ႁူပ်ႉထူပ်းတွင်ႈထၢမ် – ၸၢႆးၸိူင်း Z Go Han (ၸၢႆးၼုမ်ႇၾႃႉ)

ၼႂ်းၵၢပ်ႈဝၢၼ်ႈပၢၼ်မိူင်းဢၼ်သုၵ်ႉသၵ်ႉယုင်ႈယၢင်ႈလူင်ဝၼ်းမိူဝ်ႈၼႆႉ ၵူၼ်းၼုမ်ႇမိူင်းမၢၼ်ႈ တင်းၼမ်လၢႆ လႆႈဢွၼ်ၵၼ်ပၢႆႈဢွၵ်ႇပိုၼ်ႉတီႈလႄႈ မိူၼ်ၼင်ႇသဵၼ်ႈတၢင်းႁၢႆဝႆႉ။ ဢမ်ႇၸၢင်ႈ ႁဵတ်းလွင်ႈ ႁုၼ်ႈမုၼ်းၶိုၼ်ႈယႂ်ႇၽႂ်မၼ်း။ ၵူၺ်းၵႃႈ မီးၼုမ်ႇတႆး ၼႃႈၾရင်ႇ ၸိုဝ်ႈႁၢင်ႈလီ ၵေႃႉၼိုင်ႈတႄႉ ႁၼ်လႆႈတီႈယူႇၼႂ်းၵၢၼ်ပၢႆးမွၼ်းၸၼ်ႉမိူင်းႁူမ်ႈတုမ်မႃးၼႂ်းၶၢဝ်းတၢင်း 4-5 ပီၼႆႉ။   မၼ်းၸၢႆးပဵၼ်ၽႂ်လုၵ်ႉလႂ်မႃး ယွၼ်ႉသင်လႄႈမီးၸိုဝ်ႈလၢၵ်ႇလၢႆး၊ မၼ်းၸၢႆးလႆႈၶတ်းၸႂ်မႃးၸိူင်ႉႁိုဝ် ၼႆၼၼ်ႉ   ၼၢင်းငိုၼ်းႁွမ် ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်ဝႆႉ  ၶႃႈဢေႃႈ။

ထၢမ် – ဢွၼ်တၢင်းသုတ်း ယွၼ်းႁႂ်ႈၵပ်းသိုပ်ႇၼႄႉၼမ်းတူဝ်ပၼ် ဢိတ်ႉၼိုင်ႈၶႃႈဢေႃႈ။

တွပ်ႇ – ၸိုဝ်ႈၸၢႆးႁွင်ႉဝႃႈ ၸၢႆးၼုမ်ႇၾႃႉၶႃႈ။ ၸိုဝ်ႈပၢႆးမွၼ်း(artist) တႄႉႁွင်ႉဝႃႈ “ၸဝ်ႈၵေႃႉႁၢၼ် – Z Go Han ” ၼႆဢေႃႈ။

ထၢမ် – ယွၼ်ႉသင်လႄႈ လႆႈလိူၵ်ႈၸိုဝ်ႈပၢႆးမွၼ်း ဢၼ်ၼႆႉၶႃႈ။

တွပ်ႇ – ၸိုဝ်ႈပၢႆးမွၼ်းၼႆႉ ပဵၼ်ပႃႈႁဝ်းဢၼ်ယူႇမိူင်းၵွၵ်ႇၼၼ်ႉ လိူၵ်ႈပၼ်ၶႃႈဢေႃႈ၊ ႁႂ်ႈပဵၼ်ၵႂႃႇ ၵေႃႉႁၢၼ်လႄႈ ႁႂ်ႈပဵၼ်ၸိုဝ်ႈဢၼ်ပႃးၸဝ်ႈ ၼႆၶႃႈ။ ယဝ်ႉၵေႃႈ ႁႂ်ႈပဵၼ်ၸိုဝ်ႈဢၼ်လီထွမ်ႇ၊ ဢၼ်ပိူင်ႈ ပိူၼ်ႈ ၼႆဢေႃႈ။

