၿိူဝ်ႊ 2018 ၼႆႉ သိုၵ်းဢူၺ်းလီပွတ်းႁွင်ႇ တင်း သိုၵ်း RCSS လႆႈပဵၼ်ပၢင်တိုၵ်းၵၼ် သေ ၵူၼ်းဝၢၼ်ႈ ၼွင်ငိုၼ်း၊ ၼႃးႁူၵ်ႉ၊ ၼမ်ႉသီႇလိၼ်း၊ မၢၼ်ႈမႂ်ႇ၊ ၵွင်းႁုင်း၊ သၢမ်ၶႃ၊ ၼႃးပုင်ႇ၊ လူင်မိူတ်ႇ၊ ဝၢၼ်ႈပၢင် လူင် ၸိူဝ်းၼႆႉ ႁူဝ်ၵူၼ်း 2,000 ပၢႆ လႆႈပၢႆႈယၢၼ်ႁိူၼ်းယေးတီႈယူႇ။
