ၼၢင်းမူဝ်ႁွမ် ၵူၼ်းမိူင်း ၼမ်ႉၶမ်း ဢၼ်ထုၵ်ႇသိုၵ်းတဢၢင်း TNLA တီႉၺွပ်းၵႂႃႇၼၼ်ႉ တေႃႈလဵဝ် မီးၶၢဝ်းတၢင်း 12 ဝၼ်း ပႆႇပွႆႇတူဝ်ၶိုၼ်းလႄႈ ၵေႃႁူမ်ႈသၢင်ႈၵူၼ်းၼုမ်ႇတႆး TYN ဢွၵ်ႇလိၵ်ႈတုၵ်းယွၼ်းႁႂ်ႈ TNLA ပွႆႇပၼ်တူဝ်မၼ်း ၼၢင်းၶိုၼ်းၽႂ်းၽႂ်း။

TYN ဢွၵ်ႇလိၵ်ႈမိူဝ်ႈ ဝၼ်းတီႈ 28/08/2018 တုၵ်းယွၼ်းပႃးဝႃႈ ပၼ်ႁႃ ၸိူင်ႉၼင်ႇၼႆမိူဝ်းၼႃႈမႃး ယႃႇႁႂ်ႈလႆႈပဵၼ် ထႅင်ႈ ဝႃႈၼႆ။

ၸၢႆးၼေႃႇသႅင် ၽူႈၶၢၼ်ပၢၵ်ႇ ၵေႃႁူမ်ႈသၢင်ႈၵူၼ်းၼုမ်ႇတႆး TYN လၢတ်ႈတီႈၽူႈတွႆႇႁွၵ်ႈဝႃႈ “ တုၵ်းယွၼ်းႁႂ်ႈ တပ်ႉ သိုၵ်းတဢၢင်း TNLA ဢၼ်ၶဝ်တီႉၺွပ်း ၼၢင်းမူဝ်ႁွမ်ၵႂႃႇၼၼ်ႉ ႁႂ်ႈၶဝ်ပွႆႇတူဝ်ပၼ်ၵမ်းသိုဝ်ႈ။ ယဝ်ႉၵေႃႈ ပွၵ်ႈၼႃႈၶႃႇ လိုၼ်းၵေႃႈ ယႃႇႁႂ်ႈလႆႈပဵၼ် ပၼ်ႁႃၸိူင်ႉၼႆထႅင်ႈ။ ထႅင်ႈၾၢႆႇၼိုင်ႈၵေႃႈ ဢမ်ႇၶႂ်ႈႁႂ်ႈၶဝ် တီႉၺွပ်း ဝႆႉၶၢဝ်းတၢင်းႁိုင် ယွၼ်ႉဝႃႈ မၼ်းၼၢင်း ပဵၼ်ၽူႈယိင်း မီးဝႆႉလုၵ်ႈဢွၼ်ႇ 2-3 ၵေႃႉ။ သင်ၸိူဝ်ႉဝႃႈ သိုပ်ႇပဵၼ်ပၼ်ႁႃ ၸိူင်ႉၼႆထႅင်ႈ လၢႆလၢႆ ပွၵ်ႈမႃးၼႆ ႁဝ်းၶႃႈမႆႈၸႂ် ၵူဝ်ပဵၼ်ပၼ်ႁႃ 2 ၸၢဝ်းၶိူဝ်းမႃး” ဝႃႈၼႆ။

ၼၢင်းမူဝ်ႁွမ်ၼႆႉ ပဵၼ်မေး ၸၢႆးသေႃးသူၺ်ႇ(ႁွင်ႉ) ၸၢႆးလၢဝ်ၶမ်း မီးလုၵ်ႈဢွၼ်ႇလဵၵ်ႉ ဝႆႉ 3 ၵေႃႉ ပဵၼ်ၵူၼ်း ပွၵ်ႉ ႁူဝ်ၼွင် ၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။

ၽူႈၵွၼ်းတပ်ႉ TNLA တႃႉဢၢႆႈမွင်း ၵေႃႈယၢမ်ႈလၢတ်ႈဝႃႈ “ ပီၵၢႆမိူဝ်ႈ ၵူၼ်းသိုၵ်းႁဝ်းၶႃႈ 2 ၵေႃႉ ၵႂႃႇၵဵပ်းၶွၼ်ႇႁိူၼ်း ၶဝ်သေ ပွၵ်ႈမႃး ၺႃးသိုၵ်းမၢၼ်ႈ ယိုဝ်းတၢႆၵၢင်တၢင်းၼၼ်ႉ ပဵၼ်ယွၼ်ႉၼၢင်းမူဝ်ႁွမ် ပွင်ႇၶၢဝ်ႇၸူးသိုၵ်းမၢၼ်ႈ။ ဢၼ် ၼႆႉ မၼ်းၼၢင်း တေလႆႈဢဝ်ပုၼ်ႈၽွၼ်း။ ယွၼ်ႉၼၼ်လႄႈ ၸင်ႇတီႉမၼ်းၼၢင်း။ ၸႂ်ပႅင်းၸင်းၼိူဝ်ၸၢဝ်းၶိူဝ်း တႆးတႄႉ ႁဝ်းၶႃႈဢမ်ႇမီး” ဝႃႈၼႆ။

မိူဝ်ႈဝၼ်းတီႈ 17/08/2018 ယၢမ်းၵၢင်ၼႂ်ၼၼ်ႉ တပ်ႉသိုၵ်းတဢၢင်း TNLA ၸႂ်ႉႁႅင်းသိုၵ်းသေ ၶဝ်ႈတီႉၺွပ်းဢဝ် တူဝ် ၼၢင်းမူဝ်ႁွမ် ၵႂႃႇတီႈႁၢၼ်ႉ/လၢၼ်ႉၶၢႆ ၶူဝ်းႁိူၼ်း (ၼွင်မၢဝ်း) တီႈႁၢၼ်ႉမၼ်းၼၢင်းသေ တေႃႇထိုင် ယၢမ်းလဵဝ် ၺႃးတီႉၺွပ်းၵႂႃႇ မီး 12 ဝၼ်းယဝ်ႉ ပႆႇပွႆႇတူဝ်ၶိုၼ်း၊ ၸုမ်းတူင်ႉၼိုင်တူင်ႇဝူင်းၵူၼ်း၊ ပႃႇတီႇၵၢၼ်မိူင်း လၢႆလၢႆၸုမ်း ဢွၵ်ႇလိၵ်ႈတုၵ်းယွၼ်းႁႂ်ႈပွႆႇပၼ်ၶိုၼ်း ၼၢင်းမူဝ်ႁွမ်။ ၾၢႆႇၼိုင်ႈၵေႃႈ တပ်ႉသိုၵ်းၸိုင်ႈတႆး SSPP လႆႈသူင်ႇတူဝ်တႅၼ်း ၵႂႃႇ ႁူပ်ႉထူပ်း ဢုပ်ႇၵုမ် TNLA တႃႇႁႂ်ႈပွႆႇပၼ်တူဝ်ၼၢင်းမူဝ်ႁွမ်။