ထၢမ် – လႆႈႁၼ်ၵူၼ်းပၼ်ႁႅင်း တီႈၼႂ်း Social media ၶဝ်ၵမ်ႈၽွင်ႈလၢတ်ႈဝႃႈ ႁၢင်ႈၾၢင်ငၢမ်းလဝ်း ၼင်ႇၸၢႆးၸိူင်းမိူင်းဝၼ်းတူၵ်းလႄႈ လႅပ်ႈတေဢမ်ႇမေႃလၢတ်ႈၵႂၢမ်းတႆး ၼႆဢေႃႈ။ ၵွပ်ႈၼၼ်လႄႈ ၶႂ်ႈထၢမ်ဝႃႈ ပေႃႈမႄႈပဵၼ်တႆးၶႃႈႁႃႉ၊ ၸႃႇတိတီႉၵိူတ်ႇပဵၼ်ဝဵင်းလႂ် ၼႆဢေႃႈ။

တွပ်ႇ – ပေႃႈမႄႈပဵၼ်တႆး ၶႃႈဢေႃႈ၊ ၵူၺ်းၼႃႇ ပူႇတႄႉၵေႃႈပဵၼ် ႁိၼ်ႇတူႇၶႃႈ။ ၵွပ်ႈၼၼ်လႄႈ ႁၢင်ႈ ၾၢင်ၸင်ႇၸၢပ်ႈဝႆႉ ဢိတ်ႉၼိုင်ႈဢေႃႈ။ ၸၢႆးႁဝ်းတႄႉၵေႃႈ ပဵၼ်ၸႃႇတိတၢင်း ဝဵင်းလႃႈသဵဝ်ႈ၊ မိူင်းတႆး ပွတ်းႁွင်ႇ ၼႆႉၶႃႈ။ လႃႈသဵဝ်ႈၼႆသေတႃႉၵေႃႈ တေဢမ်ႇၸႂ်ႈၼႂ်းဝဵင်းၶႃႈ၊ ပဵၼ်ဝၢၼ်ႈ တၢင်းမိူင်းၵႅတ်ႈ တၢင်းၵႂႃႇတႃႈၶူင်း ၸိူဝ်းၼၼ်ႉၶႃႈဢေႃႈ။ ယဝ်ႉၵေႃႈ မီးပီႈၼွင်ႉ 3 ၵေႃႉ၊ ၸၢႆးႁဝ်းပဵၼ်ၵေႃႉၵၢင်၊ မီးဝႆႉ ပီႈၸၢႆး လႄႈတၢင်း ၼွင်ႉၸၢႆးၶႃႈဢေႃႈ။

ထၢမ် – လိၵ်ႈတႆးၶႃႈလူး ၸွင်ႇမေႃတႅမ်ႈ၊ မေႃဢၢၼ်ႇယူႇၶႃႈႁႃႉ။

တွပ်ႇ – လိၵ်ႈတႆးၼႆႉ မိူဝ်ႈယူႇတီႈဝဵင်းလႃႈသဵဝ်ႈတႄႉ မေႃတႅမ်ႈ၊ မေႃဢၢၼ်ႇ ယူႇၶႃႈ။ မိူဝ်ႈမႃးၽႅဝ်တီႈ ဝဵင်းတႃႈၵုင်ႈ(ယၢၼ်ႇၵုင်ႇ) ၼႆႉတႄႉ ယွၼ်ႉဢမ်ႇပဵၼ်တႅမ်ႈႁိုင်ယဝ်ႉလႄႈ မေႃဢၢၼ်ႇၵူၺ်းယဝ်ႉဢေႃႈ ဢမ်ႇမေႃတႅမ်ႈယဝ်ႉၶႃႈ။ ၵူၺ်းၵႃႈ ယွၼ်ႉပဵၼ်ၶိူဝ်းတႆးလႄႈ လိၵ်ႈတႆးၼႆႉ လူဝ်ႇလႆႈမေႃတႅမ်ႈမေႃဢၢၼ်ႇယူႇၶႃႈ၊ ၵွပ်ႈ ၼၼ်လႄႈ တေၶိုၼ်းၾိုၵ်းၵႂႃႇယူႇဢေႃႈ။

