ၾူၼ်တူၵ်းတွၼ်ႈၵၢင်ၼႂ်ၼႆႉလႄႈၼမ်ႉႁူၺ်ႈၼမ်ႉပႃႇလႆၼွင်းထူမ်ႈ ၼႂ်းထုင်ႉၼမ်ႉလၼ်ႈႁၢဝ်ႁႅင်း လင်ႁိူၼ်းၵူၼ်း ဝၢၼ်ႈ ႁိမ်း 70 လင် တိုၵ်ႉၺႃးၼမ်ႉလုပ်ႇထူမ်ႈယူႇ ဝႃႈၼႆ။
မိူဝ်ႈၼႆႉ ဝၼ်းတီႈ 30/08/2018 ယၢမ်းၵၢင်ဝၼ်း ၼမ်ႉလုပ်ႇၼွင်းထူမ်ႈ တၢင်းပွၵ်ႉၵွင်းလၢင်း၊ ဝၢၼ်ႈပၢင်ႁႆး၊ ပွၵ်ႉတႆး မႂ်ႇ ၼႂ်းထုင်ႉၼမ်ႉလၼ်ႈ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၼမ်ႉႁူၺ်ႈၼမ်ႉလွႆ လႆၶဝ်ႈႁွင်ႈၼမ်ႉ ဢၼ်ၵူၼ်း မိူင်းၶုတ်းဝႆႉ ၶၢင်ႈတၢင်း။ ၾင်ႇႁွင်ႈသမ်ႉတႅမ်ႇၼမ်ႉၼွင်းလူၼ်ႉၾင်ႇ ဝႃႈၼႆ။
ၸၢႆးၼေႃႇသႅင် ၼမ်ႉလၼ်ႈ လၢတ်ႈဝႃႈ“ ၼမ်ႉႁွင်ႈ ဢၼ်လႆႁိမ်းၶၢင်ႈတၢင်း ၾင်ႇမၼ်းတႅမ်ႇ ၶီႈၵူမ်ႇၶီႈငႂ်ႈၶမ်လႄႈ ၼမ်ႉဢမ်ႇလႆလႆႈလီ တေႃႈလဵဝ် ၵူၼ်းပွၵ်ႉၵွင်းလၢင်း၊ ပၢင်ႁႆးလႄႈ ၵူၼ်းၼုမ်ႇၸုမ်းႁႆႇၵွင် ဢွၼ်ၵၼ်မႃးၶုတ်းႁွင်ႈသေ ဢမ်ႇၵႃး ဢဝ်သၢႆးသႂ်ႇထူင်သေ ၶပ်ႉႁႄႉၼမ်ႉယူႇ” ဝႃႈၼႆ။
မိူဝ်ႈႁူဝ်လိူၼ်ၵျုၼ်ႊ ပူၼ်ႉမႃးၼႆႉၵေႃႈ ၼမ်ႉယၢမ်ႈလုပ်ႇၼွင်းထူမ်ႈ ၼႂ်းထုင်ႉၼမ်ႉလၼ်ႈ ၸႄႈဝဵင်း သီႇပေႃႉ ယဝ်ႉ ၵမ်းၼိုင်ႈ။ ဢိင်ၼိူဝ်ၼမ်ႉထူမ်ႈၼႆႉသေ လင်ႁိူၼ်းလူႉၵွႆၸွမ်း မီး 1,214 လင်၊ ၵူၼ်းမိူင်း ၺႃးၽေးၼမ်ႉထူမ်ႈ 3,445 ၵေႃႉ။ လိူဝ်ၼၼ်ႉ ႁူဝ်ႉဢုတ်ႇ ၵူၼ်းဝၢၼ်ႈ ၵူၼ်ႇပင်းတင်းၼမ်။ သူၼ် ႁႆႈၼႃး ၵူၼ်းမိူင်းၵေႃႈ ၺႃးၽေးၼမ်ႉလုပ်ႇ ၼမ်ႉထူမ်ႈလူႉသုမ်းၵေႃႈၼမ်။ သဵၼ်ႈတၢင်းၶူဝ်ၸိူဝ်းၼႆႉၵေႃႈ လူႉၵွႆၼမ် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