ၸုမ်းသိုၵ်းဢူၺ်းလီပွတ်းႁွင်ႇ လႄႈ သိုၵ်း RCSS/SSA ပဵၼ်ပၢင်တိုၵ်းၵၼ် လၢႆၵမ်းထပ်းၵၼ်လႄႈ ၵူၼ်းမိူင်းမွၵ်ႈ 3,000 လႆႈဢွၼ်ၵၼ် ပၢႆႈဢွၵ်ႇယၢၼ်ႁိူၼ်းယေး ဝႃႈၼႆ။

ဝၼ်းတီႈ 02/09/2018 ၵူၼ်းမိူင်းတၢင်းဝၢၼ်ႈ ၼမ်ႉသီႇလိၼ်း၊ ဝၢၼ်ႈမႂ်ႇ၊ ၼႃးပုင်ႇ၊ သၢမ်ၶႃ၊ ၵွင်းႁုင်း၊ ၼွင်ငိုၼ်း၊ ပၢင်လူင်၊ ဝၢၼ်ႈၸၢမ်၊ ပၢင်ႁၢတ်ႇလႄႈ လူင်မိူတ်ႇ ၸဵမ်ၸိူဝ်းၼႆႉ ဢွၼ်ၵၼ်ပၢႆႈၽေးသိုၵ်းမႃးႁွတ်ႈၽႅဝ်ႈဝႆႉတီႈ ဢိူင်ႇ ဝၢၼ်ႈၸၢမ် မိူင်းမူႉ ၼႂ်းၸႄႈ ဝဵင်းၼမ်ႉတူႈ ႁူဝ်ၵူၼ်းမီး 1,071 ၵေႃႉ၊ ပၢႆႈၵႂႃႇတၢင်းသီႇပေႃႉ 1,000 ပၢႆၼင်ႇၵဝ်ႇ။

လုင်းၸၢႆးပႃႉၺၢၼ်ႇ ၵႅမ်ႁူဝ်ပဝ်ႈ ၸုမ်းၸွႆႈထႅမ်ၵူၼ်းထူပ်းၽေးသိုၵ်း ၸႄႈဝဵင်းၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းပၢႆႈၽေး တီႈဝၢၼ်ႈၸၢမ် မိူင်းမူႉၼႆႉ ဢမ်ႇၸၢင်ႈပၢႆႈၵႂႃႇတၢင်းလႂ်ထႅင်ႈယဝ်ႉ တေၵႂႃႇတၢင်းသီႇ ပေႃႉၵေႃႈ ၸွမ်း သဵၼ်ႈတၢင်းၼၼ်ႉ မီးသိုၵ်းမူၵ်းယူႇဝႆႉ။ ပေႃးၵႂႃႇတၢင်းလႃႈသဵဝ်ႈၵေႃႈ ၼမ်ႉၼွင်းထူမ်ႈသဵၼ်ႈ တၢင်းတီႈဢီႇၼၢႆး၊ ရူတ်ႉၵႃး တေႃႉသူင်ႇၵူၼ်း ဢမ်ႇၸၢင်ႈၵႂႃႇမႃးလႆႈ တေႃႈလဵဝ် ၵူၼ်းပၢႆႈၽေးႁဝ်းၶႃႈ ဢွၼ်ၵၼ်မူၵ်းဝႆႉတီႈ ၼႆႈၵူၺ်းၶႃႈ။ သင်ဝႃႈ မၢၵ်ႇၵွင်ႈတႅၵ်ႇထႅင်ႈၼႆ ဢမ်ႇႁူႉဝႃႈ တေလႅၼ်ႈတၢင်းလႂ်” ဝႃႈၼႆ။

