တီႈဢိူင်ႇၼမ်ႉၽၵ်းၵႃ ၸိုင်ႈတႆးပွတ်းႁွင်ႇၼၼ်ႉ လုၵ်ႈဢွၼ်ႇၵႂႃႇၵဵပ်းမၢၵ်ႇပွမ်း မႃးလဵၼ်ႈလႄႈ တႅၵ်ႇတိူဝ်ႉ မၢတ်ႇၸဵပ်း 3 ၵေႃႉတၢႆထင်တီႈ ၵေႃႉၼိုင်ႈ ။

မိူဝ်ႈဝၼ်းတီႈ 3/2/2026 ယၢမ်းၵၢင်ဝၼ်း မၢၵ်ႇပွမ်းတႅၵ်ႇသႂ်ႇလုၵ်ႈဢွၼ်ႇ ၼႂ်းပွၵ်ႉ 3 ဝဵင်းၼမ်ႉၽၵ်းၵႃ ။

ၵူၼ်းပိုၼ်ႉတီႈလၢတ်ႈဝႃႈ – “ ၸိူဝ်းၶဝ်ၵႂႃႇဢဝ်မၢၵ်ႇပွမ်းတီႈလႂ်မႃးတႄႉဢမ်ႇလႆႈႁူႉ ။ ႁိမ်းႁွမ်းႁိူၼ်းၶဝ်တႄႉမီးတပ်ႉပၢင်သဝ်း သိုၵ်းၵဝ်ႈၵၢင်ႉယူႇတီႈၼိုင်ႈ ”- ဝႃႈၼႆ။

လုၵ်ႈဢွၼ်ႇ 4 ၵေႃႉၼႆႉ ပဵၼ်ပီႈၼွင်ႉၵၼ်မူတ်း။ ဢႃယုပႃႈတႂ်ႈ 10 ၶူပ်ႇတင်း 4 ၵေႃႉ ။ ဢၼ်မၢတ်ႇၸဵပ်း 3 ၵေႃႉၼၼ်ႉတႄႉ ႁၢမ်တူဝ်သူင်ႇဝႆႉႁူင်းယႃ သိုၵ်းၵဝ်ႈၵၢင်ႉ တီႈဝဵင်းသႅၼ်ဝီယဝ်ႉ- လႆႈႁူႉၼင်ႇၼႆ ။

ဝဵႀ်းၼမ်ႉၽၵ်းၵႃၼႆႉ ၽွင်းပၢင်တိုၵ်း 1027 ၼၼ်ႉ သိုၵ်းၶၢင် KIA ယိုတ်းလႆႈဝႆႉ တီႈသိုၵ်းမၢၼ်ႈ ၽွင်းႁူဝ်ပီ 2024 သေပၼ်ႇၵၢၼ်ၽွင်းငမ်းႁၵ်းၶဝ်ဝႆႉ။ ၼႂ်းၶၢဝ်းတၢင်း 2 ပီၼႆႉ တီႈဝဵင်းၼမ်ႉၽၵ်းၵႃၼႆႉ ပဵၼ်လွင်ႈမၢၵ်ႇတႅၵ်ႇၵႂႃႇ 6 ပွၵ်ႈ။ မီးၵူၼ်းမၢတ်ႇၸဵပ်း/လူႉတၢႆၵႂႃႇ 16 ၵေႃႉ။ ၼႂ်းၼၼ်ႉပဵၼ်လုၵ်ႈဢွၼ်ႇ 9 ၵေႃႉ။ ၵမ်ႈၼမ် ပဵၼ်ဢၼ်ၵႂႃႇၵဵပ်းမၢၵ်ႇ(ၵိုတ်းၶၢင်ႉၽွင်းၵၢင်တိုၵ်း) ၼၼ်ႉမႃးတႅၵ်ႇတီႈႁိူၼ်း- ၼႆ ၶၢဝ်ႇၶၢင် KNG ၵေႃႈပိုၼ်ၽၢဝ်ႇဝႆႉၼင်ႇၼႆ။

တီႈၼမ်ႉၽၵ်းၵႃၼႆႉ ယၢမ်းလဵဝ် ၼွၵ်ႈလိူဝ် KIA ၽွင်းငမ်းဝႆႉယဝ်ႉ ၸိူဝ်းပဵၼ်တပ်ႉသိုၵ်းၵဝ်ႈၵၢင်ႉ MNDAA လႄႈ သိုၵ်းတဢၢင်း TNLA ၶဝ်ၵေႃႈ ယူႇသဝ်းတူင်ႉၼိုင်ဝႆႉ။

