ႁူဝ်လိူၼ်သႅပ်ႊထႅမ်ၿိူဝ်ႊၼႆႉ သိုၵ်းပွတ်းႁွင်ႇတင်း RCSS ပဵၼ်ပၢင်တိုၵ်းၵၼ် တိူဝ်ႉၺႃးၵူၼ်းဝၢၼ်ႈ မၢၵ်ႇၵွင်ႈၶမ်ဢူၵ်း ၸူၵ်ႉဝႆႉၼႂ်းပွတ်ႇလႄႈ ၶဝ်ႈယူတ်းယႃတူဝ်တီႈႁူင်းယႃသီႇပေႃႉ။

လုင်းၸၢႆးၸၢမ်ႇထုၼ်း တင်း ၸၢႆးမူဝ်ၼႆႉ ၺႃးၸၢၵ်ႇမၢၵ်ႇၵွင်ႈ တီႈၼႂ်းဝၢၼ်ႈပၢင်လူင် ဢိူင်ႇပၢင်လူင် ၸႄႈဝဵင်းၼမ်ႉ တူႈ မိူဝ်ႈဝၼ်းတီႈ 01/09/2018 ယၢမ်းၵၢင်ၶမ်ႈ မွၵ်ႈ 7:30 မူင်း။ ၽွင်းပၼ်ႁႃ ပၢင်တိုၵ်းသိုၵ်းသိူဝ် ဝူင်ႈၵၢင်ၸုမ်းသိုၵ်းပွတ်းႁွင်ႇ တင်း သိုၵ်း RCSS။ ၼႂ်းသွင်ၵေႃႉ ၵေႃႉၸိုဝ်ႈလုင်းၸၢမ်ႇထုၼ်းၼၼ်ႉ မၢၵ်ႇၵွင်ႈၶဝ်ႈၵိုတ်းၸူၵ်ႉ ၶမ်ဝႆႉၼႂ်းပွတ်ႇ။ ယူတ်းယႃတီႈဝဵင်းသီႇပေႃႉ သင်ယႃဢမ်ႇပေႉ တေသူင်ႇၵႂႃႇယႃတီႈႁူင်းယႃ ဝဵင်းလိူဝ်ႇ(မၼ်းတလေး) ဝႃႈၼႆ။

ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် SNLD ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ လုင်းၸၢႆးၸၢမ်ႇ ထုၼ်း ဢၼ်တိူဝ်ႉၺႃးမၢၵ်ႇၵွင်ႈတီႈဢူၵ်းၼၼ်ႉ တေႃႈလဵဝ် မၢၵ်ႇၵွင်ႈတိုၵ်ႉၶမ်ဝႆႉယူႇတီႈၼႂ်းပွတ်ႇမၼ်းၸၢႆးဝႆႉ ပႆႇ ၸၢင်ႈဢဝ်ဢွၵ်ႇ။ တေႃႈလဵဝ် လုင်းႁဝ်းၶႃႈသမ်ႉဢႆဝႆႉ သင်ဝႃႈ ဢမ်ႇဢႆ ယူႇလီၶိုၼ်ႈမႃးၵမ်ႈၽွင်ႈၸိုင် ယူႇတီႈ မေႃယႃၶဝ် တေသူင်ႇၵႂႃႇၽႃႇတတ်းဢဝ်မၢၵ်ႇၵွင်ႈဢွၵ်ႇတီႈႁူင်းယႃဝဵင်းလိူဝ်ႇ ယွၼ်ႉဝႃႈတီႈၼၼ်ႈၼၼ်ႉ မၼ်းမီး ႁွင်ႈၽႃႇတတ်းပွတ်ႇၵမ်းသိုဝ်ႇလႄႈ မေႃယႃၾၢႆႇပွတ်ႇၵေႃႈမီးဝႆႉ။ တေႃႈလဵဝ်သမ်ႉ ယူႇတီႈမေႃယႃၶဝ် တီႈသီႇပေႃႉတႄႉ တိုၵ်ႉလၢင်ႉႁွႆးၸဵပ်း ၸဵတ်ႉပၼ်ႁွႆးမၢၵ်ႇၵွင်ႈၼၼ်ႉ” ဝႃႈၼႆ။

သိုပ်ႇလၢတ်ႈဝႃႈ လိူဝ်ၼၼ်ႉ ၸၢႆးမူဝ် ဢၼ်ၺႃးယိုဝ်းၼၼ်ႉၵေႃႈ လီၶိုၼ်ႈမႃးယဝ်ႉ။ မၼ်းၸၢႆးၼႆႉ တိူဝ်ႉ ၸၢၵ်ႇမၢၵ်ႇၵွင်ႈ တီႈပဵမ်ႉသေ ၽၢတ်ႈတိူဝ်ႉပႃးမိုဝ်းၾၢႆႇၶႂႃ မၢတ်ႇၸဵပ်းသွင်တီႈ” ဝႃႈၼႆ။

တေႃႈလဵဝ် ၵူၼ်းပၢႆႈၽေးသိုၵ်း ဢၼ်လႆႈယူတ်းယႃတူဝ် တီႈႁူင်းယႃသီႇပေႃႉၼၼ်ႉ ပဵၼ် လုင်းၸၢႆးၸၢမ်ႇထုၼ်း ၵူၼ်းဝၢၼ်ႈပၢင်လူင်၊ ၸၢႆးမူဝ် ၵူၼ်းဝၢၼ်ႈပၢင်လူင် လႄႈ လုင်းၸၢႆးၺုၼ်ႉ ၵူၼ်းဝၢၼ်ႈပၢင်ႁၢတ်ႇ သမ်ႉ ပဵၼ်မွင် ၶေႃႈသေ လႆႈယူတ်းယႃ မိူၼ်ၵၼ်။ တင်း 3 ၵေႃႉၼႆႉ ပဵၼ်ၵူၼ်းမိူင်း ၼမ်ႉတူႈ။ ၵဵဝ်ႇလူၺ်ႈ ၵႃႈယူတ်း ယႃတႄႉ ယူႇတီႈႁူင်းယႃ ၸႄႈဝဵင်းသီႇပေႃႉ ဢဝ်ပုၼ်ႈၽွၼ်းသေ ယူတ်းယႃပၼ် လၢႆလၢႆ ဢမ်ႇလႆႈသဵင်ႈ ငိုၼ်းသင် ဝႃႈၼႆ။

ၼႂ်းၸႄႈဝဵင်းၼမ်ႉတူႈ မီးသိုၵ်းလၢႆမူႇလၢႆၸုမ်း သိုၵ်းမၢၼ်ႈ တင်းသိုၵ်း TNLA ၵေႃႈၵႆႉယိုဝ်းၵၼ်၊ သိုၵ်း TNLA တင်း SSPP ၵေႃႈ ယူႇယူႇယိုဝ်းၵၼ်၊ ယၢမ်းလဵဝ်သမ်ႉ သိုၵ်း TNLA တင်း SSPP ႁူမ်ႈၵၼ်သေ ပဵၼ်ပၢင်တိုၵ်းတင်း RCSS ဝႆႉလႄႈ ပၼ်ႁႃပၢင်တိုၵ်းသိုၵ်းသိူဝ် ထုင်ႉၼၼ်ႉ ႁဵတ်းႁႂ်ႈၵူၼ်းမိူင်းၼပ်ႉႁဵင် လႆႈပၢႆႈယၢၼ်ႁိူၼ်းယေးတီႈယူႇ။