ၵူၼ်းဝၢၼ်ႈ ၼႂ်းဢိူင်ႇပၢင်လူင် ၸႄႈဝဵင်းၼမ်ႉတူႈ ဢၼ်ပၢႆႈၽေးသိုၵ်း မႃးသွၼ်ႈဝႆႉတီႈသီႇပေႃႉၸိူဝ်းၼၼ်ႉ ၶူဝ်းႁႆႈ ၶူဝ်းသူၼ် တၢင်းၼွင်ႈတၢင်းလင်ႁၢႆ ၺႃးလၵ်ႉလႄႈ မႆႈၸႂ်ၽေးသိုၵ်းသိူဝ်ယူႇၵေႃႈ ဢွၼ်ၵၼ်ပွၵ်ႈၶိုၼ်းႁိူၼ်း။
မိူဝ်ႈၼႆႉ ဝၼ်းတီႈ 10/09/2018 ယၢမ်းၵၢင်ၼႂ်ဝၼ်းမွၵ်ႈ 10:30 မူင်းၼၼ်ႉ ၵူၼ်းဝၢၼ်ႈ ၼႂ်းဢိူင်ႇပၢင်လူင် 278 ၵေႃႉ ဢၼ် ပၢႆႈၽေးသိုၵ်း မႃးသွၼ်ႈဝႆႉတီႈ ဝတ်ႉဢွင်ႇမင်ႇၵလႃႇၽူဝ်းတေႃႇ ၸႄႈဝဵင်းသီႇပေႃႉ မႆႈၸႂ်ၽေးသိုၵ်းသိူဝ်ယူႇ ၵေႃႈ မိူဝ်ႈၼႆႉ မီး 10 ဝၼ်း ၶူဝ်းႁႆႈ ၶူဝ်းသူၼ် ၺႃးလၵ်ႉ ၶူဝ်းႁိူၼ်းၶူဝ်းယေးႁၢႆလႄႈ မႆႈၸႂ် ပွၵ်ႈၶိုၼ်းႁိူၼ်းမူတ်း ဝႃႈၼႆ။
ၼၢင်းၼုမ်ႇ ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ဝတ်ႉဢွင်ႇမင်ႇၵလႃႇၽူဝ်းတေႃႇ သီႇပေႃႉ လၢတ်ႈတီႈၽူႈတွႆႇ ႁွၵ်ႈဝႃႈ “ ယွၼ်ႉပၢင်တိုၵ်းၼႆႉ တႄႇဢဝ် လိူၼ်ပႅတ်ႇ ထိုင် လိူၼ်ၵဝ်ႈၼႆႉမႃး ႁဝ်းၶႃႈ လႆႈပၢႆႈၽေးသိုၵ်း မီး 5 ပွၵ်ႈ ပႃးပွၵ်ႈၼႆႉယဝ်ႉ။ ၵူၼ်းဝၢၼ်ႈ ဢၼ်ပၢႆႈမႃးတီႈ ဝတ်ႉၽူဝ်းတေႃႇၼႆႉ ပဵၼ်ၵူၼ်းႁဵတ်းသူၼ်ႁႆႈၼႃးၵၼ်တင်းမူတ်း ၶႃႈယဝ်ႉ။ ၵမ်ႈၽွင်ႈပၢႆႈမႃး ဢမ်ႇတၼ်းလႆႈၶတ်းသေႃးႁိူၼ်းမႃးၼၼ်ႉ ၶဝ်ႈသၢၼ်ႈပဵၼ်ထူင် ပဵၼ်ထူင် မႃးတဵင်ႇ ဢဝ်ၵႂႃႇ။ ထူဝ်ႇလိၼ်ၵေႃႈ ထူၺ်ႈဢဝ်ၵႂႃႇ၊ ၶဝ်ႈၵၢပ်ႇၵေႃႈၵၢၼ်ႉဢဝ်ၵႂႃႇ” ဝႃႈၼႆ။
