ပလိၵ်ႈၵဵင်းမႆႇ တီႉၺွပ်းၸုမ်းႁၢတ်ႈႁၢႆးႁၢႆႉ“ ၵႅင်ႉသႃႊမူႊရႆႊ” ၼႂ်းၵဵင်းမႆႇ

ၸဝ်ႈၼႃႈတီႈပလိၵ်ႈ ဝဵင်းၵဵင်းမႆႇ ႁူမ်ႈၵၼ်တီႉၺွပ်း ဢွၼ်ႇၸၢႆးႁၢတ်ႈႁၢႆးႁၢႆႉ “ ၵႅင်ႉသႃႊမူႊရႆႊ” ၸိူဝ်းမဝ်းလဝ်ႈယႃႈသေ ၽိတ်းမေႃးၵၼ်ဢႅဝ်ႇႁႃလမ်းၾၼ်းၵူၼ်းၵႂႃႇမႃးၼႂ်းပိုၼ်ႉတီႈ ၼႂ်းၵဵင်းမႆႇ ၸိုင်ႈထႆး။

ဝၼ်းတီႈ 06/09/2018 သိုဝ်ႇၶၢဝ်ႇၵဵင်းမႆႇ ပိုၼ်ၽၢဝ်ႇဝႃႈ – ၸဝ်ႈၼႃႈတီႈပလိၵ်ႈႁူမ်ႈၵၼ်တီႉၺွပ်း ဢွၼ်ၸၢႆး ၶီႇရူတ်ႉ ၶိူင်ႈသေ ၸွမ်းႁဵတ်းႁၢႆႉၵူၼ်းဝၢၼ်ႈ ဢၼ်ဢမ်ႇမီးတၢင်းၽိတ်းသင်ၼႂ်းဝူင်ႈၵၢင် ၸႄႈဝဵင်း သႃရၽီးလႄႈ ၼႂ်းဝဵင်းသၼ်ၵမ်ႇပႅင်း တီႉၺွပ်းလႆႈဢွၼ်ႇၸၢႆးထႆးလႄႈ ႁႅင်းၵၢၼ်ယၢၼ်မိူင်း ၼႂ်းတူတ်ႈ တၢမ်ႇမဝ်းယဝ်ႉၶပ်း 4 ၵေႃႉ။ ၶဝ်ႈမိူင်းထႆးၽိတ်းပၵ်းပိူင်မၢႆမီႈ 3 ၵေႃႉ ယိုတ်းဢဝ်ရူတ်ႉၶိူင်ႈ 5 လမ်း ။ သူင်ႇႁူင်းပလိၵ်ႈ ပၼ်တူတ်ႈတၢမ်ႇၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးၼၼ်ႉ ဝႃႈၼႆ။

ၸဝ်ႈၼႃႈတီႈပလိၵ်ႈ လၢတ်ႈဝႃႈ – “ ၸုမ်းသႃႊမူႊရႆႊၼႆႉ မီးဢွၼ်ႇၸၢႆးထႆးလႄႈ တင်းႁႅင်းၵၢၼ်ယၢၼ်မိူင်း လေႃးၵၼ်ဝႆႉ မီးဢႃယုဝူင်ႈၵၢင် 17 ပီ ။ ပေႃးမီးလွင်ႈဢမ်ႇႁၢၼ်ႉၸႂ်ၼိူဝ်ၵၼ်ၵေႃႈ ဢႅဝ်ႇႁႃၽိတ်းမေႃးလမ်းၾၼ်း ၵၼ်ၼႂ်းတူဝ်မိူင်းၵဵင်းမႆႇ သၼ်ၵမ်ႇပႅင်းလႄႈ သႃရၽီႊ ၸိူဝ်းၼႆႉ ။ သိုပ်ႇၼႆႉၵႂႃႇ တေႁူမ်ႈမိုဝ်းတင်းၸဝ်ႈၼႃႈတီႈလၢႆၾၢႆႇသေ သိုပ်ႇၵူတ်ႇထတ်းၵႂႃႇ ႁၢဝ်ႈႁၢဝ်ႈႁႅင်းႁႅင်း တေၸွမ်းႁႃတူဝ် ၽူႈၸိူဝ်းၵဵဝ်ႇ ၶွင်ႈမႃးပၼ်တူတ်ႈတၢမ်ႇၵႂႃႇ “ ဝႃႈၼႆ။

