ဢိင်ၼိူဝ်သိုၵ်း TNLA တင်း RCSS ပဵၼ်ပၢင်တိုၵ်းၵၼ်သေ ၵူၼ်းမိူင်း ၼႂ်းၸႄႈဝဵင်းၼမ်ႉတူႈ 2,206 ၵေႃႉ ဢွၼ်ၵၼ် ပၢႆႈၽေးသိုၵ်း ႁွတ်ႈၽႅဝ်ဝႆႉ တီႈၼႂ်းဢိူင်ႇဝၢၼ်ႈၸၢမ်/ မိူင်းမူႉ တင်း ၼႂ်းဝဵင်းသီႇပေႃႉ ဝႃႈၼႆ။

ဝၼ်းတီႈ 04/09/2018 ယူႇတီႈၶွမ်ႊမတီႊၾၢႆႇၸွႆႈထႅမ်ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ လႆႈႁူမ်ႈသဵၼ်ႈသၢႆမၢႆ ၵူၼ်းပၢႆႈၽေးသိုၵ်း ဢၼ်မႃးသွၼ်ႈဝႆႉတီႈ ၵျွင်းႁွင်ႇဝၢၼ်ႈၸၢမ်၊ ၵျွင်းၵုင်းၽြႃးဝၢၼ်ႈၸၢမ်၊ ဝတ်ႉၵမ်မထၢၼ်း ဝၢၼ်ႈၸၢမ်၊ ႁူင်းသဝ်းTEC ဝၢၼ်ႈၸၢမ်၊ တီႈဝတ်ႉဝိႁၢရ် မိူင်းမူႉ၊ ဝတ်ႉပၢင်သပေႇ၊ ဝတ်ႉမၢၼ်ႈလီႈ ၼႂ်းၸႄႈဝဵင်းၼမ်ႉတူႈ။ လိူဝ်ၼၼ်ႉ ၼႂ်းၸႄႈဝဵင်းသီႇပေႃႉ တီႈဢိူင်ႇတႃႈတေႈ တင်း ဝတ်ႉဢွင်ႇမင်ႇၵလႃႇၽူဝ်းတေႃႇ ၸဵမ်ၸိူဝ်းၼႆႉ ဝႃႈၼႆ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈၶွမ်ႊမတီႊၾၢႆႇၸွႆႈထႅမ် ၵူၼ်းပၢႆႈၽေးသိုၵ်း ၼႂ်းၸႄႈဝဵင်းၼမ်ႉတူႈ လၢတ်ႈတီႈ ၽူႈ တွႆႇႁွၵ်ႈဝႃႈ “ သဵၼ်ႈသၢႆမၢႆၵူၼ်းပၢႆႈၽေး ဢၼ်ႁဝ်းၶႃႈ လႆႈၵဵပ်းဝႆႉၼႂ်းၸႄႈဝဵင်းၼမ်ႉတူႈႁဝ်းတႄႉ တင်းမူတ်းမီး 1,814 ၵေႃႉ၊ လင်ႁိူၼ်း 525 လင်၊ ၸၢႆး 799 ၵေႃႉလႄႈ ယိင်း 1,015 ၵေႃႉ” ဝႃႈၼႆ။

ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ် တီႈၸႄႈဝဵင်းသီႇပေႃႉသမ်ႉ တင်းမူတ်းမီး 392 ၵေႃႉ ဝႃႈၼႆ။

ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေးသိုၵ်း ဢၼ် ပၢႆႈၽေးမႃး တီႈတၢင်းသီႇပေႃႉႁဝ်းၶႃႈၼႆႉ တေပဵၼ် ဝၢၼ်ႈပၢင်ႁၢတ်ႇ တင်း ဝၢၼ်ႈပၢင်လူင်။ တီႈဢိူင်ႇတႃႈတေႈ ႁဝ်းၶႃႈတႄႉ မီးဝႆႉႁူဝ်ၵူၼ်း 114 ၵေႃႉ၊ တီႈဝတ်ႉဢွင်ႇမင်ႇၵလႃႇၽူဝ်းတေႃႇသမ်ႉ မီး 278 ၵေႃႉ” ဝႃႈၼႆ။

မိူဝ်ႈဝႃး ဝၼ်းတီႈ 04/09/2018 ၼႆႉၵေႃႈ သိုၵ်းဢူၺ်းလီပွတ်းႁွင်ႇ တင်း သိုၵ်း RCSS လႆႈသိုပ်ႇပဵၼ်ပၢင် တိုၵ်းၵၼ်ထႅင်ႈ ႁၢဝ်ႈႁႅင်း တၢင်းပွတ်းဝၢၼ်ႈပၢင်လူင်လႄႈ ဝၢၼ်ႈပၢင်ၵၢႆႇ ၼႂ်းၸႄႈဝဵင်းၼမ်ႉတူႈ ဝႃႈၼႆ။