ၼႂ်းၶၢဝ်းတၢင်း 2 ဝၼ်းထပ်းၵၼ်မႃးၼႆႉ ပလိၵ်ႈမၢၼ်ႈ ၸႄႈဝဵင်းၼွင်ၶဵဝ် တီႉလႆႈယႃႈမႃႉ ၶၼ်ငိုၼ်း 50,820 သႅၼ် ပျႃးပၢႆ တီႈႁိမ်းၵဵတ်ႉ/လၢၼ်ႇ တၢင်း ၶဝ်ႈဢွၵ်ႇဝဵင်း။
ဝၼ်းတီႈ 06/09/2018 ယၢမ်းၵၢင်ၼႂ် ပလိၵ်ႈၾၢႆႇၽဵဝ်ႉမူၺ်ႉယႃႈမဝ်းၵမ် ၵူတ်ႇထတ်းတီႉလႆႈယႃႈမႃႉ တီႈၼႂ်းရူတ်ႉ မဵဝ်းၵျီး တင်း တဵင်းသူၺ်ႇ ဢၼ်မႃးၸွမ်းၵၼ် တီႈႁိမ်းလၢၼ်ႇ ဢူဝ်ႊရီႊယၼ်ႊတေႊ (အိုရီယမ် တယ်တိုးဂိတ်အနီး) တၢင်းၶဝ်ႈဢွၵ်ႇ ဝဵင်းၼွင်ၶဵဝ် ၼိူဝ်သဵၼ်ႈ တၢင်းလူင် မိူင်းႁူမ်ႈတုမ် မူႇၸေႊ – ဝဵင်းလိူဝ်ႇ (မၼ်း တလေး) ၼႂ်းၸႄႈဝဵင်း ၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။
ႁွင်ႈၵၢၼ်ၾၢႆႇႁူမ်ႇလူမ်ႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႃႈ “ မိူဝ်ႈဝၼ်းတီႈ 6 ၼၼ်ႉ တီႉလႆႈယႃႈမႃႉ 2,541,000 မဵတ်ႉ။ ၾူၼ်း(မိုဝ်းထိုဝ်) 2 လုၵ်ႈ။ မိူဝ်ႈဝၼ်းတီႈ 5 သမ်ႉ တီႉလႆႈတီႈႁိမ်းၵဵတ်ႉ/လၢၼ်ႇၼႆႉ ယႃႈမႃႉ 1,770 မဵတ်ႉ” ဝႃႈၼႆ။
ယၢမ်းလဵဝ် တပ်ႉပလိၵ်ႈ ၼွင်ၶဵဝ် ၵၵ်းၶင်တူဝ်ၵူၼ်းၵဵဝ်ႇၶွင်ႈ (ၸၢႆး) မဵဝ်းၵျီး၊ ၼေႇဢူးမွင်ႇ၊ တဵင်းသူၺ်ႇလႄႈ သူဝ်းမွင်ႇ ၶဝ်ဝႆႉ ဝႃႈၼႆ။
