ပလိၵ်ႈထႆး တီႉၺွပ်းလႆႈယႃႈမႃႉ 8 လၢၼ်ႉမဵတ်ႉပၢႆတီႈၸၢဝ်းထႆး ဢၼ်ႁပ်ႉၸၢင်ႈ တေႃႉယႃႈပၼ်ၸၢဝ်းမၢၼ်ႈ ၶဝ်ႈမိူင်းထႆးတွၼ်ႈၵၢင်။
ဝၼ်းတီႈ 9/09/2018 သိုဝ်ႇၶၢဝ်ႇ Thairath ပိုၼ်ၽၢဝ်ႇဝႃႈ- ပလိၵ်ႈၾၢႆႇၽဵဝ်ႈမူၺ်ႉယႃႈမဝ်းၵမ် ၸႄႈတွၼ်ႈမိူင်းတၢၵ်ႇ ၸိုင်ႈထႆး ႁူမ်ႈၵၼ်တီႉၺွပ်းလႆႈၸၢဝ်းထႆး 2 ၵေႃႉ ၸၢႆးဝိရၼိတ်ႉ သႄႊမႃႉ ဢႃယု 30 ပီ ပဵၼ်ၵူၼ်းမိူင်းတၢၵ်ႇလႄႈ ၸၢႆးတီယိူဝ်ႊ ၶျႆႊၽတ်ႊယူဝ်ႊထိၼ်ႊ ဢႃယု 24 ပီ ယိုတ်းလႆႈယႃႈမႃႉ 52 ထူင် မီး 8,840.000 မဵတ်ႉ ၼႂ်းၵႃး TOYOTA လမ်းၼိုင်ႈ၊ ႁေႃႈပၢႆႈပိၼ်ႈတူၵ်းတၢင်းသေ ၺႃးတီႉဝႃႈၼႆ။
ၸွမ်သိုၵ်း သူႊဝတ်ႊ ၸႅင်ႊယွတ်ႊသုၵ်ႊ လၢတ်ႈဝႃႈ – “ ႁဝ်းၶႃႈလႆႈၶၢဝ်ႇဝႃႈ တေမီးၵၢၼ်တေႃႉယႃႈ လုၵ်ႉဢဝ်တီႈၽၢၵ်ႈၼိူဝ်သေ တေႃႉၶဝ်ႈမိူင်းထႆးတွၼ်ႈၵၢင်ၼႆလႄႈ ၸင်ႇမႃးတင်ႈလၢၼ်ႇပႂ်ႉၵူတ်ႇထတ်း ။ ၽွင်းၶၢဝ်းယၢမ်း 11:00 မူင်းၵၢင်ၶိုၼ်း ၼၼ်ႉ မီးၵႃး 2 လမ်းႁေႃႈမႃးၸွမ်းၵၼ် ၽိူဝ်ႇႁၼ်လၢၼ်ႇ ၸဝ်ႈၼႃႈတီႈယဝ်ႉ ၼႅတ်ႈႁေႃႈပၢႆႈ ၵႃးဢၼ်တၢင်ႇယႃႈၼၼ်ႉသမ်ႉပိၼ်ႈတူၵ်းတၢင်း ႁဝ်းၶႃႈၶဝ်ႈၵူတ်ႇထတ်းသေ တၼ်းတီႉၺွပ်းလႆႈၵူၼ်း 2 ၵေႃႉလႄႈယႃႈမဝ်းၵမ်” ဝႃႈၼႆ။
ၸၢႆးဝိရၼိတ်ႉ လၢတ်ႈၼႄတီႈပလိၵ်ႈဝႃႈ – “ ၵိၼ်ၸၢင်ႈတေႃႉယႃႈမဝ်းၵမ် တီႈၸၢဝ်းမၢၼ်ႈ လုၵ်ႉဢဝ်တီႈမိူင်းထႆးတွၼ်ႈၼိူဝ်သူင်ႇၶဝ်ႈမိူင်းထႆးတွၼ်ႈၵၢင် လႆႈၵႃႈၸၢင်ႈ မၼ်း 500,000 ၿၢတ်ႇ ထိုင် 2,000,000 ၿၢတ်ႇ ႁၼ်ဝႃႈလႆႈငိုၼ်းလီငိုၼ်းၼမ်လႄႈ ၸင်ႇၸူဝ်းၵၼ်မႃးႁဵတ်း ” ဝႃႈၼႆ။
ၸဝ်ႈၼႃႈတီႈပလိၵ်ႈ တီႉၺွပ်းတူဝ်တင်းသွင်ၵေႃႉတင်းယႃႈမဝ်းၵမ် သူင်ႇႁူင်းပလိၵ်ႈၿၢင်ႊရႃႊၸၼ်ႊ ၸႄႈတွၼ်းသိင်ၿူႊရီႊ သေသိုပ်ႇၶႆႈငိူၼ်ႈငဝ်ႈၵူၼ်း ၵဵဝ်ႇၶွင်ႈၵၢၼ်ၵႃႉယႃႈထႅင်ႈယူႇ- ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