မႄႈႁိူၼ်းၼုမ်ႇ ၵူၼ်းမိူင်းၵႅတ်ႈ ၸႄႈဝဵင်းလႃႈသဵဝ်ႈ ၽႅၼ်ၶေႃးတၢႆ တီႈႁိူၼ်းၸဝ်ႈၵဝ်ႇ။ ယွၼ်ႉလွင်ႈသင် ဢၼ်ဝႃႈ ၼၼ်ႉ ပႆႇလႆႈႁူႉ ဝႃႈၼႆ။

ဝၼ်းတီႈ 27/08/2018 ယၢမ်းၵၢင်ၼႂ် မွၵ်ႈ 8 မူင်း ၼၢင်းလၢဝ်ၶမ်း ဢႃယု 32 ပီ ၽႅၼ်ၶေႃးတၢႆ တီႈႁွင်ႈသိုင်ႇၾႆး (ႁွင်ႈႁုင်မိုဝ်ႉ) တီႈႁိူၼ်းမၼ်းၼၢင်း တီႈဝၢၼ်ႈလူင်မိူင်းၵႅတ်ႈ ဢိူင်ႇမိူင်းၵႅတ်ႈ ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ ဝႃႈၼႆ။

လုင်းၶမ်းၸၢႆး ၵူၼ်းမိူင်းၵႅတ်ႈ လၢတ်ႈတီႈၽူႈတွႆႇႁွၵ်ႈဝႃႈ “ မၼ်းၼၢင်း ၽႅၼ်ၶေႃးတၢႆ တီႈႁွင်ႈ သိုင်ႇၾႆး တီႈႁိူၼ်း မၼ်းၼၢင်း။ မၼ်းၼၢင်း မီးလွင်ႈသင်တႄႉတႄႉၼႆ ၽႂ်ၵေႃႈဢမ်ႇႁူႉ။ ၽွင်းမၼ်းၼၢင်းတၢႆၼၼ်ႉ မႄႈမၼ်းၵႂႃႇဢဝ် သိလ်ၼွၼ်းၵျွင်း။ တီႈႁိူၼ်းမီးမၼ်းၼၢင်းၵေႃႉလဵဝ်ၵူၺ်း” ဝႃႈၼႆ။

ၼၢင်းလၢဝ်ၶမ်းၼႆႉ ပဵၼ်လုၵ်ႈယိင်း လုင်းသုပၺ်ၺႃ ပႃးယွၼ်း၊ မီးပီႈၼွင်ႉ 3 ၵေႃႉ မၼ်းၼၢင်းၼႆႉ ပဵၼ်ၵေႃႉ လိုၼ်းသုတ်း။ ၽူဝ်မၼ်းၼၢင်းပဵၼ် ၸၢႆးပၢၼ်းဢွင်ႇ မီးလုၵ်ႈႁူမ်ႈၵၼ် ဝႆႉၵေႃႉၼိုင်ႈ ပဵၼ်လုၵ်ႈၸၢႆး ႁဵတ်းၸဝ်ႈ သၢင်ႇယူႉဝတ်ႉလူင်မိူင်းၵႅတ်ႇဝႆႉ ဢႃယု 10 ပီ ၽွင်းမၼ်းၼၢင်း ၽႅၼ်ၶေႃးတၢႆၼၼ်ႉ ၵေႃႉပဵၼ်ၸဝ်ႈၽူဝ်ၵေႃႈ ဢမ်ႇယူႇတီႈႁိူၼ်း မိူဝ်းၵႃႉၶၢႆယူႇပွတ်းၵုၼ်လူင် ႁူဝ်ပၢင်ႇ ဝႃႈၼႆ။

လုင်းၶမ်းၸၢႆး သိုပ်ႇလၢတ်ႈထႅင်ႈဝႃႈ “ မၼ်းၼၢင်းၼႆႉ ၶႂ်ႈမီးလူမ်းယွင်ႇဝႆႉ။ မိူဝ်ႈပီ 2017 ၼၼ်ႉ မၼ်းၼၢင်း ယၢမ်ႈ ဝႅၼ် တူၵ်းၼမ်ႉမေႃႇပွၵ်ႈၼိုင်ႈယဝ်ႉ မိူဝ်ႈၽွင်းၼၼ်ႉ ပီႈၼွင်ႉၶဝ် တၼ်းႁၼ်သေ ဢမ်ႇထိုင်တီႈလႆႈတၢႆ။ မိူင်းၵႅတ်ႈ ႁဝ်းၶႃႈၼႆႉ မၼ်းယူႇလိုၵ်ႉ။ သဵၼ်ႈတၢင်းၵႂႃႇမႃးႁႃၵၼ်ယၢပ်ႇ။ ၸဝ်ႈၼႃႈတီႈၾၢႆႇပၢႆးယူႇလီၵေႃႈ ၸိူဝ်းတူၵ်းပုၼ်ႈ ၽွၼ်းၼၼ်ႉ ပိူၼ်ႈဢမ်ႇၶႂ်ႈမႃး။ ၸုမ်းယိပ်းၵွင်ႈၵေႃႈၼမ်။ ၵွပ်ႈၼၼ် လွင်ႈလုမ်းလႃး တူၺ်းထိုင်ပၢႆးယူႇလီၵူၼ်း မိူင်းၼႆႉ ဢမ်ႇပေႃး တဵမ်ထူၼ်ႈၵေႃႈပႃး” ဝႃႈၼႆ။

မိူင်းၵႅတ်ႈၼႆႉ မီးၸဵင်ႇႁွင်ႇဝၼ်းဢွၵ်ႇ ဝဵင်းလႃႈသဵဝ်ႈ ယၢၼ်ၵႆလႃႈသဵဝ်ႈမွၵ်ႈ 50 လၵ်း။ မိူဝ်ႈၵူႈပွၵ်ႈပၢၼ်ၸဝ်ႈၾႃႉ ပဵၼ်ၶုၼ်ၵိၼ်မိူင်း(မဵဝ်ႉၸႃး) ၽွင်းငမ်း။ ၼၢင်းလၢဝ်ၶမ်း ၵေႃႉၽႅၼ်ၶေႃးတၢႆၼႆႉ ပဵၼ်လၢၼ်ယိင်း မဵဝ်ႉၸႃး မိူင်းၵႅတ်ႈ ၸဝ်ႈၶုၼ်လွႆၼၼ်ႇတႃႇ။ ပဵၼ်ၶိူဝ်းၸဝ်ႈၾႃႉသႅၼ်ဝီ။

ယၢမ်းလဵဝ် ထုင်ႉမိူင်းၵႅတ်ႈၼႆႉ မီးသိုၵ်းမၢၼ်ႈ ပလိၵ်ႈမၢၼ်ႈလႄႈ သိုၵ်းၵူၼ်းမိူင်း ပီတုၸိတ်ႉ ပူဝ်ႇမူၼ်း ၵုမ်းၵမ်ဝႆႉ။