ရူတ်ႉၶိူင်ႈ 2 လမ်း ၽႃႇၵၼ် တီႈၼႂ်းဢိူင်ႇၵၢတ်ႇတဝ်ႇ ၸႄႈဝဵင်းၵဵင်းတုင် မီးၵူၼ်းလႆႈမၢတ်ႇၸဵပ်း တင်း 2 ၾၢႆႇ ဝႃႈၼႆ။

ဝၼ်းတီႈ 30/08/2018 ယၢမ်းႁူဝ်ၶမ်ႈ 6:30 မူင်းၼၼ်ႉ ရူတ်ႉၶိူင်ႈၽႃႇၵၼ် တီႈတၢင်းၶဝ်ႈဝၢၼ်ႈယၢင်းႁူၵ်း ႁိမ်း ဝတ်ႉၽရႃႉထၢတ်ႈ ၵၢတ်ႇတဝ်ႇ သဵၼ်ႈတၢင်း မိူင်းယၢင်း – ၵဵင်းတုင် ၼႂ်းဢိူင်ႇၵၢတ်ႇတဝ်ႇ ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ဝႃႈၼႆ။

ၸၢႆးသၢမ် ၵူၼ်းဢိူင်ႇၵၢတ်ႇတဝ်ႇ လၢတ်ႈတီႈၽူႈတွႆႇႁွၵ်ႈဝႃႈ “ပဵၼ်ရူတ်ႉၶိူင်ႈဢၼ်ဢၢႆႈမၢၼ်ႈၶီႈမႃး၊ ထႅင်ႈၵေႃႉၼိုင်ႈ သမ်ႉ ပဵၼ်ရူတ်ႉၼၢင်းယိင်းတႆး လုၵ်ႉတၢင်းဝၢၼ်ႈလၢႆႇၶၢႆႉ တေမႃး တၢင်းၵၢတ်ႇတဝ်ႇ။ လႅပ်ႈၾႆးရူတ်ႉၶႃဢမ်ႇမီးႁႃႉ ၵေႃႈဢမ်ႇႁူႉ ၶဝ်ၽႃႇသႂ်ႇၵၼ်သေ လူမ်ႉတင်း 2 လမ်း၊ ၵူၼ်းႁေႃႈမၼ်းတႄႉ လႆႈမၢတ်ႇၸဵပ်း တင်း 2 ၵေႃႉယဝ်ႉ။ ရူတ်ႉၶိူင်ႈၵေႃႈ လႆႈလူႉလႅဝ်ၵွႆၼင်ႇၵၼ်။ ၵူၺ်းၵႃႈ မိူဝ်ႈၽွင်းၼၼ်ႉ ၽႂ်ၵေႃႈဝႃႈ ၽႂ်ထုၵ်ႇ” ဝႃႈၼႆ။

ၵဵဝ်ႇၵပ်းလွင်ႈ ၽႂ်ၽိတ်းၽႂ်ထုၵ်ႇၼၼ်ႉ ယူႇတီႈပလိၵ်ႈမၢၼ်ႈ ၼႂ်းဢိူင်ႇၵၢတ်ႇတဝ်ႇ ၵႂႃႇၵူတ်ႇထတ်းတူၺ်း ဢွင်ႈတီႈ ဢၼ်ပဵၼ်ပၼ်ႁႃၼၼ်ႉယူႇ ဝႃႈၼႆ။
ၸၢႆးသၢမ် လၢတ်ႈဝႃႈ “ ၼၢင်းယိင်းတႆးၵေႃႉၼၼ်ႉ ဢႃယု မွၵ်ႈလႆႈ 40 ပၢႆ ပဵၼ်ၵူၼ်းဝၢၼ်ႈၵၢင်း၊ ၽူႈၸၢႆးၵေႃႉ ၼၼ်ႉသမ်ႉ ပဵၼ်ၸၢဝ်းမၢၼ်ႈ ယူႇၼႂ်းဝဵင်းၵဵင်းတုင်။ ၵူၺ်းၵႃႈ တၢင်းလႂ်ၽိတ်းဢၼ်ဝႃႈၼၼ်ႉ ၽႂ်ၵေႃႈ ဢမ်ႇယွမ်းႁပ်ႉ လႆႈငိၼ်းၾၢႆႇပလိၵ်ႈတီႈၵၢတ်ႇတဝ်ႇဝႃႈ သင်ၾၢႆႇလႂ် ဢမ်ႇယွမ်းႁပ်ႉၽိတ်းၵေႃႈ တေသူင်ႇၶိုၼ်ႈလုမ်းတြႃးသေ ဢဝ်လုမ်းတြႃးတႅပ်းတတ်းပၼ်ၵႂႃႇ” ဝႃႈၼႆ။

ယၢမ်းလဵဝ် ၼႂ်းဝဵင်းၵဵင်းတုင် ဢိၵ်ႇပႃးတင်းလၢႆလၢႆၸႄႈဝဵင်း ၼႂ်းၸိုင်ႈတႆး ရူတ်ႉၶိူင်ႈ၊ ၵႃးလိူင်ႇၼမ်။ သိုဝ်ႉၶီႇငၢႆႈ။ ၵူၺ်းၵႃႈ ၾၢႆႇႁွင်ႈၵၢၼ်တေႃႉသူင်ႇၵေႃႈ ဢမ်ႇလူင်းႁဵတ်းပၼ်ဝတ်းဝႂ်ၶွၼ်ႇရူတ်ႉၵႃး ရူတ်ႉၶိူင်ႈ။ ၵူၼ်းမိူင်းၶီႇရူတ်ႉၵေႃႈ ဢမ်ႇမီးမၢႆမီႈ ၵႆႉၵႆႉၽႃႇတမ်ၺႃးၵၼ်။

လႅင်ႇၶၢဝ်ႇ – လႅတ်ႇၼုမ်ႇ မင်းရၢႆး