Saturday, May 18, 2024

ၼမ်ႉယၢဝ်ၼွင်းထူမ်ႈ ၾၢႆႇတူၵ်းလႃႈသဵဝ်ႈ ၵူၼ်းဝၢၼ်ႈ 100 လႆႈပၢႆႈ

Must read

ၾူၼ်တူၵ်းထပ်းၵၼ်လၢႆဝၼ်းသေ ၼမ်ႉႁူၺ်ႈၼမ်ႉပႃႇလႆ၊ မႄႈၼမ်ႉယၢဝ် ၼွင်းၶိုၼ်ႈ ႁၢဝ်ႈႁႅင်း လႄႈႁဵတ်းႁႂ်ႈၵူၼ်း ဝၢၼ်ႈ ၸိူဝ်းယူႇၾၢႆႇတူၵ်းလႃႈသဵဝ်ႈ ၺႃးၽေးၼမ်ႉထူမ်ႈ။

- Subscription -

တႄႇဢဝ် ႁူဝ်လိူၼ်သႅပ်ႊထႅမ်ႊၿိူဝ်ႊ 2018 ၼႆႉမႃး ၵူၼ်းဝၢၼ်ႈဢီႇၼၢႆး ဢိူင်ႇဢီႇၼၢႆး။ ဢၼ်မီးၾၢႆႇတူၵ်းဝဵင်းလႃႈ သဵဝ်ႈ ၸိုင်ႈတႆးပွတ်းႁွင်ႇၼၼ်ႉ ၺႃးၽေးၼမ်ႉထူမ်ႈ ၵူၼ်းဝၢၼ်ႈ 124 ၵေႃႉ လႆႈဢွၼ်ၵၼ်ပၢႆႈၽေးၼမ်ႉထူမ်ႈၵႂႃႇ သွၼ်ႈဝႆႉတီႈဝတ်ႉဢီႇၼၢႆး ဝႃႈၼႆ။

ၸၢႆးယဵၼ်ႇ ၽူႈၵွၼ်းဝၢၼ်ႈဢီႇၼၢႆး လၢတ်ႈတီႈၽူႈတွႆႇႁွၵ်ႈဝႃႈ “ ၼမ်ႉၼႆႉတႄႇၼွင်း မိူဝ်ႈဝၼ်းတီႈ 29 လိူၼ် ဢေႃႊ ၵတ်ႊသ်မႃး ထိုင်ဝၼ်းတီႈ 1 ၵေႃႈထူမ်ႈထိုင်ႁိူၼ်းယဝ်ႉလႄႈ ၸင်ႇဢွၼ် ၵၼ် ၶၢႆႉမႃးယူႇတီႈသုင်။ မိူဝ်ႈၼႆႉ ဝၼ်းတီႈ 5 ယၢမ်းၵၢင်ၼႂ် ၼမ်ႉယွမ်းလူင်းလႄႈ ၵူၼ်းဝၢၼ်ႈႁဝ်း ၸင်ႇဢွၼ်ၵၼ် ပွၵ်ႈႁိူၼ်း ယေးၽႂ်မၼ်း။ တီႈၺႃးၽေးၼမ်ႉတႄႉ တီႈၶူင်ႈတီႈယၢၼ်းႁိမ်းၾင်ႇၼမ်ႉယၢဝ်ၼၼ်ႉၶႃႈဢေႃႈ” ဝႃႈၼႆ။

လင်ႁိူၼ်း ၼႂ်းဝၢၼ်ႈဢီႇၼၢႆး ဢၼ်ၺႃးၼမ်ႉထူမ်ႈ မီး 28 လင်ၶႃးႁိူၼ်း။ ႁူဝ်ၵူၼ်း 124 ၵေႃႉ သူၼ်ႁႆႈၼႃး ၵူၼ်းမိူင်း ဢၼ်ၺႃးၼမ်ႉထူမ်ႈၼၼ်ႉ တင်းမူတ်း 102.16 ဢေႊၶိူဝ်ႊ ဝႃႈၼႆ။

ၸၢႆးယဵၼ်ႇ လၢတ်ႈဝႃႈ “ တေႃႇထိုင်ယၢမ်းလဵဝ် ၼမ်ႉၼႆႉ ပႆႇယွမ်းလူင်းတႄႉတႄႉ၊ တိုၵ်ႉထူမ်ႈၸွမ်းတူင်ႈႁႆႈတူင်ႈ ၼႃးယူႇ။ ဢၼ်ယွမ်းလူင်းတႄႉ ၸွမ်းၼႂ်းဝၢၼ်ႈၵမ်ႈၽွင်ႈ။ တီႈသဵၼ်ႈတၢင်း ၼမ်ႉတူႈ – လႃႈသဵဝ်ႈၵေႃႈ တေႃႈလဵဝ် တႄႉ ၵႂႃႇမႃးလႆႈၶိုၼ်းယဝ်ႉ။ ၵူၺ်းၵႃႈ ၼႂ်းသူၼ်ၼႂ်းၼႃးတႄႉ တိုၵ်ႉထူမ်ႈယူႇ ထိုင်မႃးတေႃႈလဵဝ် တေလႆႈဝႃႈ ၼမ်ႉ ထူမ်ႈၼႆႉ မီးၵႂႃႇမွၵ်ႈ 8 ဝၼ်းယဝ်ႉ” ဝႃႈၼႆ။

ဝၢၼ်ႈဢီႇၼၢႆးၼႆႉ ယူႇၼႂ်းဢိူင်ႇဢီႇၼၢႆး ၼႂ်းၸႄႈဝဵင်းလႃႈသဵဝ်ႈ တင်းမူတ်း မီးလင်ႁိူၼ်း 162 လင် ဝႃႈၼႆ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း