တီႈမိူင်းမၢၼ်ႈၼႆႉ တႄႇပီ 2021 ဝၢႆးလင်သိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်းမႃးၼႆႉ မၢၵ်ႇပွမ်းၵႆႉတႅၵ်ႇ ၵူၼ်းမၢတ်ႇၸဵပ်းလူႉတၢႆယွၼ်ႉမၢၵ်ႇၵွင်ႈၸိုၼ်းယၢမ်းၼမ်လိူဝ်ႁႅင်း။ ၼႂ်းပီ 2025 ၼႆႉၵူၺ်း ဢမ်ႇယွမ်း 500 ၵေႃႉ။ ၼႂ်းၼၼ်ႉ မိူင်းတႆးပႃး 103 ၵေႃႉ။ ၵူၼ်းမၢတ်ႇၸဵပ်းလူႉတၢႆယွၼ်ႉမၢၵ်ႇမႅင်းလႄႈမၢၵ်ႇပွမ်း ႁူဝ်ပၢၵ်ႇ 25 ၵေႃႉၼႆႉပဵၼ်လုၵ်ႈဢွၼ်ႇ ၼႆ ၸုမ်းၸၢတ်ႈၸိုင်ႈလုမ်ႈၾႃႉ UNICEF တႅမ်ႈတၢင်ႇဝႆႉၼင်ႇၼႆ။

“ပေႃးၵႂႃႇၼႂ်းၼႃႈလိၼ်ဢၼ်ယၢမ်ႈပဵၼ်ပၢင်တိုၵ်းမႃးၼၼ်ႉၸိုင် ၸၢင်ႈလႆႈထူပ်းႁၼ် မၢၵ်ႇၵွင်ႈၸိုၼ်းယၢမ်းလဵၵ်ႉယႂ်ႇ ဢၼ်ၸၢင်ႈတႅၵ်ႇၽူင်ႉပဵၼ်ၽေး ဢမ်ႇႁၢင်ႉ။

မၢၵ်ႇၵွင်ႈၸိုၼ်းယၢမ်းၸိူဝ်းၼႆႉ ဢမ်ႇၸႂ်ႈမဵဝ်းလီယိပ်းလီတိူဝ်ႉ။ တိုၼ်းဝႃႈယႃႇၶဝ်ႈၸမ်လႃးလႃး။ ဢမ်ႇသၢင်ႇထုၵ်ႇသေပေႃးမၼ်းတႅၵ်ႇၽူင်ႉၸိုင် ၸၢင်ႈမၢတ်ႇၸဵပ်းႁၢဝ်ႈႁႅင်း ဢမ်ႇၼၼ် ၸၢင်ႈထိုင်တၢႆလူးၵွၼ်ႇ ။

ၵွပ်ႈၼႆ ပေႃးႁၼ်မႅၼ်ႈမၢၵ်ႇမိုဝ်ႉၸိုၼ်းယၢမ်းၸိူဝ်းဝႃႈမႃးၸိူဝ်းၼႆႉၼႆၸိုင်
-ယႃႇၶဝ်ႈၸမ်
-ယႃႇၵႂႃႇတိူဝ်ႉၵႂႃႇၵဵပ်း
-ႁိမ်းႁွမ်းၸိူဝ်းၼၼ်ႉလႄႈ ပိုၼ်ႉတီႈဢၼ်ၸဝ်ႈၵဝ်ႇထၢင်ႇဝႃႈလႅပ်ႈတေမီးမၢၵ်ႇထႅင်ႈယူႇၼႆၸိူဝ်းၼၼ်ႉ ႁႂ်ႈငိူင်ႉဝႄႈ -ယႃႇပေၵႂႃႇၵၢႆၸမ်။
-ႁႂ်ႈသူင်ႇၶၢဝ်ႇလၢတ်ႈၼေၵူၼ်းႁိမ်းႁွမ်းလႄႈၽူႈမီးပုၼ်ႈၽွၼ်းဝႃႈ တီႈလႂ်မီးမၢၵ်ႇ လႄႈ ၸၢင်ႈမီးၽေး။”