ထၢမ် – ႁဵတ်းၸိူင်ႉႁိုဝ်သေ သူင်ၸႂ်ပႃးဝႃႇသၼႃႇမႃး ၼႂ်းၵၢၼ်လဵၼ်ႈၸိူင်းၼႆႉၶႃႈ။

တွပ်ႇ – မိူဝ်ႈၸၢႆးႁဝ်း ၽႅဝ်ဝဵင်းတႃႈၵုင်ႈၼၼ်ႉ ၸၢႆးလႆႈၶဝ်ႈပႃးတူင်ႉၼိုင် ၼႂ်းၸုမ်းၵေႃလိၵ်ႈလၢႆး လႄႈ ၾိင်ႈငႄႈတႆး တီႈၵျွင်းၵဝ်ႈလၵ်းဢေႃႈ။ ပေႃးပဵၼ်ပွႆးဝၼ်းတႆး၊ ပွႆးပီမႂ်ႇတႆးၸိူဝ်းၼႆႉၼႆ ၸၢႆးႁဝ်းလႆႈ ၵႂႃႇပႆတၢင်း fashion show၊ ယဝ်ႉၵေႃႈ လႆႈၶဝ်ႈပႃးၼႂ်းၾၢႆႇလွင်ႈၵႃႈလွင်ႈဝႅၼ် ၸွမ်းတီႈၾိင်ႈငႄႈတႆး ႁဝ်းၸိူဝ်းၼႆႉဢေႃႈ၊ ပႃးဝႃႇသၼႃႇ  ၼႃႇၶႃႈ။ လုၵ်ႉတီႈၼၼ်ႈသေ ၸၢႆးလႆႈၶဝ်ႈၶႄႉၶႅင်ႇၼႂ်းပၢင်ပွႆး ဢၼ် မီးၸိုဝ်ႈဝႃႈ Dr. Face Grand model 2019 ၼၼ်ႉသေလႆႈဢွင်ႇပေႉပဵၼ် Winner ၊ တႄႇၼၼ်ႉမႃးၵေႃႈ လႆႈသိုပ်ႇႁဵတ်းၵၢၼ်ပဵၼ် model မႃးၶႃႈဢေႃႈ။

ဝၢႆးႁဵတ်းၵၢၼ်ပဵၼ် model မႃးဢမ်ႇပႆႇပေႃးႁိုင် ထိုင်မႃးၼႂ်းပီ 2020 သမ်ႉမႃးၺႃးတၢင်းပဵၼ် covid-19 ၽႄႈလၢမ်းၼၼ်ႉၶႃႈၼႃႇၼေႃႈ။ ယွၼ်ႉငဝ်းလၢႆးတၢင်းပဵၼ်လႄႈ ငဝ်းလၢႆးဝၢၼ်ႈမိူင်းဢမ်ႇလီသေ  လႆႈ လိုဝ်ႈၵၢၼ်ၵႂႃႇပႅတ်ႈမွၵ်ႈ 3 ပီၼႆႉဢေႃႈ။ ထိုင်မႃးၼႂ်းပီ 2023 ၸင်ႇမႃးၶိုၼ်ႈပၢင်သွၼ် ၾၢႆႇလဵၼ်ႈ ၸိူင်းသေ ၶဝ်ႈႁဵတ်းၸၢႆးၸိူင်း ၼႂ်းတူင်ႇဝူင်းၵၢၼ်ပၢႆးမွၼ်းမိူင်းႁူမ်ႈတုမ်မၢၼ်ႈ မႃးဢေႃႈ။ ဢၼ်မႃးယူႇ တီႈ ဝဵင်းတႃႈၵုင်ႈၼႆႉတႄႉ ၸဵမ်မိူဝ်ႈပီ 2019 ယဝ်ႉၶႃႈ။

ထၢမ် – ၼႂ်းပေႃႈမႄႈ ပီႈၼွင်ႉၸိူဝ်ႉၶိူဝ်း ၸိူဝ်းၼႆႉ ၸွင်ႇယၢမ်ႈမီးသေၵေႃႉၵေႃႉ ဢၼ်ပဵၼ်ၸၢႆးၸိူင်း ၼၢင်းၸိူင်းဝႆႉယူႇၶႃႈႁႃႉ။

တွပ်ႇ – ဢမ်ႇပႆႇမီးၽႂ်ၶႃႈ၊ ၸၢႆး ပဵၼ်ၵေႃႉဢွၼ်တၢင်းသုတ်းယဝ်ႉၶႃႈ။

ထၢမ် – မိူဝ်ႈတႄႇယၢင်ႈၶဝ်ႈမႃး ၼႂ်းၵၢၼ်လဵၼ်ႈၸိူင်းၼႆႉ ၸွင်ႇမီးၽႂ်ၸုင်ၸၼ် ၸီႉၼႄပၼ်သဵၼ်ႈ တၢင်းၽွင်ႈၶႃႈ။