ၸၢႆးလိင်ႇ ၵူၼ်းဝၢၼ်ႈပၢင်လူင် လၢတ်ႈတီႈၽူႈတွႆႇႁွၵ်ႈဝႃႈ “ တေလႆႈဝႃႈ ပၢင်တိုၵ်းယဵၼ်ယဝ်ႉႁႃႉဢၼ်ဝႃႈၼၼ်ႉ ပႆႇ ယဵၼ်။ ပဵၼ်ႁိုဝ်ၵေႃႈယဝ်ႉ ႁဝ်းယူႇလႆႈၵႃႈႁိုဝ်ၵေႃႈ တေပွၵ်ႈမိူဝ်းယူႇ။ မိူဝ်ႈလဵဝ် ပဵၼ်ၶၢဝ်းဢဝ်ထူဝ်ႇလိၼ်။ သင်ဢမ်ႇ ယူႇလႆႈၵေႃႈ ဢွၼ်ၵၼ်ပွၵ်ႈ မႃးၶိုၼ်း ႁဵတ်းၼႆၵူၺ်းၶႃႈ။ သင်ဝႃႈတေပႂ်ႉပၢင်တိုၵ်းယဵၼ်သေ ပွၵ်ႈမိူဝ်းၼႆႉ မၼ်းတေ ပႆႇၸၢင်ႈပွၵ်ႈမိူဝ်းလႆႈငၢႆႈငၢႆႈ။ ထႅင်ႈၾၢႆႇၼိုင်ႈၵေႃႈ ႁဝ်းၶႃႈ မႆႈၸႂ် ၶူဝ်းသူၼ် ၶူဝ်းႁိူၼ်းႁဝ်းၶႃႈ” ဝႃႈၼႆ။
ၵူၼ်းပၢႆႈၽေးသိုၵ်း ၸိူဝ်းပွၵ်ႈမိူဝ်း ပဵၼ်ၵူၼ်းဝၢၼ်ႈပၢင်လူင် ၸၢႆး 105 ၵေႃႉ၊ ယိင်း 173 ၵေႃႉ ႁူမ်ႈၵၼ်တင်းမူတ်း 278 ၵေႃႉ ဝႃႈၼႆ။
ၵူၼ်းဝၢၼ်ႈပၢင်လူင် ဢၼ်မီးတီႈတႃႈတေႈၼၼ်ႉ ၸၢႆး 27 ၵေႃႉ၊ ယိင်း 38 ၵေႃႉ ႁူမ်ႈ 65 ၵေႃႉ ၵေႃႈမိူဝ်းၶိုၼ်းႁိူၼ်း မိူဝ်ႈဝၼ်းတီႈ 08/09/2018 ။ ဢၼ်ၵိုတ်းဝႆႉတႄႉ ပဵၼ်ၵူၼ်းဝၢၼ်ႈၼမ်ႉၵႅင်း ၸၢႆး 31 ၵေႃႉ၊ ယိင်း 33 ၵေႃႉ ႁူမ်ႈ ၵၼ်တင်းမူတ်း 64 ၵေႃႉ ပႆႇပဵၼ်ပွၵ်ႈၶိုၼ်း ဝႃႈၼႆ။
တႄႇဢဝ်ႁူဝ်လိူၼ်သႅပ်ႊထႅမ်ႊၿိူဝ်ႊ 2018 ၼႆႉမႃး ၸုမ်းသိုၵ်းဢူၺ်းလီပွတ်းႁွင်ႇ တင်း သိုၵ်း RCSS လႆႈပဵၼ်ပၢင် တိုၵ်းၵၼ်ႁၢဝ်ႈႁႅင်း ၵူၼ်းမိူင်း 2,200 ပၢႆ လႆႈပၢႆႈယၢၼ်ႁိူၼ်းယေးတီႈယူႇ၊ ၶူဝ်းႁိူၼ်း ၶူဝ်းယေး ပႃးၸဵမ်ၶဝ်ႈသၢၼ် ၽၵ်းမီႇၼမ်ႉမၼ်း၊ ၼႂ်းသူၼ်ၼႂ်းႁိူၵ်ႈသမ်ႉ ထူဝ်ႇလိၼ် ဢမ်ႇဝႆႉထူၺ်ႈဢဝ်ၵႂႃႇ၊ ၵၢၼ်ႉဢဝ်ၵႂႃႇ ၵူဝ်ဢမ်ႇမီးတႃႇၵိၼ် တႃႇယႅမ်ႉၼႂ်းပီၼႃႈ မႆႈၸႂ်ပၢင်တိုၵ်းယူႇၵေႃႈ ၵႃႈလႆႈဢွၼ်ၵၼ်ပွၵ်ႈၶိုၼ်းယဝ်ႉၼႆ ဢွၼ်ၵၼ်လၢတ်ႈၼႄၼင်ႇၼႆ။
