Friday, March 29, 2024

ၵူၼ်းမိူင်းၵဵင်းတုင် လႆႈၶႂၢင်ႉပူၵ်းပၢႆႉတၢင်းၶဝ်ႈဢွၵ်ႇဝဵင်း ပႃးလိၵ်ႈတႆး တူဝ်မူၼ်း တင်းလိၵ်ႈတႆးၶိုၼ်

Must read

ၵူၼ်းမိူင်းၵဵင်းတုင် ႁူမ်ႈၵၼ် ဝၢင်းမၢၵ်ႇဢုတ်ႇငိုၼ်း/ မၢၵ်ႇဢုတ်ႇၶမ်း တႄႇပူၵ်းသဝ်ပၢႆႉတၢင်းၶဝ်ႈဢွၵ်ႇဝဵင်း 2 တီႈ ဝႃႈၼႆ။

- Subscription -

ဝၼ်းတီႈ 02/09/2018 ယၢမ်းၵၢင်ၼႂ် သင်ၶၸဝ်ႈ၊ ၵူၼ်းမိူင်း၊ မုၵ်ႉၸုမ်းပူၵ်းပွင်ၶိုၼ်းၶူဝ်းၶွင်ၵူၼ်းပိုၼ်ႉမိူင်း ၸႄႈ ဝဵင်းၵဵင်းတုင်၊ ၵေႃလိၵ်ႈလၢႆးလႄႈ ၾိင်ႈငႄႈတႆး၊ လုၵ်ႈႁဵၼ်းၸၼ်ႉၸွမ်၊ ႁူင်းႁဵၼ်းၸိူဝ်ႉၸၢတ်ႈ၊ မုၵ်ႉၸုမ်းထမ်ႇမ သိုၵ်ႇသႃ၊ ပႃႇတီႇႁူဝ်သိူဝ်၊ သိူဝ်ၽိူၵ်ႇ၊ ၵွင်ၸႆး၊ ၼူၵ်ႉယုင်းလႄႈ လုမ်းၵပ်းသၢၼ် RCSS ႁူမ်ႈၵၼ် ဝၢင်းမၢၵ်ႇဢုတ်ႇ ငိုၼ်း/ ၶမ်း ၵေႃႇသၢင်ႈပူၵ်းသဝ် ပၢႆႉတၢင်ႈၶဝ်ႈဢွၵ်ႇဝဵင်းၵဵင်းတုင်- တႃႈၶီႈလဵၵ်း တီႈၼိုင်ႈလႄႈ ၵဵင်းတုင် – တူၼ်ႈ တီး တီႈၼိုင်ႈ ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ဝႃႈၼႆ။

လုင်းၸၢႆးသၢမ်တိပ်ႉသိူဝ် ၵႅမ်ၽူႈၼမ်းၼႂ်းၶွမ်ႊမတီႊ မုၵ်ႉၸုမ်းပူၵ်းပွင်ၶိုၼ်း ၶူဝ်းၶွင်ၵူၼ်းပိုၼ်ႉမိူင်း ၸႄႈဝဵင်းၵဵင်း တုင် လၢတ်ႈတီႈၸုမ်းၶၢဝ်ႇၽူႈတွႆႇဝႃႈ “ ယူႇတီႈလူင်ပွင်ၸိုင်ႈမိူင်းတႆး ပၼ်ၶႂၢင်ႉလူင်းမႃး မိူဝ်ႈဝၼ်းတီႈ 17 လိူၼ်ဢေႃႊ ၵတ်ႊသ် ပူၼ်ႉမႃးၼႆႉၵူၺ်း။ ၽိုၼ်လိၵ်ႈတႄႉ တိုၵ်ႉမႃးထိုင်တီႈႁဝ်း မိူဝ်ႈႁၢင်လိူၼ်ဢေႃႊၵတ်ႊသ် ဝၼ်းတီႈ 31 ၼႆႉ။ ယွၼ်ႉၼၼ် ႁဝ်းၶႃႈ ႁူမ်ႈၵၼ် ဝၢင်းမၢၵ်ႇဢုတ်ႇသေ တႄႇႁဵတ်းသၢင်ႈၵႂႃႇၶႃႈယဝ်ႉ” ဝႃႈၼႆ။

