ၵူၼ်းမိူင်းတူၼ် ၵေႃႉၼိုင်ႈ ၸႂ်လမ် ထဵင်မေႃးၵၼ်တင်း မေးၼၢင်းၸဝ်ႈၵဝ်ႇသေ ဢဝ်မိတ်ႈ ၾၼ်းတႅင်းလုၵ်ႈမေး ၸဝ်ႈၵဝ်ႇ တၢႆထင်တီႈ။
ဝၼ်းတီႈ 31/08/2018 ယၢမ်းၵၢင်ၶမ်ႈ ၵျႃႇတဵင်း (ၸၢဝ်းလႃးႁူႇ) ဢႃယု 20 ပီ ၽိတ်းမေႃးၵၼ်တင်း ၵေႃႉပဵၼ်မေး ၼၢင်း ၸိုဝ်ႈၼႃႇဢေႃးတိ ဢႃယု 18 ပီသေ ၸႂ်လမ်ဢဝ်မိတ်ႈၾၼ်းတႅင်း ၵေႃႉပဵၼ်မေး ႁူမ်ႈပႃးလုၵ်ႈၸၢႆးဢွၼ်ႇ ဢႃယု 11 လိူၼ် တီႈၼႂ်းႁိူၼ်းမၼ်းၸၢႆး ဝၢၼ်ႈ 11 လၵ်း (ႁွင်ႉ) ဝၢၼ်ႈၼႃးၶၢမ် ၼႂ်းၵႄႈမိူင်းတူၼ် – မိူင်းသၢတ်ႇ ၼႂ်းၸႄႈဝဵင်းမိူင်း တူၼ် ၸိုင်ႈတႆးပွတ်း ဢွၵ်ႇၶူင်း။
ၸၢႆးသၢမ် ၵူၼ်းမိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ “ ၸႂ်ႈၶႃႈဢေႃႈ ဝၢၼ်ႈၶဝ်ၼၼ်ႉ ယၢၼ်ၵႆ မိူင်းတူၼ် မွၵ်ႈ 11 လၵ်း။ ႁဝ်းၶႃႈ ႁွင်ႉဝၢၼ်ႈ 11 လၵ်း။ ဢၼ်ႁဝ်းၶႃႈ လႆႈငိၼ်းတႄႉ မၼ်းၸၢႆးဢမ်ႇမဝ်းယႃႈၼႆဝႃႇ။ ယွၼ်ႉၶႃၽူဝ် မေးၽိတ်းမေႃးၵၼ်သေ မၼ်းၸၢႆးသမ်ႉၸႂ်လမ် ဢဝ်မိတ်ႈၾၼ်းသႂ်ႇၶႃမႄႈလုၵ်ႈ တၢႆထင်တီႈၼႂ်းႁိူၼ်းၶႃႈ။ ၵမ်းၼၼ်ႉ မၼ်းၸၢႆး ၶိုၼ်းၶႃႈတူဝ်မၼ်းၶိုၼ်း ဢမ်ႇတၼ်းတၢႆ၊ ၵူၼ်းဝၢၼ်ႈၵႂႃႇလၢတ်ႈပလိၵ်ႈ တၼ်းမႃးၸွႆႈလႆႈလႄႈ ထိုင်တီႈလႆႈမၢတ်ႇၸဵပ်း ၵူၺ်း မၼ်းၸၢႆး ဢဝ်မိတ်ႈထိူဝ်ၶေႃး၊ တႅင်းပုမ်မၼ်းၶိုၼ်း” ဝႃႈၼႆ။
မိူဝ်ႈပူၼ်ႉမႃး 4-5 ဝၼ်းၼၼ်ႉ ၵျႃႇတဵင်း တင်း မေးၼၢင်းမၼ်းၸၢႆး ၼႃႇဢေႃးတိၼႆႉ ၽိတ်းမေႃးၵၼ်သေ တူဝ် ၵျႃႇတဵင်းသမ်ႉ ပၢႆႈၵႂႃႇယူႇၼႂ်းႁႆႈ။ ထိုင်မႃး ဝၼ်းတီႈ 31 သမ်ႉပွၵ်ႈမႃး ႁိူၼ်းၶိုၼ်းသေ ၶိုၼ်းသိုပ်ႇၽိတ်း မေႃးၵၼ်ထႅင်ႈ ထိုင်တီႈပေႃးလႆႈ ၶႃႈၵၼ်တၢႆထင်တီႈ ဝႃႈၼႆ။
ယၢမ်းလဵဝ် ၵျႃႇတဵင်းၼႆႉ သူင်ႇယူတ်းယႃတူဝ် ဝႆႉတီႈႁူင်းယႃၵူၼ်းမိူင်း ၸႄႈဝဵင်းမိူင်းတူၼ်။ ယူႇတီႈပလိၵ်ႈ မၢၼ်ႈ ပိုတ်ႇဢမူႉၶၻီႊ ဢဝ်လိူင်ႈလၢဝ်း မၼ်းၸၢႆး “လွင်ႈၶႃႈႁႅမ်ၵူၼ်း၊ ပႃးၸဵမ်တင်ႈၸႂ် ၶႃႈႁႅမ်တူဝ်ၵဝ်ႇ”- ဝႆႉ တီႈ လုမ်းပလိၵ်ႈၸႄႈဝဵင်းမိူင်းတူၼ် ဝႃႈၼႆ။
ဝၢၼ်ႈ 11 လၵ်း(ႁွင်ႉ) ဝၢၼ်ႈၼႃးၶၢမ်ၼႆႉ ယူႇၼႂ်းၵႄႈ မိူင်းတူၼ် – မိူင်းသၢတ်ႇ ပဵၼ်ဝၢၼ်ႈၸၢဝ်းလႃႈႁူႇ ၶဝ်ယူႇသဝ်း ဝႃႈၼႆ။