ၸဝ်ႈၼႃႈတီႈပလိၵ်ႈထႆး ႁူမ်ႈၵၼ်လူင်းပိုၼ်ႉတီႈ ၵူတ်ႇထတ်းတီႉၺွပ်းႁႅင်းၵၢၼ်ယၢၼ်မိူင်း ၶဝ်ႈမိူင်းၽိတ်းပၵ်းပိူင်မၢႆမီႈ တီႈလမ်းပုၼ်း တႆးၵေႃႉဢမ်ႇမီးဝႂ်ၵပ်းတူဝ်ၺႃးတီႉယဵတ်ႈၶွၵ်ႈ။

ႁူဝ်လိူၼ် သႅပ်ႊထႅမ်ႊၿိူဝ်ႊ 2018 မႃးၼႆႉ သိုဝ်ႇၶၢဝ်ႇ T News ပိုၼ်ၽၢဝ်ႇဝႃႈ – ၸဝ်ႈၼႃႈတီႈပလိၵ်ႈ၊ ၾၢႆႇၸတ်းႁႃၵၢၼ်၊ ၾၢႆႇၵူတ်ႇထတ်းၵူၼ်းၶဝ်ႈမိူင်းလႄႈ ၾၢႆႇၵဵဝ်ႇၶွင်ႈႁူမ်ႈၵၼ်လူင်းပိုၼ်ႉတီႈ ၵူတ်ႇထတ်းလွင်ႈလွတ်ႈၽေးၼိမ်သဝ်းလႄႈ ႁႅင်း ၵၢၼ်ယၢၼ်မိူင်းၽိတ်းပၵ်းပိူင်မၢႆမီႈ ၼႂ်းဝဵင်းလမ်းပုၼ်း 3 တီႈ မိူၼ်ၼင်ႇ တီႈႁူင်း ၵၢၼ် လမ်းပုၼ်းၽတ်းထၼႃး၊ ဝိဝတ်ႊ ၽႃႊၼိတ်ႊ၊ လမ်းပုၼ်းၶူၼ်သူင်ႇ ၸိူဝ်းၼႆႉ။

တႆးၵႂႃႇႁႃႁဵတ်းၵၢၼ်မိူင်းထႆး ၸိူဝ်းၺႃးတီႉၼၼ်ႉ – ၸၢႆးသႅင် ဢႃယု 24ပီ၊ ၸၢႆးပီး ဢႃယု 22 ပီ၊ ၸၢႆးမူး ဢႃယု 20 ပီ၊ ၼၢင်းယဵၼ်ႇ ဢႃယု 18 ပီ၊ ၸၢႆးၼၢႆႇ ဢႃယု 36 ပီ၊ ၸၢႆးၵျေႃႇလ ဢႃယု 25ပီ ၸိူဝ်းၼႆႉ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈ HRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ပီႈၼွင်ႉႁဝ်းၶႃႈ တေၵႂႃႇတီႈလႂ်တၢင်းလႂ်သေဢမ်ႇဝႃႈ ႁဝ်းၶႃႈလူဝ်ႇဢဝ်ဝတ်းဝႂ် ၸပ်းတူဝ်ဝႆႉတႃႇသေႇ ပေႃးၸဝ်ႈၼႃႈတီႈၶဝ်ယွၼ်းတူၺ်းသေႁဝ်းဢမ်ႇၼႄလႆႈၵမ်းလဵဝ်ၼၼ်ႉ ႁဝ်းမီးတၢင်းၽိတ်းယဝ်ႉ ပေႃးၸဝ်ႈၼႃႈတီႈၶဝ်တီႉၺွပ်းၵႂႃႇႁူင်းပလိၵ်ႈၼႆ ႁႂ်ႈပေႃႈမႄႈပီႈၼွင်ႉဢဝ်ဝတ်းႁဝ်း ၼၼ်ႉ ၵႂႃႇၼႄ တေၸၢင်ႈၺႃးမႂ်ငိုၼ်းဢမ်ႇပူၼ်ႉ 1,000 ၿၢတ်ႇ ” ဝႃႈၼႆ

ၼႂ်းပီ 2018 ၼႆႉၸဝ်ႈၼႃႈတီႈၾၢႆႇႁႅင်းၵၢၼ် လူင်ပွင်ၸိုင်ႈမိူင်းထႆး တမ်းဝၢင်းၽႅၼ်ၵၢၼ် သၢမ်ၶၵ်ႉတွၼ်ႈ တႃႇလူင်းၵူတ်ႇ  ထတ်းႁႅင်းၵၢၼ်ယၢၼ်မိူင်းႁၢဝ်ႈႁႅင်း တွၼ်ႈ 1. ဝၼ်းတီႈ 1 -15/07/2018 ၊ ၶၵ်ႉတွၼ်ႈတီႈ 2. ဝၼ်းတီႈ 1 -15/ 08/ 2018 ၊ ၶၵ်ႉတွၼ်ႈတီႈ 3. ဝၼ်းတီႈ 1 -15/09/2018 သေတမ်းဝၢင်းၽႅၼ်ၵၢၼ် ၵူတ်ႇထတ်းတီႉၺွပ်းႁႅင်းၵၢၼ်ဢမ်ႇမႅၼ်ႈမၢႆမီႈ။