ယွၼ်ႉၽေးသၽႃႇဝသေ ၼႂ်းၶၢဝ်းတၢင်း 10 ပီ ႁူဝ်ၼပ်ႉၵူၼ်း 250 လၢၼ်ႉၵေႃႉ တူဝ်ႈလုမ်ႈၾႃႉ လႆႈႁၢမ်းႁိူၼ်းယေး တီႈယူႇသဝ်းၼႆ – ၸၢတ်ႈၸိုင်ႈလုမ်ႈၾႃႉ ႁၢႆးငၢၼ်းပိုၼ်ၽၢဝ်ႇဝႆႉၼင်ႇၼႆ။

ၽိုၼ်လိၵ်ႈႁၢႆးငၢၼ်းၼႆႉ UNHCR လႆႈပိုၼ်ၽၢဝ်ႇၵႂႃႇ ၼႂ်းဝၼ်းတီႈ 10/11/2025 ဝၼ်းၸတ်းႁဵတ်းပၢင်ၵုမ် ၺီႇလႃႇၶၢမ်ႇ ၵဵဝ်ႇလူၺ်ႈၾိင်ႈၾႃႉရႃႇသီႇလႅၵ်ႈလၢႆႈ COP30 တီႈဝဵင်း ပီႊလမ်ႊ ၸိုင်ႈမိူင်း ပရႃႊၸီႊ။

ၼႂ်းၶၢဝ်းတၢင်း 10 ပီပူၼ်ႉမႃးၼႆႉ ယွၼ်ႉၽေးသၽႃႇဝသေ ႁူဝ်ၼပ်ႉၵူၼ်းၼႂ်းလုမ်ႈၾႃႉ တႃႇ 250 လၢၼ်ႉၵေႃႉ (ၼိုင်ႈဝၼ်း 7 မိုၼ်ႇၵေႃႉ) လႆႈႁၢမ်းႁိူၼ်းယေးတီႈယူႇသဝ်းဝႆႉ။ လွင်ႈၼႆႉ ပဵၼ်ယွၼ်ႉ ၾႃႉလႅင်ႉ ၾူၼ်ဢမ်ႇတူၵ်းလႄႈ ယၢပ်ႇၵိၼ်း တႃႇၼမ်ႉၵိၼ်ၼမ်ႉၸႂ်ႉ ဢမ်ႇၼၼ် ၼမ်ႉၼွင်းထူမ်ႈႁၢဝ်ႈႁႅင်း ၸဵမ်ၸိူဝ်းၼႆႉ။

လိူဝ်ၼၼ်ႉ ၵူၼ်းၸိူဝ်းပၢႆႈဢွၵ်ႇမႃးတီႈ ပၼ်ႁႃ ပတိၵ်ႈၶၢတ်ႈၼၼ်ႉၵေႃႈ ၺႃးၽေးသၽႃႇဝသေ လႆႈသိုပ်ႇပၢႆႈယၢၼ် တီႈယူႇတၼ်းသဝ်းထႅင်ႈ ဝႃႈၼႆ။

တီႈၼႂ်း ၽိုၼ်လိၵ်ႈႁၢႆးငၢၼ်း UNHCR ၼၼ်ႉလၢတ်ႈပႃးဝႆႉထႅင်ႈဝႃႈ – တႃႇတေၵႅတ်ႇၶႄႁႄႉၵင်ႈပၼ်ၵူၼ်းမိူင်း ၸိူဝ်းၺႃးၽေးသၽႃႇဝၼၼ်ႉ ဢမ်ႇမီးဝႆႉငိုၼ်းၵွင်ၵၢင်ၵုမ်ႇထူၼ်ႈ၊ ငိုၼ်းၵွင်ၵၢင်ၼႆႉ လူဝ်ႇလႆႈၵႂႃႇႁွတ်ႈထိုင် ၼႂ်းပိုၼ်ႉတီႈ ဝၢၼ်ႈမိူင်း ၸိူဝ်းထူပ်းၽေးသၽႃႇဝႁၢဝ်ႈႁႅင်းဝႆႉၼၼ်ႉ ဝႃႈၼႆ။

ၾၢႆႇၼိုင်ႈၵေႃႈ မိူဝ်ႈဝူင်ႈပူၼ်ႉမႃးၼႆႉ ယွၼ်ႉလူမ်းလႅင်ႉတၢႆႊၾူၼ်ႊ ‘‘ၶႃႊလ်မႄႊၵိ’’ သေ တီႈမိူင်းၾိလိပ်ႉပိၼ်ႊလ် မီးၵူၼ်းလူႉတၢႆ 200 ပၢႆ၊ လိူဝ်ၼၼ်ႉ ယွၼ်ႉလူမ်းလႅင်ႉ ‘‘ၾူၼ်ႊဝၼ်ႊ’’ သေ မီးၵူၼ်းလူႉတၢႆထႅင်ႈ 18 ၵေႃႉ၊ ယၢမ်းလဵဝ် တိုၵ်ႉလႆႈႁဵတ်းၵၢၼ်ၸွႆႈထႅမ်ၵွပ်ႇၵူႈဝႆႉ၊ တႃႇတေႁဵတ်းၵၢၼ် မူၼ်ႉမႄး ပူၵ်းပွင်ၶိုၼ်းၼၼ်ႉတႄႉ တိုၵ်ႉမီးလွင်ႈယၢပ်ႇၽိုတ်ႇဝႆႉ ၼႆယဝ်ႉ။