Friday, March 29, 2024

ၵႃးတၢင်ႇၵႂၢႆးလမ်းၼိုင်ႈ ၺႃးယိုဝ်း ၼႂ်းၸႄႈဝဵင်းၵျွၵ်ႉမႄး ၵူၼ်းႁေႃႈလႄႈၵူၼ်းၸွမ်း တၢႆထင်တီႈ

Must read

ၵႃးတၢင်ႇၵႂၢႆး ဢၼ်လုၵ်ႉတၢင်း ဝဵင်းလိူဝ်ႇ မုင်ႈၼႃႈၸူး တၢင်း လႃႈသဵဝ်ႈၼၼ်ႉ ၺႃးၸုမ်းဢမ်ႇႁူႉၾၢႆႇ မူၵ်းယိုဝ်း ၵူၼ်း ႁေႃႈၵႃးလႄႈၵူၼ်းၸွမ်း တိူဝ်ႉၵွင်ႈ တၢႆထင်တီႈၵမ်းလဵဝ်။

- Subscription -

ဝၼ်းတီႈ 08/09/2018 ယၢမ်းၵၢင်ၼႂ် 7 မူင်းပၢႆၼၼ်ႉ ၵႃးတၢင်ႇၵႂၢႆး လမ်းၼိုင်ႈ ဢၼ်ၸၢႆးၼေႃႇသႅင် ဢႃယု 28 ပီ ပဵၼ်ၵူၼ်းႁေႃႈ ဢူးႁႃႇသၢင်ႇ ဢႃယု 40 ပီ ပဵၼ်ၵူၼ်းၸွမ်း ၺႃးၸုမ်းဢမ်ႇႁူႉၾၢႆႇ မူၵ်းယိုဝ်း တီႈႁိမ်းဝၢၼ်ႈပူးၶႃး ဢိူင်ႇၼႃးၶေႃ ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

သၢင်ႇၸၢႆး ၵူၼ်းၵျွၵ်ႉမႄး လၢတ်ႈတီႈၽူႈတွႆႇႁွၵ်ႈဝႃႈ “ သဵၼ်ႈတၢင်းၼႆႉ ၵႆႉပဵၼ်ၼႃႇ ၼႂ်းပီ 2018 ၼႆႉ လွင်ႈငွႆးယိုဝ်း ၵၼ်ၸိူင်ႉၼႆ မီးလၢႆပွၵ်ႈယဝ်ႉ။ ၸဝ်ႈၼႃႈတီႈၶဝ်ၵေႃႈ ဢမ်ႇၺွပ်းလႆႈၵူၼ်းႁၢႆႉသေပွၵ်ႈ။ ၸုမ်းဢၼ်မူၵ်းယိုဝ်း ၼၼ်ႉ ပဵၼ်ၸုမ်းလႂ် ၼမ်ႉမိုဝ်းၽႂ် ဢၼ်ဝႃႈၼၼ်ႉ ဢမ်ႇလႆႈႁူႉ။ လႆႈႁူႉဝႃႈ ၵူၼ်းႁေႃႈၵႃးၼႆႉ ပဵၼ်တႆးၼႆဝႃႇ။ ၵႃးတၢင်ႇၵႂၢႆး ၼႆႉ လုၵ်ႉတၢင်းဝဵင်းမၼ်းတလေးသေ တေၵႂႃႇတၢင်းမူႇၸေႊ။ ၸဝ်ႈၵႃးတင်း ၵူၼ်းၸွမ်းၵႃးတႄႉ တၢႆထင်တီႈ” ဝႃႈၼႆ။

ၸၢႆးၼေႃႇသႅင် ၵေႃႉႁေႃႈၵႃးၼၼ်ႉ တိူဝ်ႉၺႃးမၢၵ်ႇၵွင်ႈ 5 တီႈ။ ဢူးႁႃႇသၢင်ႇ ၵူၼ်းၸွမ်းၵႃးသမ်ႉ တိူဝ်ႉၺႃးမၢၵ်ႇၵွင်ႈ 4 တီႈ။ လိူဝ်ၼၼ်ႉ ၼႂ်းၵႃးၼၼ်ႉ တၢင်ႇၵႂၢႆးမႃး တင်းမူတ်း မီး 24 တူဝ်။ ၵႂၢႆးဢၼ်တိူဝ်ႉမၢတ်ႇၸဵပ်းၸွမ်းသမ်ႉ မီး 4 တူဝ် ဝႃႈၼႆ။

ၼႂ်းပီ 2018 မႃးၼႆႉ ၵႃးတၢင်ႇၵႂၢႆး/ ဝူဝ်း ၺႃးယိုဝ်းၼႂ်းၸႄႈဝဵင်းၵျွၵ်ႉမႄး မီးၵႂႃႇယဝ်ႉ 7 ပွၵ်ႈ၊ ၵူၼ်းလႆႈလူႉတၢႆ ဢမ်ႇ ယွမ်း 8 ၵေႃႉလႄႈ ဢၼ်လႆႈမၢတ်ႇၸဵပ်းသမ်ႉ 9 ၵေႃႉ ဝႃႈၼႆ။

Photo FB – Nay Myo

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း