Friday, March 29, 2024

ပလိၵ်ႈထႆး တီႉၺွပ်းလႆႈႁႅင်းၵၢၼ် ၽိတ်းမၢႆမီႈထႅင်ႈ 8 ၵေႃႉ တီႈၵဵင်းမႆႇ

Must read

ၸဝ်ႈၼႃႈတီႈပလိၵ်ႈထႆး ႁူမ်ႈၵၼ်တီႉၺွပ်းႁႅင်းၵၢၼ်ယၢၼ်မိူင်း ၽိတ်းပၵ်းပိူင်မၢႆမီႈ တီႈႁူင်းလဵင်ႉမႃ ၼႂ်းၵဵင်းမႆႇ။


ဝၼ်းတီႈ 29/08/2018 သိုဝ်ႇၶၢဝ်ႇထႆးၶျွင်ႉ 9 ပိုၼ်ၽၢဝ်ႇဝႃႈ- ၸဝ်ႈၼႃႈတီႈပလိၵ်ႈထႆး လူင်းၵူတ်ႇထတ်းတီႈႁူင်း လဵင်ႉမႃ ဢၼ်မီးၼႂ်း ဢိူင်ႇပႃႇလႅတ်ႇ ၸႄႈတွၼ်ႈၵဵင်းမႆႇသေ ထူပ်းႁၼ်ၼၢင်းယိင်းႁႅင်းၵၢၼ်ယၢၼ်မိူင်း 8 ၵေႃႉ ဢွၼ်ၵၼ်ၵၢၼ်းၶိုၼ်ႈႁူဝ်ႉလႅၼ်ႈပၢႆႈ။ ၸဝ်ႈၼႃႈတီႈၸင်ႇတီႉၺွပ်းၵူတ်ႇထတ်း ပၼ်တူတ်ႈတၢမ်ႇ ၸွမ်းၼင်ႇမၢႆမီႈ  ႁႅင်းၵၢၼ်မိူင်းထႆးမီးဝႆႉ ။

- Subscription -

ၽူႈမီးပုၼ်ႈၽွၼ်းၵေႃႉၼိုင်ႈ လၢတ်ႈၼႄဝႃႈ – “ ႁဝ်းၶႃႈဢွၼ်ၵၼ်လူင်းပိုၼ်ႉတီႈ ၵူတ်ႇထတ်း ႁူင်းၵၢၼ်ၸွမ်းၼင်ႇ ဢၼ်ႁဝ်းမီးသဵၼ်ႈမၢႆဝႆႉသေ ႁဝ်းၶႃႈၵႂႃႇတဵၵ်းႁိင်ႇၽၵ်းတူပိူဝ်ႈယွၼ်း ဢၼုရၢတ်ႈ(ၶႂၢင်ႉ) ၸဝ်ႈႁိူၼ်းတႃႇၶဝ်ႈၵႂႃႇ    ၵူတ်ႇထတ်း ။ ၵူၺ်းၵႃႈပႂ်ႉႁိုင်မွၵ်ႈ 10 မိၼိတ်ႉယဝ်ႉ ဢမ်ႇမီးၵူၼ်းမႃးပိုတ်ႇၽၵ်းတူသေပွၵ်ႈလႄႈ ၵမ်းၼၼ်ႉၸင်ႇမီးၵူၼ်းႁိမ်းႁိူၼ်းၼၼ်ႉ မႃးသွပ်ႉသႅပ်ႉလၢတ်ႈဝႃႈ မီးႁႅင်းၵၢၼ်ဢၼ်ၽိတ်းမၢႆမီႈ တိုၵ်ႉဢွၼ်ၵၼ်ၵၢၼ်းၶိုၼ်ႈႁူဝ်ႉ  ၶိုင်ဢၢင်ႈပၢႆႈယူႇၼႆလႄႈ ၸဝ်ႈၼႃႈတီႈ ၸင်ႇလမ်းၵႂႃႇတၼ်းတီႉၺွပ်းလႆႈ 8 ၵေႃႉ လိူဝ်ၼၼ်ႉတၼ်းပၢႆႈလွတ်ႈ (လၢႆၵေႃႉတႄႉ ဢမ်ႇႁူႉတႅတ်ႈတေႃး) ။ ၸဝ်ႈၼႃႈတီႈၸင်ႇတီႉၺွပ်းတူဝ်သူင်ႇႁူင်းပလိၵ်ႈ ပၼ်တူတ်ႈတၢမ်ႇ ၸွမ်း ၼင်ႇမၢႆမီႈဝၢၼ်ႈမိူင်းမီးၼၼ်ႉ” ဝႃႈၼႆ။

