ၵူၼ်းမိူင်းၼမ်ႉလၼ်ႈ ၵေႃႉၼိုင်ႈ ၽွင်းတိုၵ်ႉၼင်ႈဝႆႈၽြႃးယူႇ ၼႂ်းႁိူၼ်းၸဝ်ႈၵဝ်ႇၼၼ်ႉ ၺႃးၵူၼ်းႁၢႆႉ ဢမ်ႇႁူႉ ၾၢႆႇ ၶဝ်ႈမႃးယိုဝ်းထိုင်ၼႂ်းႁိူၼ်း။ လႆႈတိူဝ်ႉမၢတ်ႇၸဵပ်းႁၢဝ်ႈႁႅင်းသေ လႆႈသူင်ႇယူတ်းယႃတူဝ် တီႈႁူင်းယႃၼမ်ႉလၼ်ႈ ဝႃႈၼႆ။

ဝၼ်းတီႈ 28/08/2018 ယၢမ်းၵၢင်ၶမ်ႈမွၵ်ႈ 7 မူင်း လုင်းသၢင်ႇၸၢႆး ၽွင်းတိုၵ်ႉၼင်ႈဝႆႈၽြႃးယူႇ တီႈႁိူၼ်းမၼ်း ပွၵ်ႉၵိဝ်ႇတေႃး ဢိူင်ႇၼမ်ႉလၼ်ႈ ၸႄႈဝဵင်းသီႇပေႃႉၼၼ်ႉ မီးၵူၼ်းႁၢႆႉၵေႃႉၼိုင်ႈ ၶဝ်ႈယိုဝ်းလႄႈ မၼ်းၸၢႆးတိူဝ်ႉမၢၵ်ႇ ၵွင်ႈ 3 ၵမ်း။ ၵူၺ်းဢမ်ႇထိုင်တၢႆ လႆႈႁၢမ်သူင်ႇႁူင်းယႃ ဝႃႈၼႆ။

ၸၢႆးလူႇ ၵူၼ်းပိုၼ်ႉတီႈ ၸႄႈဝဵင်းၼမ်ႉလၼ်ႈ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ၵူၼ်းဢၼ်မႃးယိုဝ်းၼၼ်ႉ ၶဝ် မႃး 2 ၵေႃႉ၊ ၶီႇလူတ်ႉၶိူင်ႈမႃး၊ ၵေႃႉၼိုင်ႈပႂ်ႉတီႈလူတ်ႉၶိူင်ႈ၊ ထႅင်ႈၵေႃႉၼိုင်ႈသမ်ႉ ၶဝ်ႈယိုဝ်းလုင်းသၢင်ႇၸၢႆး။ မၢၵ်ႇၵွင်ႈ တိူဝ်ႉတီႈ ပဵမ်ႉ 2 ႁွႆးလႄႈ တီႈမၢၵ်ႇၵၢဝ်ႈ 1 ႁွႆး” ဝႃႈၼႆ။

တေႃႈလဵဝ် တူဝ်လုင်းသၢင်ႇၸၢႆးၼႆႉ လႆႈသူင်ႇယူတ်းယႃတူဝ်ဝႆႉတီႈႁူင်းယႃ ၵူၼ်းမိူင်းၼမ်ႉလၼ်ႈ ဝႃႈၼႆ။

ၸၢႆးလူႇ လၢတ်ႈဝႃႈ လုင်းသၢင်ႇၸၢႆးၼႆႉ ပဵၼ်သြႃႇယိပ်းၶူးသေ ယူတ်းယႃၵူၼ်းၺႃးဢၼ်ပိူၼ်ႈႁဵတ်းသႂ်ႇ ၸွမ်းၼင်ႇ တၢင်းယုမ်ႇယမ် ပီႈၼွင်ႉတႆး၊ လုင်းသၢင်ႇၸၢႆးၶႆႈၼႄးဝႃႈ ၵူၼ်းႁၢႆႉၼၼ်ႉ ထၢမ်ဝႃႈ ၸွင်ႇၸႂ်ႈလုင်းသြႃႇၸၢႆး။ ပေႃးတွပ်ႇ ဝႃႈ ၸႂ်ႈဢိူဝ်ႈၼႆၵေႃႈ ၵူၼ်းႁၢႆႉယိုဝ်းသႂ်ႇၵမ်းလဵဝ်။ ၵူၼ်းႁၢႆႉၼၼ်ႉၼုင်ႈၶူဝ်းတႆးထၢမ်တၢင်းၵႂၢမ်းတႆး” ဝႃႈၼႆ။

ၵူၼ်းႁၢႆႉဢၼ်မႃးယိုဝ်း လုင်းသြႃႇၸၢႆးၼႆႉ ပဵၼ်ၽႂ် လုၵ်ႉလႂ်မႃး ဢၼ်ဝႃႈၼၼ်ႉ ပႆႇလႆႈႁူႉ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 09/08/2018 ယၢမ်းၵၢင်ၼႂ် မွၵ်ႈ 10 မူင်းၼၼ်ႉၵေႃႈ လုင်းၸၢင်းဢေႃး ဢႃယု 42 ပီ တင်း ပႃႈၸၢင်းၸိင်ႇ မျႃႉ ဢႃယု 48 ပီ ပဵၼ်ၵူၼ်းဝၢၼ်ႈၼွင်ဝူဝ်း ၵႂႃႇၶၢႆၶဝ်ႈၵၢပ်ႇ(ၶဝ်ႈၶႄႇ) တီႈၼမ်ႉလၼ်ႈသေ တေပွၵ်ႈ မိူဝ်းၶိုၼ်း တီႈႁိူၼ်းၼၼ်ႉ ၺႃးၵူၼ်းႁၢႆႉ 2 ၵေႃႉ ၶီႈလူတ်ႉၶိူင်ႈသေ လမ်းယိုဝ်းၶဝ်သွင်ၵေႃႉ ၼႂ်းၵႄႈၵၢင် ၼမ်ႉလၼ်ႈ – မၢၼ်ႈလီႈ ယၢၼ်ၼမ်ႉလၼ်ႈ မွၵ်ႈ 5 လၵ်း ၼႂ်းၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ဝႃႈၼႆ။

ၼႂ်းလိူၼ်ဢေႃႊၵတ်ႊသ်ၼႆႉၵူၺ်း ၵူၼ်းမိူင်းၼမ်ႉလၼ်ႈ ၺႃးၵူၼ်းႁၢႆႉယိုဝ်း မီး 2 ပွၵ်ႈ ပႃးပွၵ်ႈၼႆႉယဝ်ႉ မီးၵူၼ်း မိူင်းလႆႈတိူဝ်ႉမၢတ်ႇၸဵပ်း မီး 3 ၵေႃႉယဝ်ႉ ဝႃႈၼႆ။