ဝၼ်းတီႈ 6/1/2026 ဝၼ်းလွတ်ႈလႅဝ်းမိူင်းယၢင်းၽိူၵ်ႇ ၶွပ်ႈတဵမ် 78 ပီၼၼ်ႉ လူင်ပွင်ၸိုင်ႈ ၵေႃႇတူးလေႇ G.O.K  (ယၢင်း)ပိုၼ်ၽၢဝ်ႇဢွၵ်ႇမႃးဝႃႈ  ၵေႃႇတင်ႈ ၸိုင်ႈမိူင်း ၵေႃႇတူးလေႇ ဢၼ်ဢမ်ႇယူႇတႂ်ႈၸိုင်ႈမိူင်းလႂ်  ဝႃႈၼႆ။

ၵူၼ်းၶိူဝ်းယၢင်းၽိူၵ်ႇၼႆႉ လႆႈယူႇမႃးတႂ်ႈမိုဝ်းၸဝ်ႈဢႃႇၼႃႇသိုၵ်း ဢၼ်မိပ်ႇငႅၼ်းတဵၵ်းတဵင်၊ ထႅၵ်ႇၸႅၵ်ႇႁဵတ်းႁၢႆႉ၊ ၶၢၼ်ၸႂ်ၵပ်ႉၵိၼ်း ႁိုင်မႃးၶၢဝ်းတၢင်း 70 ပီပၢႆယဝ်ႉလႄႈ ထိုင်ၶၢဝ်းလူဝ်ႇၸတ်းပွင် ၶေႃႈလွင်ႈယႂ်ႇ၊ မိူင်းႁူမ်ႈတုမ်မၢၼ်ႈ ၵေႃႈ တႅၵ်ႇယၢႆႈဝႆႉလၢႆၶၵ်ႉလၢႆတွၼ်ႈယဝ်ႉလႄႈ  ဢဝ်လွင်ႈလွတ်ႈလႅဝ်းတႂ်ႈမိူင်းမၢၼ်ႈသေ ၵေႃႇတင်ႈမိူင်းၸွမ်ၸိုင်ႈႁင်းၶေႃယဝ်ႉ ၽွင်းငမ်းၵႂႃႇႁင်းၶေႃ ဝႃႈၼႆ။

ၼႂ်းၸုမ်းလူင်ပွင်ၸိုင်ႈ ၵေႃႇတူးလေႇၼၼ်ႉ ၸွမ်ၸိုင်ႈ ပဵၼ် သေႃးၼႄႇတႃး ပူဝ်ႇမျႃႉ၊ ၵႅမ်ၸွမ်ၸိုင်ႈ (1) လႄႈ ၽွင်းလူင်ၾၢႆႇၼွၵ်ႈမိူင်းသမ်ႉပဵၼ် သေႃးသႃႇၵေးၽူဝ်း၊ ၵႅမ်ၸွမ်ၸိုင်ႈ (2) ပဵၼ် သေႃးတေးပိတ်ႉသႃႇၵပေႃး၊ ၸွမ်ၽွင်းလူင် ပဵၼ် သေႃးၽူဝ်းတူးလေး လႄႈ ၽွင်းလူင်ၾၢႆႇၵႅတ်ႇၶႄ သမ်ႉပဵၼ် သေႃးတေးဝိတ်ႉလႃႇတူး ဝႃႈၼႆ။

ၸွမ်သိုၵ်း သေႃးၼႄႇတႃး ပူဝ်ႇမျႃႉ ဢၼ်ႁပ်ႉပဵၼ်ၸွမ်ၸိုင်ႈၼၼ်ႉ ပဵၼ်လုၵ်ႈၸၢႆး ၸွမ်သိုၵ်းလူင် သေႃးပူဝ်ႇမျႃႉ ႁူဝ်ပဝ်ႈၵဝ်ႇ ၸုမ်းၸိူဝ်ႉၸၢတ်ႈယၢင်းၽိူၵ်ႇ KNUသေ ယၢမ်းလဵဝ်ႁပ်ႉဝႆႉၼႃႈတီႈ ၽူႈၵွၼ်းသိုၵ်း သုင်သုတ်း ၼႂ်းတပ်ႉသိုၵ်းၵေႃႇတူးလေႇ (KTLA)၊ လိူဝ်ၼၼ်ႉ တီႈတပ်ႉသိုၵ်းၸိူဝ်ႉၸၢတ်ႈယၢင်းၽိူၵ်ႇ (KNDO) ၵေႃႈ ယၢမ်ႈပဵၼ် ၽူႈၵွၼ်းသိုၵ်း သုင်သုတ်း။

ၸွမ်းသိုၵ်း သေႃးၼႄႇတႃး ပူဝ်ႇမျႃႉၼႆႉ ယွၼ်ႉႁဵတ်းႁၢႆႉၶႃႈႁႅမ်တၢႆၵူၼ်းမိူင်း 25 ၵေႃႉ ၼႆသေ တပ်ႉသိုၵ်း KNU လႆႈပူတ်းပႅတ်ႈ မိူဝ်ႈပီ 2022။

ၾၢႆႇတပ်ႉသိုၵ်းၸိူဝ်ႉၸၢတ်ႈယၢင်းၽိူၵ်ႇ KNU တႄႉ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉဝႃႈ – လွင်ႈႁဵတ်းသၢင်ႈတူင်ႉၼိုင် တပ်ႉသိုၵ်း KTLA ဢၼ်ၸွမ်သိုၵ်း သေႃးၼႄႇတႃး ပူဝ်ႇမျႃႉ ဢွၼ်ႁူဝ်ယူႇၼၼ်ႉ ဢမ်ႇၵဵဝ်ႇသင်ၵၼ်တင်း KNU ဝႃႈၼႆဝႆႉ။

 လွင်ႈၼႆႉ ၾၢႆႇKNU တႄႉလၢတ်ႈတီႈၶၢဝ်ႇ BBC ဝႃႈ – ၸုမ်းၵေႃႇတူးလေႇၼႆႉ ဢဵၼ်ႁႅင်းၶဝ်မီးဢဝ်မွၵ်ႈဝၢၼ်ႈဢွၼ်ႇၼိုင်ႈဝၢၼ်ႈၵူၺ်း။ ၵူၼ်းၶဝ်ၵမ်ႈၼမ်ၵေႃႈယူႇၼွၵ်ႈမိူင်း။ ၵွပ်ႈၼႆလႄႈၵူၼ်းၶိူဝ်းယၢင်းၸိူဝ်းယူႇဝႆႉတီႈမိူင်းယၢင်းၼႆႉ ၸွင်ႇတေႁပ်ႉလွင်ႈၶဝ်ပိုၼ်ၽၢဝ်ႇၸိုင်ႈမိူင်းၵေႃႇတူးလေႇ ဢမ်ႇႁူႉ- ဝႃႈၼႆ။