ၵေႃပွင်ၵၢၼ်ႁူင်းႁဵၼ်းထမ်မ ၸိုင်ႈတႆး ၸတ်းႁဵတ်းပၢင်ၾိုၵ်းၽွၼ်ႉမေႃသွၼ်ႁူင်းႁဵၼ်းထမ်မ တီႈဝဵင်းၵဵင်းတွင်း မီးၶူးပူင်သွၼ်လၢႆလၢႆၸႄႈဝဵင်းလႄႈ မေႃသွၼ်လၢႆဝဵင်းၼႂ်းၸိုင်ႈတႆးၶဝ်ႈႁူမ်ႈႁဵၼ်းဢဝ်။
ပၢင်ၾိုၵ်းၽွၼ်ႉမေႃသွၼ်ၼႆႉ ၸတ်းႁဵတ်း တီႈဝတ်ႉတူၼ်ႈႁုင်း ဝဵင်းၵဵင်းတွင်း မီးၶူးပူင်သွၼ်လၢႆလၢႆၸႄႈဝဵင်းလႄႈ မေႃသွၼ်လၢႆဝဵင်း ၼႂ်းၸိုင်ႈတႆး ၶဝ်ႈႁူမ်ႈႁဵၼ်းဢဝ်ႁိမ်းၸမ်ပၢၵ်ႇ ။
ၸဝ်ႈၶူးသုဝၼ်ႇၼ ဝတ်ႉတူၼ်ႈႁုင်း ဝဵင်းၵဵင်းတွင်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ပၢင်ၾိုၵ်းၽွၼ်ႉၵမ်း ၼႆႉ မီးၶူးပူင်သွၼ်လၢႆလၢႆတီႈလႄႈ မေႃသွၼ်လၢႆဝဵင်းမႃးၶဝ်ႈႁူမ်ႈၶႃႈဢေႃႈ ။ မၢင်ၸိူဝ်းၵေႃႈမႃးလဵပ်ႈႁဵၼ်း။ ယိူင်း ဢၢၼ်းတႄႉၵေႃႈပိူဝ်ႈပူၵ်းပွင်မေႃသွၼ် တႃႇသွၼ်ၼႂ်းႁူင်းႁဵၼ်းထမ်မၼမ်ၼမ် ႁႂ်ႈလုၵ်ႈလၢၼ်ၵူၼ်းၼုမ်ႇမိူဝ်းၼႃႈ ႁူႉၸၵ်းၾိင်ႈႁိတ်ႈႁွႆးတူဝ်ၵဝ်ႇလႄႈ မီးတၢင်းႁူႉတၢင်းႁၼ်ၵိုၵ်းတူဝ်ၸဝ်ႈၵဝ်ႇၵႂႃႇ” ဝႃႈၼႆ။
ၼႂ်းပၢင်ၼႆႉမီး ၸဝ်ႈၶူးသီရိထမ်မ ဝတ်ႉဝေႇလုဝၼ်ႇတူၼ်ႈတီး၊ ၸဝ်ႈၶူးပၺ်ၺႃသႃမိ ၵျွင်းၵၢင်ဝဵင်းတၢင်ႉယၢၼ်း၊ ၸဝ်ႈၶူးၵေႃးသၼ်ႇလ ၵျွင်းၽြႃးလူင်ၵၢင်ဝဵင်းတၢင်ႉယၢၼ်း ဢိၵ်ႇၸဝ်ႈတူၼ်ၶူးတၢင်းလႃႈသဵဝ်ႈ၊ မိူင်းပၼ်ႇ၊ လၢင်းၶိူဝ်း၊ သႅၼ်ဝီၸိူဝ်းၼႆႉ ပူင်သွၼ်ပၼ် မီးမေႃသွၼ်ၸၢႆး – ယိင်းလႄႈ သင်ၶၸဝ်ႈ ၼႂ်းၸႄႈမိူင်းယၢင်းလႅင်၊ လွႆၶေႃ၊ တူၼ်ႈတီး၊ လၢင်းၶိူဝ်း၊ မိူင်းပၼ်ႇ၊ သႅၼ်ဝီ၊ လႃႈသဵဝ်ႈလႄႈ တၢင်ႉယၢၼ်းၸိူဝ်းၼႆႉ ၶဝ်ႈႁူမ်ႈႁဵၼ်းဢဝ်80ပၢႆ။
ပၢင်ၾိုၵ်းၽွၼ်ႉမေႃသွၼ်ၼႆႉ ၸတ်းႁဵတ်းပွၵ်ႈတီႈ1 မိူဝ်ႈပီ 2016 ၊ ပွၵ်ႈၵမ်း 2 မိူဝ်ႈပီ 2017 ပွၵ်ႈၼႆႉပဵၼ်ပွၵ်ႈၵမ်း 3 ၼႆယဝ်ႉ။
ႁူင်းႁဵၼ်းထမ်မ ဢၼ်ပိုတ်ႇဝႆႉတီႈဝဵင်းၵဵင်းတွင်း တင်းမူတ်းမီး 7 တီႈ မိူၼ်ၼင်ႇတီႈ ဝတ်ႉၵျွင်းတူၼ်ႈႁုင်း၊ဝတ်ႉၼမ်ႉပႃမုင်း၊ ဝတ်ႉၵျွင်းၵုင်းဝတ်ႉ၊ ဝတ်ႉၵျွင်းတႃႈၵုၼ် မွၵ်ႇၸမ်ႇပေႇ၊ ဝတ်ႉၵျွင်းပႃႇသႃ၊ ဝတ်ႉၵျွင်းၼမ်ႉတုမ်လႄႈ ဝဵင်း ၵဝ်ႇ ၸိူဝ်းၼႆႉ။
