လုၵ်ႈႁဵၼ်းၸၼ်ႉၸွမ်ဝဵင်းတူၼ်ႈတီးလႄႈ ပလိၵ်ႈၾၢႆႇရူတ်ႉၵႃး(မေႃႇတေႃႇပီႇၵေႇ) ဝဵင်းလူင်တူၼ်ႈတီး ၸတ်းပၢင် ၼႄၵၢၼ်ၶပ်းၶီႇရူတ်ႉ တိုၵ်းသူၼ်းႁႂ်ႈၵူၼ်းမိူင်းတိုဝ်းမၢၵ်ႇႁူဝ်ႁႄႉၽေး ပွၵ်ႈၵမ်းႁႅၵ်ႈ။

ဝၼ်းတီႈ 29/08/2018 လုၵ်ႈႁဵၼ်းၸၼ်ႉၸွမ်ဝဵင်းလူင်တူၼ်ႈတီးလႄႈ ပလိၵ်ႈၾၢႆႇၵုမ်းထိင်းပိူင်ႁေႃႈရူတ်ႉၵႃး ဝဵင်းလူင်တူၼ်ႈတီး ႁူမ်ႈၵၼ်ၸတ်းႁဵတ်းပၢင်ၼႄလွင်ႈၶပ်းၶီႇရူတ်ႉ ပွၵ်ႈၵမ်းႁႅၵ်ႈ တီႈဝဵင်းလူင်တူၼ်ႈတီး ဢဵၼ်ႁႅင်း ၽူႈၶဝ်ႈႁူမ်ႈမီး 500 ပၢႆ။

မျဵဝ်းၸေႃႇဢွင်ႇ ပလိၵ်ႈၾၢႆႇၵုမ်းၵၢၼ်ၶပ်းၶီႇ ဝဵင်းတူၼ်ႈတီး လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ – “ ပေႃးရူတ်ႉ ၽႃႇၵၼ်မိူဝ်ႈလႂ်ၵေႃႈ ၵမ်ႉၼမ်တေမၢတ်ႇၸဵပ်းလူႉတၢႆ။ ႁဝ်းၶႃႈၵေႃႈမီးသိူဝ်ႈၸႅၵ်ႇပၼ် တႅမ်ႈဝႆႉလိၵ်ႈပႃးဝႃႈၶပ်း     ရူတ်ႉမိူဝ်ႈလႂ်ၵေႃႈ ႁႂ်ႈသႂ်ႇမၢၵ်ႇႁူဝ်ရူတ်ႉ ၊ ယဝ်ႉဢွၼ်သႂ်ႇသိူဝ်ႈၼၼ်ႉသေ ၶပ်းၶီႇရူတ်ႉပၼ်ႇဝဵင်း မိူၼ်ၼင်ႇဝႃႈ ပၼ်တၢင်းႁူႉၵူၼ်းမိူင်း ႁႂ်ႈမေႃသႂ်မၢၵ်ႇႁူဝ်ရူတ်ႉ ၽွင်းၶပ်း ၶီရူတ်ႉၶႃႈဢေႃႈ ” ဝႃႈၼႆ။

ပၢင်ၶပ်းၶီႇၼႄၾၢင်ႁၢင်ႈၵၢၼ်ႁေႃႈရူတ်ႉၵႃးႁႂ်ႈလွတ်ႈၽေးၼႆႉ တႄႇၶၢဝ်းယၢမ်းၵၢင်ၼႂ် 9 မူင်းလုၵ်ႉ ဢဝ်တီႈ ၸၼ်ႉ ၸွမ်ဝဵင်းလူင်တူၼ်ႈတီးသေ ၶီႇပၼ်ႇႁွပ်ႈဝဵင်း ၶိုၼ်းတုမ်ၵၼ်တီႈၵဝ်ႇ တီႈဝၢင်း ၸၼ်ႉၸွမ်လူင်ဝဵင်းတူၼ်ႈတီး ၶၢဝ်းတၢင်းၵႆမီးမွၵ်ႈ 17 ၵီႇလူဝ်ႇမီႇတႃႇ။

ၸၢႆးယိၼ်ႇမူဝ်းယၼ်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ၶႃႈဝူၼ်ႉဝႃႈႁဝ်းၶႃႈဢွၼ်ႁဵတ်းယဝ်ႉ ပိူၼ်ႈၵေႃႈတေသူင် ၵၼ်သႂ်ႇမၢၵ်ႇႁူဝ်ရူတ်ႉမႃး။ တေလွတ်ႈၽေးလႄႈ လွတ်ႈလွင်ႈမၢတ်ႇၸဵပ်းလူႉတၢႆ။ ၵမ်ႉၼမ်ဢၼ်ၶႃႈႁူႉတေႉ ပေႃးဢမ်ႇသႂ်ႇမၢၵ်ႇႁူဝ်သေ ရူတ်ႉၽႃႇၵၼ်ရူတ်ႉလူမ်ႉဝႃႇၸိူဝ်းၼႆႉ ႁူဝ်တေတႅၵ်ႇ၊ ဢွၵ်းဢေႃလူႉ ၵမ်ႈၽွင်ႈၵေႃႈတၢႆၶႃႈဢေႃႈ။ ယွၼ်ႉၼၼ် ၵူႈၵေႃႈ ႁဝ်းၶႃႈၶပ်းၶီႇရူတ်ႉမိူဝ်ႈလႂ် ႁႂ်ႈသႂ်ႇမၢၵ်ႇႁူဝ်ရူတ်ႉၵူႈပွၵ်ႈၶႃႈ” ဝႃႈၼႆ။

ၸွမ်းၼင်ႇသၢႆမၢႆတီႈ ႁူင်းပလိၵ်ႈ ၸႄးဝဵင်းတူၼ်ႈတီးၼႂ်းပီ 2018 တေႃႇထိုင်လိူၼ်ၼႆႉ August ၼႂ်းၸႄႈဝဵင်းတူၼ်ႈတီးလႄႈ တူင်ႇတၢင်ႇ ၵဵဝ်ႇလူၺ်ႈၵၢၼ်ၶပ်းၶီႇရူတ်ႉၵႃးသေ ဢၼ်လႆႈထူပ်း ၽေးၵိုင်ႉၵၢင်ႉၼၼ်ႉ ၽူႈမၢတ်ႇ ၸဵပ်း မီးယူႇ 447 ၵေႃႉ ၊ ဢၼ်လူႉတၢႆသမ်ႉ မီး 107 ၵေႃႉ။ ယိူင်းဢၢၼ်းပွၵ်ႈၼႆႉၵေႃႈ တွၼ်ႈတႃႇလူတ်းယွမ်းၽေးၵိုင်ႉၵၢင်ႉလႄႈ ႁႂ်ႈၵူၼ်းၶပ်းၶီႇ ရူတ်ႉၵႃး မီးၵၢၼ်ႁူမ်ႈမိုဝ်း ၶပ်းၶီႇၸွမ်းပၵ်းပိူင် ၊ တိုဝ်းမၢၵ်ႇႁူဝ်ႁႄႉၽေးၵူႈၶၢဝ်း ၼႆသေ ၸင်ႇလႆႈၸတ်းႁဵတ်း။