ဝၼ်းတီႈ 23 လိူၼ်မၢတ်ႉၶျ် မိူဝ်ႈဝႃးၼႆႉ ႁိူဝ်းမိၼ်သိုၵ်း တပ်ႉလူမ်း မိူင်းၵူဝ်ႊလမ်ႊပီႊယႃႊ လမ်းၼိုင်ႈ ယၢတ်ႇတူၵ်းလူင်း ၼႂ်းပိုၼ်ႉတီႈဢမေႊၸူင်ႊ ပွတ်းၸၢၼ်း ၵူၼ်းသိုၵ်းဢၼ်ၶီႇၵႂႃႇၸွမ်း တၢႆဢမ်ႇယွမ်း 66 ၵေႃႉ ဝႃႈၼႆ။

တီႈၼိူဝ်ႁိူဝ်းမိၼ်ၼၼ်ႉ မီးၵူၼ်းသိုၵ်းၶီႇၵႂႃႇၸွမ်း တင်းမူတ်း 125 ၵေႃႉ ပႃးၵူၼ်းသိုၵ်းၾၢႆႇတပ်ႉလူမ်း 11 ၵေႃႉ။

ႁိူဝ်းမိၼ်သိုၵ်း သႅၼ်း Hercules C -130 ၼႆႉ လုၵ်ႉတီႈ ဝဵင်း ပႂႃႊတူဝ်ႊလီႊၵုၺ်ႊၸႃႊမူဝ်ႊ (Puerto Leguízamo)  ႁိမ်းလႅၼ်လိၼ် မိူင်းပီႊရူးသေ မိၼ်ၶိုၼ်ႈၵႂႃႇပႆႇႁိုင် ၶိုၼ်းယၢတ်ႇတူၵ်းလူင်းမႃး။

တေႃႇထိုင်မိူဝ်ႈၼႆႉၵၢင်ဝၼ်း မီးၵူၼ်းလူႉတၢႆ 66 ၵေႃႉ၊ မၢတ်ႇၸဵပ်း 48 ၵေႃႉ။ ၽူႈမီးပုၼ်ႈၽွၼ်းၶဝ် တိုၵ်ႉ သိုပ်ႇသွၵ်ႈႁႃတူဝ် ၵူၼ်းၸိူဝ်းႁၢႆလၢႆဝႆႉၼၼ်ႉထႅင်ႈယူႇ ဝႃႈၼႆ။

ၽွင်းလူင်ၾၢႆႇၵႅတ်ႇၶႄႁႄႉၵင်ႈ မိူင်းၵူဝ်ႊလမ်ႊပီႊယႃႊ လၢတ်ႈဝႃႈ – မိူဝ်ႈၽွင်းႁိူဝ်းမိၼ်ယၢတ်ႇတူၵ်းၵႂႃႇၼၼ်ႉ ၾႆးမႆႈသေ မၢၵ်ႇမိုဝ်ႉၸိုၼ်းယၢမ်း ၸိူဝ်းပႃးၵႂႃႇၼိူဝ်ႁိူဝ်းမိၼ်ၼၼ်ႉၵေႃႈ တႅၵ်ႇၾူင်ႉပႃးထႅင်ႈ ဝႃႈၼႆ။ ယွၼ်ႉသင်လႄႈႁိူဝ်းမိၼ် ယၢတ်ႇတူၵ်းၵႂႃႇဢၼ်ဝႃႈၼၼ်ႉ ၽူႈမီးပုၼ်ႈၽွၼ်းၶဝ် တိုၵ်ႉၵူတ်ႇထတ်းလွင်ႈတၢင်းဝႆႉ။

မိူၼ်ၼႆ ၼႂ်းဝၼ်းတီႈ 22 လိူၼ်မၢတ်ႉၶျ် မိူဝ်ႈဝႃးယၢမ်းႁူဝ်ၶမ်ႈၼၼ်ႉၵေႃႈ ႁိူဝ်းမိၼ်တၢင်ႇၵူၼ်း ၶွင်သၢႆၵၢၼ်မိၼ် Air Canada လမ်းၼိုင်ႈလႄႈ ရူတ်ႉၵႃးၶႄၾႆး ပဵၼ်ၽေးၵိုင်ႉၵၢင်ႉၽႃႇၺႃးၵၼ် တီႈဝၢင်းႁိူဝ်းမိၼ် လႃႊၵႂႃးတီးယႃး ဝဵင်းၼိဝ်ႊယွၵ်ႊ မိူင်းဢမေႊရိၵၼ်ႊ။ ၽူႈၶပ်းႁိူဝ်းမိၼ်လူႉတၢႆၵႂႃႇတၢင်း 2 ၵေႃႉသေ မီးၵူၼ်းမၢတ်ႇၸဵပ်း 41 ၵေႃႉ ၼႆယဝ်ႉ။