ပလိၵ်ႈမၢၼ်ႈ တီႉၺွပ်း ၵူၼ်းၶၢႆ သူႇသမ်းၵိၼ် ယႃႈမဝ်းၵမ်ယူႇသေတႃႉ ဢမ်ႇႁၼ်ႁဵတ်းလႆႈထိုင်တီႈလႄႈ ပီႈၼွင်ႉ ၵူၼ်းမိူင်းသီႇပေႃႉ ဢမ်ႇပေႃးၶႂ်ႈႁၢၼ်ႉၸႂ် ၼိူဝ်ၵၢၼ်တူင်ႉၼိုင်ပလိၵ်ႈ- ဝႃႈၼႆ။
ဝၼ်းတီႈ 25/08/2018 ၼၼ်ႉ ပလိၵ်ႈမၢၼ်ႈ ၶဝ်ႈၵူတ်ႇထတ်း တီႉၺွပ်း ၵူၼ်းသူႇသမ်းၵိၼ်ယႃႈမဝ်းၵမ်လႄႈ ၵူၼ်းၶၢႆ ယႃႈမဝ်းၵမ် တီႈသုမ်ႉသွင်း ဢၼ်မီးတီႈဝၢၼ်ႈၵုင်းမူင်ႈ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈ တႆးပွတ်းႁွင်ႇ။
ၸၢႆးလူႇ ၵူၼ်းပိုၼ်ႉတီႈ သီႇပေႃႉ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ဢွင်ႈတီႈ တီႈၼၼ်ႈၼၼ်ႉ ႁဵတ်းသုမ်ႉသွင်း သေ မီးၵူၼ်းၵႂႃႇသူႇသမ်းၵၼ်ယူႇတႃႇသေႇ။ မီးမႃးႁိုင်ၼႃႇယဝ်ႉ။ ပလိၵ်ႈၶဝ် ဢမ်ႇၶဝ်ႈတီႉၺွပ်း ပွႆႇပၼ်ၵူၼ်းသူႇ သမ်းၵိၼ် လွတ်ႈလွတ်ႈလႅဝ်းလႅဝ်း။ ၶဝ်ႈတီႉၺွပ်း မီး 2 ပွၵ်ႈၵူၺ်း၊ ၶဝ်ဢမ်ႇႁဵတ်းတႄႉတႄႉလႄႈ ယႃႈမဝ်းၵမ် ၵေႃႈဢမ်ႇႁၢႆ” ဝႃႈၼႆ။
မိူဝ်ႈၵူႈပွၵ်ႈ တီႈသုမ်ႉသွင်းသူႇသမ်းၵိၼ်ယႃႈမဝ်းၵမ်ၼၼ်ႉ မီးၵူၼ်းၵႂႃႇသူႇသမ်းၵိၼ် တင်းၼမ်လၢႆ သုမ်ႉသွင်းၼၼ်ႉ မီးဝႆႉတင်းသွင်ၽၢၵ်ႇၶၢင်ႈတၢင်းလူင်။ ဝၼ်းဢၼ်ၶဝ်မႃးတီႉသမ်ႉ တီႉလႆႈၵူၼ်းမႃးၶၢႆယႃႈၵေႃႉလဵဝ်ၵူၺ်း။ ဢမ်ႇမီး ၵူၼ်းၵိၼ်သေၵေႃႉ ဝႃႈၼႆ။
ဢူးတိၼ်ႇမွင်ႇတဵင်း ႁူဝ်ပဝ်ႈ ၸုမ်းသၢၼ်ၶတ်းယႃႈမဝ်းၵမ် မိူင်းႁူမ်ႈတုမ် ဢၼ်ပၵ်းလုမ်းတီႈၵျွၵ်ႉမႄး လၢတ်ႈတီႈ ၽူႈတွႆႇႁွၵ်ႈဝႃႈ “ ယႃႈမဝ်းၵမ်လိူင်ႇၽႄႈထၢၼ်ႇၼႆႉ ပလိၵ်ႈႁဵတ်းသင်လႄႈ ၶဝ်ဢမ်ႇႁူႉ။ တီႈတႄႉမၼ်း ဢၼ်ၶဝ်ဢမ်ႇႁူႉၼၼ်ႉ ယွၼ်ႉၶဝ်ဢမ်ႇႁဵတ်းၵၢၼ်ၵူၺ်း။ သင်ဝႃႈ ပလိၵ်ႈဢမ်ႇႁဵတ်းၵၢၼ် ၵူၼ်းမိူင်းတေႁဵတ်းႁိုဝ် ၸႂ်ယႂ်ႇၶဝ်။ တေႁဵတ်းႁိုဝ် ယုမ်ႇၶဝ် လွင်ႈၼႆႉ လူဝ်ႇလႆႈ ဝူၼ်ႉတူၺ်းယူႇ။ ၵၢၼ်တီႉၺွပ်း ယႃႈမဝ်းၵမ်ၼႆႉ ပဵၼ်ပုၼ်ႈၽွၼ်းပလိၵ်ႈယဝ်ႉ” ဝႃႈၼႆ။
ၸွမ်ၸိုင်ႈ ဢူးဝိၼ်းမိၼ်ႉ ၵေႃႈ ယၢမ်ႈလၢတ်ႈဝႆႉဝႃႈ တေႃႈလဵဝ် ၵူၼ်းသူႇသမ်းၵိၼ် ၶၢႆယႃႈမဝ်းၵမ်ၵေႃႈၼမ်မႃး ၼင်ႇႁိုဝ် ယႃႈမဝ်းၵမ် ပေႃးတေဢမ်ႇၽႄႈလိူင်ႇၼမ် တေဢွၼ်ၵၼ်ႁႄႉႁၢမ်ႈ ၵုမ်းၵမ် လႆႈၸိူင်ႉႁိုဝ်ဢၼ်ဝႃႈၼၼ်ႉ သင်ၵူၼ်းမိူင်းႁူမ်ႈမိုဝ်းၸွမ်း ၽႂ်သေဢမ်ႇဝႃႈ သင်ပွင်ႇၶၢဝ်ႇၸူးထိုင် ၽူႈမီးပုၼ်ႈၽွၼ်း ပလိၵ်ႈၶဝ်ၸိုင် တေပၼ် သူးရၢင်းဝလ်း ၵေႃႉပၼ်ၶၢဝ်ႇ သူင်ႇၶၢဝ်ႇပၼ်ၼၼ်ႉ ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ မၢႆ 3 လႃႈသဵဝ်ႈ ယၢမ်ႈလၢတ်ႈဝႃႈ “ ပေႃးယင်းတိုၵ်ႉ ၵႂႃႇၸွမ်း ပိူင်ပိုင်းလၵ်းမိူင်း 2008 ယူႇၸိုင် ယွၼ်ႉပိူဝ်ႈ လူင်ပွင်ၸိုင်ႈ ဢမ်ႇၸီႉသင်ႇလႆႈ ႁွင်ႈၵၢၼ်ၾၢႆႇၼႂ်းမိူင်း ဢၼ်ၾၢႆႇ သိုၵ်းယိပ်းဝႆႉ။ သိုၵ်းလႄႈ လူင်ပွင်ၸိုင်ႈ ဢမ်ႇမီးလွင်ႈႁူမ်ႈမိုဝ်းၵၼ်လႄႈ ယႃႈမဝ်းၵမ် ၼႂ်းၸိုင်ႈတႆး တိုၼ်းတေ ပႆႇၸၢင်ႈမူတ်းႁၢႆလႆႈ” ဝႃႈၼႆ။
Photo – Sipaw News
