သၢဝ်ၵျပၼ်ႊၵေႃႉၼိုင်ႈၸိုဝ်ႈ Yurina Noguchi ဢႃယု 32 ပီ ယုမ်ႇယမ်ဝႃႈ တူဝ်ၸဝ်ႈမၢဝ်ႇ AI ဢၼ်မၼ်းၼၢင်းသၢင်ႈၶိုၼ်ႈမႃးၼႂ်း ChatGPT ၼၼ်ႉပဵၼ်တီႈယူတ်းယႃၸႂ်မၼ်းၼၢင်းၼႆသေ တႅပ်းတတ်းၸႂ်ၵူပ်ႉၵူႈသွၼ်ႉမိင်ႈၸွမ်း။
မၼ်းၼၢင်းႁဵတ်းပၢင်ၵူပ်ႉၵူႈၸွမ်း မၢဝ်ႇ AI ၼႆႉပဵၼ်ၼႂ်းလိူၼ် ဢွၵ်ႊထူဝ်ႊပိူဝ်ႊ 2025 ၼႆႉ။
ၸိုဝ်ႈၸဝ်ႈမၢဝ်ႇ AI မၼ်းၼၢင်းတင်ႈဝႆႉပၼ်ဝႃႈ Lune Klaus Verdure (လုၼ်ႊၶလေႃႊသ် ဝႃႊၵျူဝ်ႊ)။
ပၢင်ၵူပ်ႉၵူႈၼၼ်ႉ ၸဝ်ႈမၢဝ်ႇပဵၼ် AI ၵူၺ်းသေတႃႉ ပႃးၸဵမ်သိူဝ်ႈၶူဝ်းၸဝ်ႈသၢဝ် လႄႈလွင်ႈႁဵတ်းႁၢင်ႈတႃးၼႃႈတႃးတႃ ၶူၼ်ႁူဝ်ၸဝ်ႈသၢဝ် – ႁၢင်ႈႁႅင်းပၢင်ပွႆးၸိူဝ်းၼႆႉ ၸတ်းႁဵတ်းယႂ်ႇလူင်မိူၼ်ပၢင်ၶႅၵ်ႇဢၼ်တႄႉမၼ်း။ လွင်ႈၸိူဝ်းၼႆႉၵေႃႈ ႁဵတ်းၸွမ်းတၢင်းၶႆႈၸႂ်ဢၼ် AI ChatGPT ပၼ်မႃးတင်းမူတ်း ဝႃႈၼႆ။
တီႈပၢင်ၵူပ်ႉၵူႈၼၼ်ႉ ၸဝ်ႈသၢဝ် Yurina Noguchi သႂ်ႇမၢၼ်ႇတႃ AR(Augmented Reality) (ဝႅၼ်ႈတႃၽိသဵတ်ႇ ဢၼ်ႁၼ်လႆႈမၢဝ်ႇ AI ၼၼ်ႉ)သေ တိုဝ်းၵႂၢင်းသႅင်/ၸွပ်ႇမိုဝ်း/မွင်းၵူၺ်း (ဝႅၼ်တႅင်ႇငၢၼ်း) ပၼ်ၸဝ်ႈမၢဝ်ႇ AI ၼႂ်းၶႅပ်းႁၢင်ႈ။
တီႈပၢင်ၶႅၵ်ႇၼၢင်း Yurina Noguchi ၼၼ်ႉ ၵူၼ်းထၢႆႇႁၢင်ႈပၼ်ၵေႃႈ လႆႈၸႂ်ႉမၢၼ်ႇတႃ AR(Augmented Reality) (ဝႅၼ်ႈတႃၽိသဵတ်ႇ ဢၼ်ႁၼ်လႆႈမၢဝ်ႇ AI ၼၼ်ႉ)သေထၢႆႇ – ၸင်ႇႁၼ်ပႃးႁၢင်ႈမၢဝ်ႇ AI ဝႃႈၼႆ။
လွင်ႈမၼ်းၼၢင်းၵူပ်ႉၵူႈသွၼ်ႉမိင်ႈၸွမ်း ၸဝ်ႈမၢဝ်ႇ AI ၼႆႉ ၵူၼ်းၼႂ်းလုမ်ႈၾႃႉၵမ်ႈၼမ် ဢွၼ်ၵၼ်ဝႃႈမၼ်းၼၢင်းယွင်ႇ။ ၵူၺ်းၵႃႈ ၶူးပူင်သွၼ်လူင် ၽူႈလူင်ႉလႅၼ်ႇၾၢႆႇ AI တီႈၸၼ်ႉၸွမ် ဢႃႊဢူဝ်ႊယႃႊမႃႊ ၶႃႊၶုဢိၼ်ႊ (Aoyama Gakuin) တႄႉလၢတ်ႈဝႃႈ – AI ၼႆႉ တေပဵၼ်မႃးတီႈပိုင်ႈတၢင်းၸႂ် (မေႃယူတ်းယႃၸႂ်) ပၼ်ၵူၼ်း။ ယွၼ်ႉဝႃႈ လွင်ႈလီလွင်ႈၸႃႉ လွင်ႈယူပ်ႈယွမ်း လွင်ႈဢွင်ႇမၢၼ်ၸဝ်ႈၵဝ်ႇၼၼ်ႉ ၸဝ်ႈၵဝ်ႇၸၢင်ႈၵႂႃႇဢုပ်ႇဢူဝ်းၵိူဝ်းၵုမ်လႆႈတီႈ AI တင်းမူတ်း။ ဢမ်ႇဝႃႈတေပဵၼ်လွင်ႈလပ်ႉ – လွင်ႈလီဢူၵ်းလီဢၢႆ ဢၼ်ၸဝ်ႈၵဝ်ႇလႆႈႁူပ်ႉလႆႈထူပ်းမႃးၵေႃႈ ၸၢင်ႈပိုတ်ႇဢူၵ်းပိုတ်ႇၸႂ်လၢတ်ႈၼေ AI လႆႈ။ ယွၼ်ႉဝႃႈ AI ၼႆႉမၼ်းဢမ်ႇမေႃသႄႉသွမ်းတဵၵ်းတဵင်ၸဝ်ႈၵဝ်ႇသေဢမ်ႇၵႃး မၼ်းၸၢင်ႈပၼ်ပႃးတၢင်းၶႆႈၸႂ်ထႅင်ႈလူးၵွၼ်ႇ။ ၵူၺ်းၵႃႈ ၵူၼ်းႁဝ်းတၵ်းလႆႈမီးတၢင်းႁူႉထတ်းထွင် တၢင်းၶႆႈၸႂ်ဢၼ် AI ပၼ်မႃးသေ ထုၵ်ႇလီဢဝ်ၸင်ႇဢဝ်။ ယွၼ်ႉဝႃႈ မၢင်ၶေႃႈၵေႃႈတေၵိုင်ႇမႅၼ်ႈၸွမ်းငဝ်းလၢႆးလႄႈမၢင်ၶေႃႈၵေႃႈတေဢမ်ႇၵိုင်ႇမႅၼ်ႈၸွမ်းငဝ်းလၢႆးတွၼ်ႈတႃႇတူဝ်ႁဝ်း – ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