ၸၢႆးသႅင်မိူင်း မင်းၵွၼ်း ၽူႈၵွၼ်းႁူင်းပွႆးသဵင် FM 99 MHz ယၢမ်ႈလၢတ်ႈဝႃႈ – “ ၵူၼ်းၼုမ်ႇၵူႈၵေႃႉမႃး ႁဵတ်းၵၢၼ်    မိူင်းထႆးၵေႃႈ လူဝ်ႇဢွၼ်ၵၼ်ၶတ်းၸႂ်ႁဵတ်းၵၢၼ် ႁႃငိုၼ်း ယႃႇဢဝ်ၸႂ်တူဝ်ၵဝ်ႇပဵၼ်ယႂ်ႇ ပေႃးႁဵတ်းၽိတ်းၵႂႃႇၼႆ တူဝ် ႁဝ်းၵူၺ်းတေယၢပ်ႇဢမ်ႇၸႂ်ႈ ပေႃႈမႄႈ၊ ပီႈၼွင်ႉ၊ လုၵ်ႈမေးႁဝ်းပဵၼ် ၼမ်ႉႁူၼမ်ႉတႃ ယၢပ်ႇၸႂ်ၸွမ်းၵူၺ်းဢမ်ႇၵႃႈ ၸိူဝ်ႉၶိူဝ်းႁဝ်းၵေႃႈ ၸိုဝ်ႈသဵင်လူႉဢိူဝ်ႈ ၵွပ်ႈၼၼ်လႄႈ တေႁဵတ်းသင်ၵေႃႈ ႁႂ်ႈဝူၼ်ႉတႂ်ႈဝူၼ်ႉၼိူဝ်ၼမ်ၼမ်သေၵမ်း ” ဝႃႈၼႆ။

ၼႂ်းမိူင်းၸိုင်ႈထႆးၼႆႉ တႄႇႁူဝ်ပီ 2018 မႃးလူင်ပွင်ၸိုင်ႈမိူင်းထႆး ၶဵင်ႈၶႅင်ၵူတ်ႇ ထတ်းၵူၼ်း ၵႂႃႇႁႃ ႁဵတ်းၵၢၼ်ၼႂ်းမိူင်းထႆးႁၢဝ်ႈႁႅင်း ဢမ်ႇဝႃႈ ပဵၼ်လွင်ႈၼိမ်သဝ်းၼႂ်းပိုၼ်ႉတီႈ၊ လွင်ႈႁေႃႈရူတ်ႉၵႃး၊ လွင်ႈႁႅင်းၵၢၼ်ယၢၼ်မိူင်းၸိူဝ်းၼႆႉ။ ၸုမ်းသႃႊမူႊရႆႊၼႆႉ ၾၢႆႇထႆးၵႆႉၼႄး ဝႃႈပဵၼ်ၸုမ်းလုၵ်ႈဢွၼ်ႇတႆး၊ ၽူႈၸမ်ၸႂ်ၾၢႆႇႁူမ်ႇလူမ်ႈထႆးတႄႉလၢတ်ႈဝႃႈ ၵူၼ်းဢွၼ်ႁူဝ်ၵေႃႇတင်ႈဢမ်ႇၸႂ်ႈတႆး ပဵၼ်ထႆးဢွၼ်ႁူဝ်သေ လဵင်ႉႁၢတ်ႈႁၢႆးတႆးပဵၼ်ၶိူင်ႈမိုဝ်း ဝႃႈၼႆ။