ၵႃးတၢင်ႇၵုၼ်ႇ လမ်းၼိုင်ႈ ပိၼ်ႈၼိူဝ်သဵၼ်ႈတၢင်း ၵဵင်းတုင် – မိူင်းၶၢၵ်ႇ လွင်ႈၵူၼ်းမၢတ်ႇၸဵပ်းလူႉတၢႆ ဢမ်ႇမီး ဝႃႈၼႆ။

မိူဝ်ႈၼႆႉ ဝၼ်းတီႈ 31/08/2018 ယၢမ်းၵၢင်ၼႂ် မွၵ်ႈ 8:30 မူင်း ၵႃးတၢင်ႇၵုၼ်ႇ ဢၼ်လုၵ်ႉတၢင်းၵဵင်းတုင် မုင်ႈၼႃးၸူ တၢင်းမိူင်းၶၢၵ်ႇ ပိၼ်ႈၶႂမ်ႈၼိူဝ်သဵၼ်ႈတၢင်း ၵဵင်းတုင် – မိူင်းၶၢၵ်ႇ ယၢၼ်ၵႆ ၵဵင်းတုင် မွၵ်ႈ 15 လၵ်း ၼႂ်းၸႄႈ ဝဵင်းၵဵင်း တုင် ၸိုင်ႈတႆးပွတ်းဢွၵ်ႇၶူင်း။ ယွၼ်ႉၾူၼ်တူၵ်းႁၢဝ်ႈႁႅင်း လိၼ်ၵူၼ်ႇတဵင်တၢင်း သဵၼ်ႈတၢင်းမိုၼ်ႈ မၢၵ်ႇရူတ်ႉပ လၢတ်ႈပိၼ်ႈ ဝႃႈၼႆ။

ၸဝ်ႈၵႃး ၵေႃႉၼိုင်ႈ ဢၼ်လႅၼ်ႈတၢင်း ၵဵင်းတုင် – မိူင်းၶၢၵ်ႇၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ “ မိူဝ်ႈၶမ်ႈဝႃး ၾူၼ် တူၵ်း တင်းၶိုၼ်းယဝ်ႉ။ မိူဝ်ႈၼႆႉ ၵေႃႈတိုၵ်ႉတူၵ်းယူႇ။ လိၼ်ၵူၼ်ႇတဵင်တၢင်း၊ တၢင်းၵေႃႈ သမ်ႉၵႅပ်ႈ၊ ၵႃး သမ်ႉတၢင်ႇ ၶူဝ်းၼမ်၊ သဵၼ်ႈတၢင်းသမ်ႉ မိုၼ်ႈသေ ၵမ်းၼႆႉ ၶဝ်သမ်ႉဢမ်ႇႁတ်းႁေႃႈၵႂႃႇတၢင်းၾင်ႇႁိုၵ်း သမ်ႉႁေႃႈၸပ်းတိၼ် လွႆဢိတ်းၼိုင်ႈသေ ၵႂႃႇပလၢတ်ႈလႄႈ လႆႈပိၼ်ႈၶႂမ်ႈၵႂႃႇ။ ၼႂ်းၵႃးၼၼ်ႉ မီးၵူၼ်းမႃးၸွမ်းၵၼ် ပဵၼ် 2 ၽူဝ်မေး။ ၶဝ် 2 ၵေႃႉတႄႉ ဢမ်ႇတၼ်းပဵၼ်သင်” ဝႃႈၼႆ။

သဵၼ်ႈတၢင်းၵဵင်းတုင် – မိူင်းၶၢၵ်ႇၼႆႉ ယၢၼ်ၵႆၵၼ် 52 လၵ်း။ သဵၼ်ႈတၢင်းၼႆႉ မီးၵႃးတၢင်ႇၵုၼ်ႇလႅၼ်ႈတေႃႉသူင်ႇၵႂႃႇ မႃးၼမ်။ ယွၼ်ႉဝႃႈ သဵၼ်ႈတၢင်း ၵဵင်းတုင် – မိူင်းလႃးၼၼ်ႉ ဢိုတ်းႁၢမ်ႈရူတ်ႉၵႃး ဢမ်ႇပၼ်ၵႂႃႇမႃး။ ယွၼ်ႉၼၼ် လႄႈ ၵူၼ်းၵႃႉ တၢင်းၵဵင်းတုင် – မိူင်းလႃးၵေႃႈ ဢွၼ်ၵၼ်မႃးလႅၼ်ႈသဵၼ်ႈတၢင်း ၵဵင်းတုင် – မိူင်းၶၢၵ်ႇ ၶဝ်ႈၵႂႃႇ တၢင်း မိူင်းယၢင်း – မိူင်းလႃး ဝႃႈၼႆ။

ၸၢႆးတုၺ်ႈ ၵူၼ်းမိူင်းၵဵင်းတုင် လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ “ ယွၼ်ႉၵူၼ်းႁဝ်း တႅပ်းတူၼ်ႈမႆႉၼၼ်ႉယဝ်ႉ၊ လိၼ်လႆႈၵူၼ်ႇ လူင်းမႃးသေ လႆႈဢဝ်တၢင်းယၢပ်ႇ ၵႃးတၢင်ႇၵုၼ်ႇၼႆႉ ယွၼ်ႉၶဝ်လုၵ်ႉၵဵင်းတုင် ၵႂႃႇမိူင်းလႃးၵမ်းသိုဝ်ႈ ဢမ်ႇလႆႈလႄႈ ၶဝ်ၸင်ႇၵႂႃႇတၢင်းမိူင်းၶၢၵ်ႇ ၶဝ်ႈတၢင်းမိူင်းယၢင်း – သိုဝ်လိုဝ်းသေ ၶဝ်ႈၸူးၼႂ်းမိူင်းလႃး ဝႃႈၼႆ။

လႅင်ႇၶၢဝ်ႇ – လႅတ်ႇၼုမ်ႇ မင်းရၢႆး