တွပ်ႇ – ဢၼ်ပဵၼ် ၶူးသွၼ်(သြႃႇ) သေ ၸုင်ၸၼ်တိုတ်ႉတၢႆးပၼ်ၵေႃႈ မီးယူႇၽွင်ႈၶႃႈ။ ၵူၺ်းၵႃႈ မၼ်း ၵေႃႈယူႇတီႈ လွင်ႈၶတ်းၸႂ်ႁဝ်းပႃးၶႃႈဢေႃႈ။ မိူၼ်ၼင်ႇ ၸၢႆးႁိူင်းၸၢၼ်ႇ (Henry San) လႄႈ ၸၢႆးသီႇတုမ်ႇၶမ်း ၶဝ်ၸိူဝ်းၼႆႉၵေႃႈ ၸွႆႈထႅမ်ၸီႉၼႄသဵၼ်ႈတၢင်းပၼ်ယူႇၶႃႈ။ ဢၼ်ထၢႆႇၸိူင်းဝႆႉၸွမ်း ၵၼ်ၵေႃႈ မီးယူႇဢေႃႈ ၵူၺ်းၵႃႈပႆႇလႆႈပိုၼ်ၽႄႈဢွၵ်ႇမႃးၶႃႈ။

ထၢမ် – မိူဝ်ႈတႄႇယၢင်ႈၶဝ်ႈမႃး ၼႂ်းတူင်ႇဝူင်းၵၢၼ်လဵၼ်ႈၸိူင်းၼႆႉ မီးလွင်ႈယၢပ်ႇၽိုတ်ႇၸိူင်ႉႁိုဝ်ၽွင်ႈ  ၶႃႈ။

တွပ်ႇ –  မိူဝ်ႈတႄႇမႂ်ႇမႂ်ႇၼၼ်ႉ ယွၼ်ႉဢမ်ႇမိုတ်ႈၵိုဝ်းႁူႉၸၵ်းၽႂ်ဝႆႉ ၼႂ်းတူင်ႇဝူင်းၵၢၼ်ပၢႆးမွၼ်း  လႄႈ ယၢပ်ႇၽိုတ်ႇဝႆႉယူႇလၢႆလွင်ႈၶႃႈ။ မိူဝ်ႈၼၼ်ႉမီးပီႈဢၢႆႈၵေႃႉၼိုင်ႈ ၸိုဝ်ႈႁွင်ႉပီႈၸၢႆးယွၼ်းၼႆ ၶဝ်ႁွင်ႉ ႁႂ်ႈႁဵတ်းပၼ် model ၊ လုၵ်ႉတီႈမၼ်းသေ လႆႈၵႂႃႇႁဵတ်းၵၢၼ် တၢင်းၼိုင်ႈယဝ်ႉတၢင်းၼိုင်ႈ၊  ႁဵတ်းၼၼ် သေ မီးတိုဝ်ႉတၢင်းလႆႈမိုတ်ႈၵိုဝ်းႁူႉၸၵ်းၵူၼ်းၼမ်မႃးဢေႃႈ။ မိူဝ်ႈပႆႇမီး ၵူၼ်းႁူႉၸၵ်းၼမ်ၼၼ်ႉတႄႉ ယၢပ်ႇၽိုတ်ႇဝႆႉယူႇဢေႃႈ။

ထၢမ် – ၸိူင်းဢၼ်ထၢႆႇသေ လႆႈပိုၼ်ၽႄႈဢွၵ်ႇၵႂႃႇၼၼ်ႉ တၢင်းမူတ်းတေမီးမွၵ်ႈလၢႆႁူဝ်ၶႃႈ၊ ပဵၼ် ၸိူဝ်းလႂ်လၢႆလၢႆၶႃႈၼေႃ။

တွပ်ႇ – ဢၼ်လႆႈထၢႆႇသေ ပိုၼ်ၽႄႈဢွၵ်ႇၵႂႃႇယဝ်ႉတႄႉ မီးမွၵ်ႈ 5-6 ဢၼ်ယဝ်ႉၶႃႈ။ ဢၼ်ထၢႆႇဝႆႉသေ ပႆႇလႆႈပိုၼ်ၽၢဝ်ႇဢွၵ်ႇသမ်ႉ မီးမွၵ်ႈ 4 -5 ဢၼ်ၼႆႉဢေႃႈ။ တီႈယူႇၸၢႆးတႄႉ မၢင်ဢၼ်ၵေႃႈဢမ်ႇပေႃး ပႃးၼမ်ၶႃႈ။

