သင်ၶၸဝ်ႈ ၸႄႈဝဵင်းမိူင်းၵိုင် တႅမ်ႈလိၵ်ႈမဵတ်ႉတႃႇတုၵ်းယွၼ်းထိုင် တပ်ႉသိုၵ်းၸိုင်ႈတႆး 2 ၸုမ်း ယႃႇႁႂ်ႈလႆႈၽိတ်း ၽႅၵ်ႇၵၼ် ႁႂ်ႈလႆႈႁူမ်ႈၵၼ်သေ ၵႅတ်ႇၶႄတူၺ်းထိုင်ပေႃႈမႄႈၵူၼ်းမိူင်း ဝႃႈၼႆ။
ဝၼ်းတီႈ 28/08/2018 ၸုမ်းသင်ၶၼႃယၵ ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း တႅမ်ႈ လိၵ်ႈမဵတ်ႉတႃႇတုၵ်းယွၼ်းထိုင် ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA တင်း ပႃႇတီႇမႂ်ႇသုင် ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA သေ ယိူင်းဢၢၼ်းႁႂ်ႈတပ်ႉသိုၵ်းၸိုင်ႈတႆး 2 ၸုမ်းၵႅတ်ႇၶႄ တူၺ်းထိုင် ၵူၼ်း ဝၢၼ်ႈၵူၼ်းမိူင်း ႁႂ်ႈလႆႈၵတ်းယဵၼ်သေဢမ်ႇၵႃး ႁႂ်ႈလႆႈၽွမ်ႉႁူမ်ႈပဵၼ်ၸုမ်းလဵဝ်ၵၼ်သေၵမ်း ဝႃႈၼႆ။
ၸဝ်ႈတူၼ်ၶူး ဢၵ်ႉၵသေၼ ၵျွင်းလွႆလႅင် မိူင်းၵိုင် ၽူႈပွင်ၵၢၼ်သင်ၶၼႃယၵ ၸႄႈဝဵင်းမိူင်းၵိုင် လၢတ်ႈတီႈၽူႈတွႆႇ ႁွၵ်ႈဝႃႈ “ တႆးႁဝ်းတေႃႇတႆးႁဝ်းၼင်ႇၵၼ် ယႃႇႁႂ်ႈယိုဝ်းၵၼ် ၽႂ်တၢႆၵႂႃႇၵေႃႈ ပဵၼ်တႆးၵူၺ်း၊ ၾၢႆႇ RCSS လူႉၵႂႃႇ ၵေႃႈ ပဵၼ်တႆးၵူၺ်း၊ ၾၢႆႇ SSPP လူႉတၢႆၵႂႃႇၵေႃႈ ပဵၼ်တႆးၵူၺ်း။ ယဝ်ႉၵေႃႈ ပေႃႈမႄႈၵူၼ်းမိူင်း ယူႇ ၼႂ်းၵႄႈၵၢင် မၼ်းသေ လႆႈတုၵ်ႉၶယၢပ်ႇၽိုတ်ႇၸွမ်း” ဝႃႈၼႆ။
ၼႂ်းၶေႃႈမဵတ်ႉတႃႇတုၵ်းယွၼ်းထိုင် တပ်ႉသိုၵ်း 2 ၾၢႆႇၼၼ်ႉ “ ၸွမ်းၼင်ႇပဵၼ်တပ်ႉသိုၵ်းၸိုင်ႈတႆးၼင်ႇၵၼ် မီးယိူင်း ဢၢၼ်းတႃႇၵႅတ်ႇၶႄတူၺ်းထိုင်ၵူၼ်းဝၢၼ်ႈ ၵူၼ်းမိူင်းႁႂ်ႈလႆႈၵတ်းယဵၼ်ၼၼ်ႉ ႁႂ်ႈမေႃႁၵ်ႉပႅင်းတူၺ်းထိုင် ၵႅတ်ႇၶႄ ပေႃႈမႄႈတၵ်ႉၵႃႇၵူၼ်းမိူင်း တင်းသွင်မူႇသွင်ၸုမ်း သေၵမ်း”။
