ၼႂ်းၵိင်ႇၸႄႈဝဵင်းၵဵင်းတွင်း ၸႄႈဝဵင်းမိူင်းၼၢႆးၼၼ်ႉ ၽူႈၵွၼ်းဢိူင်ႇၵေႃႉၼိုင်ႈ ၺႃးၵူၼ်းဢမ်ႇႁူႉၾၢႆႇ ၶဝ်ႈယိုဝ်းတၢႆ ထင်တီႈၼႂ်းဝၢင်းႁိူၼ်း ဝႃႈၼႆ။

ဝၼ်းတီႈ 03/09/2018 ယၢမ်းၵၢင်ၼႂ် 6:30 မူင်း ၸၢႆးၸိုၼ်ႈလႅင်း(ႁွင့်) ၸၢႆးၵျႃႇပၢၼ်ႇ ၽူႈၵွၼ်းဢိူင်ႇၵုၼ်မူင်ႈ ၵိင်ႇ ၸႄႈဝဵင်းၵဵင်း တွင်း ၸႄႈဝဵင်းမိူင်းၼၢႆး ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်းၼၼ်ႉ ၺႃးၵူၼ်းဢမ်ႇႁူႉၾၢႆႇ ၶဝ်ႈယိုဝ်း ၼႂ်းဝၢင်းႁိူၼ်းမၼ်းၸၢႆးလႄႈ လႆႈလူႉတၢႆထင်တီႈၵႂႃႇ ဝႃႈၼႆ။

ၸၢႆးသိူဝ် ၵဵင်းတွင်း လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၼႆႉၵၢင်ၼႂ်ၸဝ်ႉ လုင်းႁဵင်လူင်းၵႂႃႇ တၵ်းၼမ်ႉ တီႈၼမ်ႉမေႃႇ ဢၼ်မီးၼႂ်းဝၢင်းႁိူၼ်း မီးၵူၼ်း 2 ၵေႃႉ ၶီႇရူတ်ႉၶိူင်ႈမႃး။ ၵေႃႉၼိုင်ႈပႂ်ႉတီႈရူတ်ႉ ၶိူင်ႈ။ ထႅင်ႈၵေႃႈၼိုင်ႈ ၶဝ်ႈၵႂႃႇယိုဝ်းလုင်းႁဵင်။ လုင်းႁဵင် ၺႃးယိုဝ်း 4-5 ၵမ်း ပိၼ်ႈလူမ်ႉသေ လူႉတၢႆၵႂႃႇထင်တီႈၵမ်းလဵဝ်” ဝႃႈၼႆ။

ၵဵဝ်ႇၵပ်းလွင်ႈၼႆႉ ယူႇတီႈၾၢႆႇၸဝ်ႈၼႃႈတီႈပလိၵ်ႈ ၵိင်ႇၸႄႈဝဵင်းၵဵင်းတွင်း လႆႈၼမ်းဢဝ်တူဝ်လုင်းႁဵင် ၸၢႆးၸိုၼ်ႈလႅင်းၼႆႉ ၵႂႃႇၵူတ်ႇထတ်းတူၺ်းတီႈႁူင်းယႃ ၵူၼ်းမိူင်းၵဵင်းတွင်း ဝႃႈၼႆ။

ၸၢႆးၸိုၼ်ႈလႅင်း ၽူႈၵွၼ်းဢိူင်ႇၵုၼ်မူင်ႈၼႆႉ ပဵၼ်ၵူၼ်းတူင်ႉၼိုင်ၼႂ်းတူင်ႇဝူင်းၵူၼ်းၵေႃႉၼိုင်ႈသေဢမ်ႇၵႃး ၵႆႉဢွၼ်ႁူဝ် ၵူၼ်းၼုမ်ႇတူင်ႉၼိုင်ယူႇတႃႇသေႇ။ လိူဝ်ၼၼ်ႉ မၼ်းၸၢႆးၵေႃႈ ယၢမ်ႈပဵၼ်ၶူးသွၼ်ၼႂ်းႁူင်းႁဵၼ်းလူင်ပွင်ၸိုင်ႈမႃး ဝႃႈၼႆ။

ပီႈၼွင်ႉၸမ်ၸႂ် ၸၢႆးၸိုၼ်ႈလႅင်း ၽူႈၵွၼ်းဢိူင်ႇၵုၼ်မူင်ႈ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၸၢႆးၼႆႉ ဢမ်ႇယၢမ်ႈမီး ပၼ်ႁႃ တေႃႇၽႂ်/ ၸုမ်းလႂ်။ မၼ်းၸၢႆးၼႆႉ ပဵၼ်ၵူၼ်းႁဵတ်းၵၢၼ်တႃႇၵူၼ်းတင်းၼမ် တူင်ႉၼိုင်ၼႂ်းတူင်ႇဝူင်းၵေႃႉၼိုင်ႈ၊ ပဵၼ်ၵူၼ်းၸႂ်လီ၊ ဢၼ်ၶဝ်မႃးယိုဝ်းမၼ်း ၸၢႆးၼၼ်ႉ ႁဝ်းၵေႃႈဢမ်ႇႁူႉ ဝႃႈၶဝ်မီးလွင်ႈပႅင်းၸင်းမၼ်းၸၢႆးၸိူင်ႉႁိုဝ်” ဝႃႈၼႆ။

ၸၢႆးၸိုၼ်ႈလႅင်း ၽူႈၵွၼ်းဢိူင်ႇၵုၼ်မူင်ႈၼႆႉ မီးလုၵ်ႈၸၢႆးဝႆႉ 2 ၵေႃႉ၊ မေးၼၢင်းသမ်ႉ ၸိုဝ်ႈႁွင်ႉ ၼၢင်းၵေႃ ဝႃႈၼႆ။

တၢင်းပွတ်းတွၼ်ႈ ဢိူင်ႇၵုၼ်မူင်ႈ ၼႂ်းၸႄႈဝဵင်းၵဵင်းတွင်းၼၼ်ႉ သိုၵ်းလူင်ပွင်ၸိုင်ႈမၢၼ်ႈ ယူႇသဝ်းတူင်ႉၼိုင်ၼမ်၊ ႁူင်းႁဵၼ်းၾိုၵ်းသွၼ်ၵၢၼ်သိုၵ်းၵေႃႈမီး၊ တပ်ႉဢၼ်ပၵ်းသဝ်းမီးလၢႆတပ်ႉ။ လိူဝ်ၼၼ်ႉ တပ်ႉပျီႇတူႉၸိတ်ႉၵေႃႈမီး၊ ၼွၵ်ႈဝဵင်းသမ်ႉ မီးသိုၵ်း RCSS/SSA ၸုမ်းဢၼ်လူင်းလၢႆးမိုဝ်းၵိုတ်းတိုၵ်းတူဝ်ႈမိူင်း NCA ၵႂႃႇမႃးတူင်ႉၼိုင်။