ၼႂ်းၸႄႈမိူင်းၶၢင် ၸတ်းႁဵတ်းပၢင်တွပ်ႇလိၵ်ႈလၢႆးတႆး ပွၵ်ႈၵမ်း 34 မီးလုၵ်ႈႁဵၼ်းၶဝ်ႈတွပ်ႇ 70 ပၢႆ ဝႃႈၼႆ။

ဝၼ်းတီႈ 25/08/2018 ယၢမ်းၵၢင်ၼႂ် သင်ၶၸဝ်ႈလႄႈ မေႃသွၼ်ၸၢႆးယိင်း ႁူမ်ႈၵၼ် ၸတ်းႁဵတ်းပၢင်တွပ်ႇလိၵ်ႈ လၢႆးတႆး တီႈဝတ်ႉဝဵင်းႁႆး ထုင်ႉမိူင်းဝၼ်း ၵိင်ႇၽႄမိူင်းမွၵ်ႇ ၸႄႈမိူင်းၶၢင်။ လိူဝ်ၼၼ်ႉ ၸတ်းႁဵတ်းပႃးပၢင်တွပ်ႇလိၵ်ႈ ႁူင်းႁဵၼ်းထမ်းမထႅင်ႈ ဝႃႈၼႆ။

ၸဝ်ႈတူၼ်ၶူး ဢႃႇလေႃးၵ ၽူႈဢွၼ်ႁူဝ် ပိုတ်ႇပၢင်သွၼ်လိၵ်ႈလၢႆးတႆး ၼႂ်းၸႄႈမိူင်းၶၢင် လၢတ်ႈတီႈၽူႈတွႆႇ ႁွၵ်ႈဝႃႈ “ တွၼ်ႈတႃႇတေပဵၼ်မႃး ပၢင်သွၼ်လိၵ်ႈလၢႆးတႆး ၼႂ်းထုင်ႉမိူင်းဝၼ်းႁဝ်းၶႃႈၼႆႉ မိူဝ်ႈပီ 1985 ၼၼ်ႉ ၸဝ်ႈႁဝ်း လႆႈ ႁွင်ႉၵူၼ်းၼုမ်ႇၼႂ်းလွႆၸႄႊသေ ဢုပ်ႇၵၼ်။ ပေႃးဢုပ်ႇၵၼ် လႆႈၸႂ်ၵၼ်ယဝ်ႉ ႁဝ်းၵေႃႈ ဢွၼ်ၵၼ် တႄႇပိုတ်ႇပၢင် သွၼ်လိၵ်ႈလၢႆးတႆး ၼႂ်းပီၼၼ်ႉၵမ်းလဵဝ်။ လႆႈပူင်သွၼ်ပၼ်လိၵ်ႈတႆးႁဝ်း ၼႂ်းထုင်ႉမိူင်းဝၼ်း ႁူဝ် မိူင်းထိုင် ႁၢင်မိူင်း ပေႃးၸွတ်ႇၵႂႃႇၵူႈဝၢၼ်ႈယဝ်ႉ။ ၼႂ်းထုင်ႉမိူင်းဝၼ်းႁဝ်းၼႆႉ တင်းမူတ်း မီး 108 ဝၢၼ်ႈ။ လိူဝ်ၼၼ်ႉ ပွႆးလူင်ပၢင်သွၼ် လိၵ်ႈတႆးၵေႃႈ ႁဝ်းၸဝ်ႈၶဝ် လႆႈၸတ်းႁဵတ်းမႃးၵူႈပီ။ ထိုင်မႃး ပီ 2000 တဵမ် ၸင်ႇမႃးၸတ်းႁဵတ်း ပၢင်ပွႆးပီမႂ်ႇတႆး တႄႇဢဝ် 2000 ထိုင် 2017 မီးၵႂႃႇယဝ်ႉ ၶၢဝ်းတၢင်း 18 ပီ။ တေႃႈလဵဝ် တေလႆႈဝႃႈ ပၢင်သွၼ်လိၵ်ႈ လၢႆးတႆးႁဝ်းၵေႃႈ ၸွတ်ႈၸေးၵူႈတီႈယဝ်ႉ ၼႂ်းထုင်ႉမိူင်းဝၼ်းႁဝ်း” ဝႃႈၼႆ။

ၼႂ်းပၢင်တွပ်ႇလိၵ်ႈလၢႆးတႆးၼႆႉ တင်းမူတ်း လုၵ်ႈႁဵၼ်းၶဝ်ႈတွပ်ႇ မီး71 ၵေႃႉ။ လုၵ်ႈႁဵၼ်းဢၼ်ၶဝ်ႈတွပ်ႇလိၵ်ႈတႆးသမ်ႉ ၸၼ်ႉငဝ်ႈ 41 ၵေႃႉ၊ ၸၼ်ႉၼိုင်ႈ 10 ၵေႃႉ၊ ၸၼ်ႉသွင် 7 ၵေႃႉလႄႈ ၸၼ်ႉသၢမ် 15 ၵေႃႉ ၸိူဝ်းၼႆႉ။

ပၢင်သွၼ်လိၵ်ႈလၢႆးတႆးၼႆႉတႄႇပူင်သွၼ်မႃး မိူဝ်ႈ ဝၼ်းတီႈ 29/07/2018 ထိုင် ဝၼ်းတီႈ 25/08/2018 တႃႇၶၢဝ်း တၢင်း ၼိုင်ႈလိူၼ် ၶၢဝ်းယၢမ်းပူင်သွၼ်သမ်ႉ တႄႇဢဝ် 7 မူင်းၵၢင်ၶမ်ႈ ထိုင် 9 မူင်းၵၢင်ၶိုၼ်း၊ လိူဝ်ၼၼ်ႉ လုၵ်ႈႁဵၼ်း တႆး ဢၼ်လုၵ်ႉတၢင်းမိူင်းၶႄႇမႃးႁဵၼ်းၵေႃႈမီး ဝႃႈၼႆ။

လိူဝ်ၼၼ်ႉဢမ်ႇၵႃး ႁူင်းႁဵၼ်းထမ်းမၵေႃႈ တွပ်ႇလိၵ်ႈၼႂ်းဝၼ်းလဵဝ် တီႈလဵဝ်ၵၼ်။ တွၼ်ႈတႃႇႁူင်းႁဵၼ်း ထမ်းမ တႄႇ ပိုတ်ႇသွၼ်မႃး မီး ၶၢဝ်းတၢင်း 2 ပီ မီးဝႆႉသွင်ၸၼ်ႉ ၸၼ်ႉငဝ်ႈတင်း ၸၼ်ႉၼိုင်ႈ။ ပူင်သွင်ပၼ် ၼႂ်းဝၼ်း ဢႃးတိတ်ႉ ၵၢင်ၼႂ် 7:30 မူင်း ထိုင် 10:30 မူင်း ဝႃႈၼႆ။

Photo by – ထုင့်ႁူၺ်ႈလီ