ဝၼ်းတီႈ 29/08/2018 ၾူၼ်တူၵ်းႁၢဝ်ႈႁႅင်းတင်းၶိုၼ်းလႄႈ ၼမ်ႉထူမ်ႈ ၼႂ်းၵၢတ်ႇလူင် ၸႄႈဝဵင်းမိူင်းတူၼ်ႁဵတ်းႁႂ်ႈ ၵူၼ်းမိူင်း ႁူပ်ႉလွင်ႈယၢပ်ႇ ၽိုတ်ႇ လွင်ႈၵၢၼ်သိုဝ်ႉၶၢႆတေႃႇၵၼ် ဝႃႈၼႆ။

မိူဝ်ႈၼႆႉ ဝၼ်းတီႈ 30/08/2018 ယၢမ်းၵၢင်ၼႂ်ၸဝ်ႉ ၼမ်ႉထူမ်ႈ ၼႂ်းၵၢတ်ႇလူင် ၸႄႈဝဵင်းမိူင်းတူၼ် ၸႄႈတွၼ်ႈမိူင်း သၢတ်ႇ ၸိုင်ႈတႆးပွတ်းဢွၵ်ႇၶူင်း။ တေႃႇထိုင်ယၢမ်းလဵဝ် ၼမ်ႉပႆႇယွမ်း တိုၵ်ႉယိုင်ႈဝႆႉယူႇ ဝႃႈၼႆ။

ၸၢႆးသႅင် ၵူၼ်းပိုၼ်ႉတီႈ ၸႄႈဝဵင်းမိူင်းတူၼ် လၢတ်ႈတီႈၽူႈတွႆႇႁွၵ်ႈဝႃႈ “ ၶမ်ႈဝႃးၼႆႉ ၾူၼ်လူင်တူၵ်းႁႅင်းၼႃႇ ၼမ်ႉ လႆယိုင်ႈထူမ်ႈၼႂ်းၵၢတ်ႇ။ ၼႂ်းၵၢတ်ႇႁဝ်းၶႃႈသမ်ႉ ယွၼ်ႉမၼ်းပဵၼ်တီႈၶူင်ႈဝႆႉလႄႈ ၼမ်ႉၾူၼ်ဢၼ်တူၵ်းမႃးၼၼ်ႉ ၶိုၼ်းယိုင်ႈၶိုၼ်ႈသေ ထူမ်ႈၼႂ်းၵၢတ်ႇ။ ပေႃးလၢတ်ႈသိုဝ်ႈသိုဝ်ႈၵေႃႈ မၼ်းဢမ်ႇမီးႁွင်ႈၼမ်ႉတႃႇလႆဢွၵ်ႇလႄႈ ဢွင်း ယိုင်ႈႁဵတ်းၼၼ်ဝႆႉ” ဝႃႈၼႆ။

လိူဝ်ၼၼ် ၸွမ်းၶၢင်ႈၵၢတ်ႇ၊ ၸွမ်းသဵၼ်ႈတႃႈသၢႆတၢင်းလႄႈ ၸွမ်းႁိမ်းႁွမ်းၶႅပ်ႇၶၢင်ႈႁိူၼ်း ၸိူဝ်းၼၼ်ႉ ဢမ်ႇမီးႁွင်ႈ ၼမ်ႉ တႃႇတေလႆ။ သင်ဝႃႈ ၾူၼ်တူၵ်းမႃးႁၢဝ်ႈႁႅင်းၸိုင် ၼမ်ႉၾူၼ်ၼႆႉၵႆႉၼွင်း ထူမ်ႈယိုင်ႈၶိုၼ်ႈ ထူမ်ႈၸွမ်း ဢွင်ႈတီႈၶူင်ႈ တီႈယၢၼ်း ၸိူဝ်းၼႆႉ ဝႃႈၼႆ။

ၵူၼ်းၶၢႆၶူဝ်း ၼႂ်းၵၢတ်ႇလူင် ၸႄႈဝဵင်းမိူင်းတူၼ် ၵေႃႉၼိုင်ႈ လၢတ်ႈဝႃႈ “ မိူဝ်ႈၼႆႉႁဝ်းၶႃႈ ဢမ်ႇၸၢင်ႈတမ်း ၶၢႆၶူဝ်းသင် လႆႈၶႃႈ။ ၵူၼ်းမႃးသိုဝ်ႉ မႃးၸၢႆႇၵေႃႈဢမ်ႇမီး ယွၼ်ႉၼမ်ႉၼွင်းထူမ်ႈၼၼ်ႉၶႃႈယဝ်ႉ။ ႁဝ်းၶႃႈၵေႃႈဢမ်ႇႁူႉၼႃ ႁဵတ်း သင်ၾၢႆႇၽူႈမီးပုၼ်ႈၽွၼ်းၶဝ် ဢမ်ႇလၢင်းႁွင်ႈ၊ ဢမ်ႇႁဵတ်းႁွင်ႈၼမ်ႉ တႃႇၼမ်ႉတေလႆ။ လိူဝ်ၼၼ်ႉ တီႈၶူင်ႈ တီႈ ယၢၼ်း ၸွမ်းၼႂ်းၵၢတ်ႇၵေႃႈ ႁဵတ်းသင်ၶဝ် ဢမ်ႇမႃးထူမ်မႃးသိူဝ်ႇပၼ်၊ ငိုၼ်းတႄႉ ၶဝ်ၵဵပ်းဝႃႈၵဵပ်းယဝ်ႉ ဢမ်ႇႁၼ် ႁဵတ်းသင်ပၼ်” ဝႃႈၼႆ။

ယွၼ်ႉၾူၼ်တူၵ်းႁၢဝ်ႈႁႅင်းသေ မႄႈၼမ်ႉတူၼ်ၵေႃႈ ၼွင်းလူၼ်ႉၾင်ႇ ထူမ်ႈသူၼ်ႁႆႈၼႃးၵူၼ်းမိူင်း ၸွမ်းႁိမ်း ၾင်ႇ ၼမ်ႉတူၼ်သေ ဢမ်ႇၵႃး ၸွမ်းႁိူၼ်းယေး ၵေႃႈထူမ်ႈပႃးၵမ်ႈၽွင်ႈ။ လိူဝ်ၼၼ်ႉ တီႈဝတ်ႉၵျွင်းၵမ်မထၢၼ်း ၸႄႈဝဵင်း မိူင်းတူၼ်ၵေႃႈ ၼမ်ႉထူမ်ႈပႃးလူးၵွၼ်ႇ မိူဝ်ႈၼႆႉ ဝႃႈၼႆ။