“တေႃႈလဵဝ် ပဵၼ်ၶၢဝ်းၽုၵ်ႇသွမ်ႈ တႃႇၵိၼ်ယႅမ်ႉတၵ်ႉၵႃႇၵူၼ်းဝၢၼ်ႈၵူၼ်းမိူင်းတႆး ၵူႈတီႈ ၵူႈတၢင်း၊ ၼႂ်းထုင်ႉႁူဝ်ၶၢႆး တီႈဢၼ်တပ်ႉသိုၵ်းၸိုင်ႈတႆး RCSS/SSA လႄႈ SSPP/SSA ယူႇသဝ်းတူင်ႉၼိုင်ဝႆႉယူႇၼၼ်ႉ ယႃႇႁႂ်ႈလႆႈမီးလွင်ႈ ၽိတ်းၽႅၵ်ႇသုၵ်ႉယုင်ႈတုမ်ႉတိူဝ်ႉတၵ်ႉၵႃႇပေႃႈမႄႈၵူၼ်းမိူင်းသေၵမ်း”။
“ၸွမ်းၼင်ႇငဝ်းလၢႆးဝၢၼ်ႈမိူင်း လႅၵ်ႈလၢႆႈၶိုၼ်ႈယႂ်ႇမႂ်ႇသုင်မႃးၼၼ်ႉ ၼင်ႇႁိုဝ် ပေႃႈမႄႈၵူၼ်းမိူင်း တေမီးလွင်ႈၶိုၼ်ႈ ယႂ်ႇမႂ်ႇသုင်သေ ၵတ်းယဵၼ်သိူဝ်းသႃႇၵႂႃႇၼၼ်ႉ ႁႂ်ႈတပ်ႉသိုၵ်းၸိုင်ႈတႆး တင်းသွင်ၾၢႆႇ ဝူၼ်ႉၼႃႈႁၼ်လင် သၢၼ် မိုဝ်းၵွတ်ႇၶေႃး ႁၵ်ႉသႃၵႅတ်ႇၶႄ ပေႃႈမႄႈၵူၼ်းမိူင်းၸိုင်ႈတႆးၵႂႃႇ မိူဝ်းၼႃႈယႂ်ႇယႂ်ႇၼမ်ၼမ်သေၵမ်းၼႆ ယူႇတီႈၸုမ်း သင်ၶၸဝ်ႈ ၸႄႈဝဵင်းမိူင်းၵိုင် ၸင်ႇလႆႈမီးလိၵ်ႈမဵတ်ႉတႃႇထိုင်မႃးၼၵ်းၼၵ်းၼႃၼႃ ၼင်ႇၼႆယူႇယဝ်ႉ” ဝႃႈၼႆ။
ပူၼ်ႉမႃးလိူၼ်ၵျုၼ်ႊ ဝၼ်းတီႈ 15 ပီ 2018 ၼႆႉ သိုၵ်းတႆး 2 ၸုမ်း RCSS/SSA လႄႈ SSPP/SSA လႆႈထဵင် မေႃးၵၼ်သေ လႆႈယိုဝ်းၵၼ်ၶိုၼ်း တီႈတႃႈၼမ်ႉ ဝၢၼ်ႈပႅင်ႇဝႅၼ်ႈ ဢိူင်ႇႁူဝ်ၶၢႆး ၸႄႈဝဵင်းမိူင်းၵိုင်။ မိူဝ်ႈၼၼ်ႉ သိုၵ်း RCSS/SSA လူႉတၢႆ 1 ၵေႃႉ၊ ၸဝ်ႈသၢင်ႇဢွၼ်ႇ ၵျွင်းပႅင်ႇဝႅၼ်ႈ မၢတ်ႇၸဵပ်းလိူဝ်ႁႅင်း။ ၽွင်းၼၼ်ႉၵေႃႈ ၸုမ်းသင်ၶ ၸဝ်ႈတူင်ႇဝဵင်းမိူင်းၵိုင် ဢွၵ်ႇလိၵ်ႈမဵတ်ႉတႃႇထိုင် သိုၵ်းတႆး 2 ၸုမ်း ယႃႇႁႂ်ႈလႆႈယိုဝ်းၵၼ်ထႅင်ႈၼႆၵမ်းၼိုင်ႈယဝ်ႉ။ လိၵ်ႈမဵတ်ႉတႃႇၽိုၼ်ၼႆႉ ပဵၼ်ၽိုၼ်တီႈ 2 ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