ၸၢႆးပိူင်း ၸဝ်ႈၼႃႈတီႈၾၢႆႇမၢႆမီႈHRDF လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ပီႈၼွင်ႉႁဝ်းၶႃႈ တေၵႂႃႇတီႈလႂ်တၢင်းလႂ်သေဢမ်ႇဝႃႈ ႁဝ်းၶႃႈလူဝ်ႇဢဝ်ဝတ်းဝႂ် ၸပ်းတူဝ်ဝႆႉတႃႇသေႇ ပေႃး ၸဝ်ႈၼႃႈတီႈ ၶဝ်ယွၼ်းတူၺ်းသေႁဝ်းဢမ်ႇၼႄလႆႈၵမ်းလဵဝ်ၼၼ်ႉ ႁဝ်းမီးတၢင်းၽိတ်းယဝ်ႉ ပေႃးၸဝ်ႈၼႃႈတီႈၶဝ်တီႉၺွပ်းၵႂႃႇႁူင်းပလိၵ်ႈၼႆ ႁႂ်ႈပေႃႈမႄႈပီႈၼွင်ႉဢဝ် ဝတ်းႁဝ်းၼၼ်ႉ ၵႂႃႇၼႄၸဝ်ႈၼႃႈတီႈတေၸၢင်ႈၺႃးမႂ်ငိုၼ်းဢမ်ႇပူၼ်ႉ 1,000 ၿၢတ်ႇ ” ဝႃႈၼႆ။

မိူဝ်ႈဝၼ်းတီႈ 27/08/2018 ၼၼ်ႉၵေႃႈ သိုဝ်ႇၶၢဝ်ႇၵဵင်းမႆႇပိုၼ်ၽၢဝ်ႇဝႃႈ – ၸဝ်ႈၼႃႈတီႈ ပလိၵ်ႈႁူင်းပလိၵ်ႈမႄႈ  ပိင်း ၸႄႈတွၼ်ႈၵဵင်းမႆႇ ႁူမ်ႈၵၼ်လူင်း ၵူတ်ႇထတ်းၼႂ်းပိုၼ်ႉတီႈ ဢိူင်ႇဝတ်ႉၵဵတ်ႇ ၸႄႈဝဵင်းမိူင်း ၸႄႈတွၼ်ႈၵဵင်းမႆႇသေ တီႉၺွပ်း ၸၢႆးၼုမ်ႇ မိူင်း ဢႃယု 28 ပီ၊ ၸၢႆးမႅတ်ႈဢွင်ႇ ဢႃယု 30 ပီ၊ ၸၢႆးသႅင် ဢႃယု 21 ပီ လူၺ်ႈတူတ်ႈ တၢမ်ႇတၢင်းၽိတ်းဢမ်ႇ ဢဝ်ဝတ်းဝႂ်ႁဵတ်းၵၢၼ်ဝႆႉ ၸပ်းတူဝ် ၊ ဢမ်ႇမီးဝႂ်သင်ၼႄ လႆႈၽွင်းၸဝ်ႈ ၼႃႈတီႈလူင်း    ၵူတ်ႇထတ်း ယွၼ်းတူၺ်း ၸဵမ်ၸိူဝ်းၼႆႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း