ႁူဝ်ၵူၼ်း 1,071 ၵေႃႉ ဢၼ်ပၢႆႈၵႂႃႇသွၼ်ႈဝႆႉတီႈ ဢိူင်ႇဝၢၼ်ႈၸၢမ် မိူင်းမူႉၼၼ်ႉ မီးတီႈဝတ်ႉၵျွင်းႁွင်ႇ 409 ၵေႃႉ။ ၼႂ်းၼၼ်ႉ ၵူၼ်းတႃးမွတ်ႇ ပႃးၵေႃႉၼိုင်ႈလႄႈ ၵူၼ်းတုၵ်ႉၶီႉတ ၵေႃႉၼိုင်ႈ။ တီႈၵျွင်းၵုင်းၽြႃး မၢၼ်ႈၸၢမ် သမ်ႉ မီး 104 ၵေႃႉ။ တီႈဝတ်ႉၵမ်မထၢၼ်း ဝၢၼ်ႈၸၢမ် မီး 129 ၵေႃႉ။ ၼႂ်းၼၼ်ႉ ပႃးၵူၼ်းတုၵ်ႉၶီႉတ 3 ၵေႃႉ။ ႁူင်းသဝ်း TEC ဝၢၼ်ႈ ၸၢမ် 139 ၵေႃႉ၊ တီႈဝတ်ႉဝိႁၢရ် မိူင်းမူႉ 290 ၵေႃႉ ႁူမ်ႈတင်းမူတ်း မီး 1,071 ၵေႃႉ ဝႃႈၼႆ။

လိူဝ်ၼၼ်ႉ ၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်တၢင်း သီႇပေႃႉဝတ်ႉပၢင်သပေႇသမ်ႉ မီး 456 ၵေႃႉ၊ ဝတ်ႉ မၢၼ်ႈလီႈ 422 ၵေႃႉ လႄႈ ဝတ်ႉဢွင်ႇမင်ႇၵလႃႇၽူဝ်းတေႃႇ 249 ၵေႃႉ ၸိူဝ်းၼႆႉ ဝႃႈၼႆ။

ၸၢႆးလၢဝ်သႅင် ၽူႈၼမ်းၼႂ်းပႃႇတီႇႁူဝ်သိူဝ် ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ “ တေႃႈလဵဝ် တီႈဝတ်ႉ ၽူဝ်း တေႃႇ ႁဝ်းၶႃႈတႄႉ ၵူၼ်းတဵမ်ၵႂႃႇယဝ်ႉ။ သင်ဝႃႈ ၵူၼ်းပၢႆႈၽေးသိုၵ်းႁဝ်း ႁွတ်ႈၽႅဝ်မႃးထႅင်ႈၼႆ ႁဝ်းၶႃႈ တေႁၢင်ႈ ႁႅၼ်းဝႆႉပၼ် တီႈဢိူင်ႇတႃႈတေႈ။ ၼႂ်းၵူၼ်းပၢႆႈၽေးသိုၵ်း ဢၼ်ႁွတ်ႈၽႅဝ်ဝႆႉတီႈသီႇပေႃႉၼႆႉသမ်ႉ ပႃးၵူၼ်းပဵၼ်မႃး ၸွမ်းၵေႃႉၼိုင်ႈ ပဵၼ်လုင်းၸၢႆးၺုၼ်ႉ ၸပ်းတၢင်းပဵၼ်မွင်ၶေႃႈသေ လႆႈသူင်ႇယူတ်းယႃတူဝ်ဝႆႉတီႈ ႁူင်းယႃ ၵူၼ်းမိူင်း ၸႄႈဝဵင်းသီႇပေႃႉဝႆႉယဝ်ႉ” ဝႃႈၼႆ။

ၼႂ်းၸႄႈဝဵင်းၼမ်ႉတူႈၼႆႉ သိုၵ်းလူင်ပွင်ၸိုင်ႈမၢၼ်ႈ တင်းသိုၵ်းၸုမ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ် ၸုမ်း ဢူၺ်းလီပွတ်းႁွင်ႇတင်း သိုၵ်း RCSS ပဵၼ်ပၢင်တိုၵ်းၵၼ်လႄႈ ၵူၼ်းမိူင်းလႆႈပၢႆႈ။ ၾၢႆႇသိုၵ်းလွႆပိုၼ်ၽၢဝ်ႇဝႃႈ ၼႂ်း ပၢင်တိုၵ်းၵူႈပၢင် ဢၼ်ယိုဝ်းတင်း RCSS ၼႂ်းၸႄႈဝဵင်းၼမ်ႉတူႈ ပႃးသိုၵ်း SSPP ၼႆသေတႃႉ ၾၢႆႇ SSPP တႄႉ ဢမ်ႇယိုၼ်ယၼ်။