တီႈပၢႆႉတၢင်းၶဝ်ႈဢွၵ်ႇဝဵင်းၵဵင်းတုင် 5 တီႈၼၼ်ႉ တေပူၵ်းတၢင်းၶဝ်ႈဢွၵ်ႇ ဝဵင်းၵဵင်းတုင် မိူၼ်ၼင်ႇ သဵၼ်ႈတၢင်း ၵဵင်းတုင် – တႃႈၶီႈလဵၵ်း တီႈၼိုင်ႈ၊ ၵဵင်းတုင် – တူၼ်ႈတီး တီႈၼိုင်ႈ၊ ၵဵင်းတုင် – မိူင်းလႃး တီႈၼိုင်ႈ၊ ၵဵင်းတုင် – မိူင်း ၶၢၵ်ႇ တီႈၼိုင်ႈလႄႈ ၵဵင်းတုင် – လွႆမူၺ်တီႈၼိုင်ႈ ဝႃႈၼႆ။

တီႈပၢႆႉတၢင်းၶဝ်ႈဢွၵ်ႇဝဵင်းၵဵင်းတုင်ၼၼ်ႉ တေတႅမ်ႈလိၵ်ႈသႂ်ႇဝႆႉ 3 ၽႃသႃ မိူၼ်ၼင်ႇ လိၵ်ႈတႆးတူဝ်မူၼ်း၊ လိၵ်ႈတႆးၶိုၼ် လႄႈ လိၵ်ႈမၢၼ်ႈ၊ ပၢႆႉၼိုင်ႈတီႈ တေတူၵ်းမႅၼ်ႈငိုၼ်း 50 သႅၼ်ပျႃး ဝႃႈၼႆ။

လုင်းၸၢႆးသၢမ်တိပ်ႉသိူဝ် လၢတ်ႈဝႃႈ “ ဢွၼ်တၢင်းသုတ်းတႄႉ တေႁဵတ်း 2 တီႈၼႆႉၵွၼ်ႇ။ ၵိုတ်းထႅင်ႈ 3 ဢွင်ႈတီႈ ၼၼ်ႉတႄႉ ဝၢႆးၼႆႉ ၸင်ႇတေသိုပ်ႇႁဵတ်းသၢင်ႈၵႂႃႇထႅင်ႈ။ လိူဝ်ၼၼ်ႉ သင်ဝႃႈ တႆးႁဝ်း ႁၵ်ႉပႅင်း ပဵၼ်ၼမ်ႉၼိုင်ႈ ၸႂ်လဵဝ်ၵၼ်ၼႆၸိုင် မၼ်းတိုၼ်းၶၢမ်ႈပူၼ်ႉလႆႈတၢင်းယၢပ်ႇၽိုတ်ႇ” ဝႃႈၼႆ။

ယူႇတီႈမုၵ်ႉၸုမ်းပူၵ်းပွင်ၶိုၼ်း ၶူဝ်းၶွင်ၵူၼ်းပိုၼ်ႉမိူင်း ၸႄႈဝဵင်းၵဵင်းတုင် တႅမ်ႈလိၵ်ႈထိုင် လူင်ပွင် ၸိုင်ႈမိူင်း တႆး မိူဝ်ႈၼႂ်းလိူၼ်ၵျုၼ်ႊ ပီ 2018 ၼၼ်ႉ ဝႃႈပၢႆႉတၢင်းၶဝ်ႈ/ဢွၵ်ႇ ဝဵင်းၵဵင်းတုင် တႃႇ 5 ဢွင်ႈတီႈၼၼ်ႉ ႁႂ်ႈပႃးလိၵ်ႈတႆး တူဝ်မူၼ်း တင်းလိၵ်ႈတႆးၶိုၼ် လႄႈ လိၵ်ႈမၢၼ်ႈ ႁႂ်ႈလူင်ပွင်ၸိုင်ႈမိူင်းတႆး ဢၼုၺၢတ်ႈ(ၶႂၢင်ႉ) ပၼ်ႁဵတ်းပၢႆႉမႂ်ႇ ဝႃႈၼႆ။

Photo FB – Sai Lat Mike

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း