ၸိုဝ်ႈၸိူင်း ၸိူဝ်းပိုၼ်ၽႄႈဢွၵ်ႇၵႂႃႇယဝ်ႉၼၼ်ႉတႄႉပဵၼ် ရင်ထဲကြွေတဲ့ကြယ်၊ ပါးကွက်ကြားမလေး ရဲ့သင်္ကြန်၊ အရက်စက်ဆုံးအနမ်း၊ နှောင်းလူ ၸိူဝ်းၼႆႉဢေႃႈ၊ မၢင်ဢၼ်တႄႉၵေႃႈ ဢမ်ႇပေႃးတွင်း လႆႈယဝ်ႉၶႃႈ။

ထၢမ် – ၼႂ်းၵၢၼ်ပဵၼ်ၸၢႆးၸိူင်း ဢမ်ႇၼၼ် ၵၢၼ်လဵၼ်ႈၸိူင်းၼႆႉ ႁၼ်ထိုင်ဝႃႈ မီးလွင်ႈၶဵင်ႇတႃႉ၊ လွင်ႈ  ယၢပ်ႇၽိုတ်ႇ ၸိူင်ႉႁိုဝ်ၽွင်ႈၶႃႈ။

တွပ်ႇ – လွင်ႈယၢပ်ႇၽိုတ်ႇ ၼႂ်းၵၢၼ်လဵၼ်ႈၸိူင်းတႄႉ ပဵၼ်လိၵ်ႈမၢၼ်ႈၵႂၢမ်းမၢၼ်ႈၶႃႈ။ ယွၼ်ႉပဵၼ်တႆး လႄႈ ၸဵမ်မိူဝ်ႈၵေႃႉလဵၵ်ႉ တေႃႇထိုင်ပေႃးၵေႃႉယႂ်ႇ လႆႈလၢတ်ႈၵႂၢမ်းတႆး မႃးၵူၺ်း၊  သဵင်လၢတ်ႈ ၵႂၢမ်း မၢၼ်ႈႁဝ်းၵေႃႈ ဢမ်ႇပီႇ၊ ၶဝ်ဝႃႈသဵင်ႁဝ်းလွင်ႈတႆး ဢမ်ႇမိူၼ်မၢၼ်ႈၼႆသေ ဢမ်ႇပၼ်တီႈယူႇၵေႃႈမီး ဢေႃႈ။

ထႅင်ႈလွင်ႈၼိုင်ႈသမ်ႉ တႃႇတေလဵၼ်ႈၸိူင်းၼႆႉ မၼ်းမီး character ဝႆႉၶႃႈၼႃႇၼေႃႈ။ မၢင်ပွၵ်ႈၼႆ character  ဢၼ်ၶဝ်ပၼ်မႃးၼၼ်ႉ ၸၢႆးႁဝ်း ဢမ်ႇၸၢင်ႈလဵၼ်ႈပၼ်ၶဝ်၊ ယွၼ်ႉႁၢင်ႈၾၢင်ၸၢႆး ဢမ်ႇ ပေႃးလႅပ်ႈၸွမ်းၼင်ႇ ဢၼ်ၶဝ်ပၼ်မႃး။ မိူၼ်ၼင်ႇ မၢင်ပွၵ်ႈလႆႈႁဵတ်းပဵၼ်ၵူၼ်းယွၼ်း၊ ၵူၼ်းၵိၼ် ပူႉၸိူဝ်းၼႆႉ ပေႃးမီးၵူၼ်းမႃးၶႅင်ႇၵၼ် 2-3 ၵေႃႉသေလိူၵ်ႈၼႆႉ ၸၢႆးႁဝ်းဢမ်ႇၵႆႉပႃးၵႂႃႇ ယွၼ်ႉဝႃႈ ၽိဝ်ၼိူဝ်ႉၼင်ၶၢဝ်ႁႅင်း ၸဵမ်ၸိူဝ်းၼႆႉဢေႃႈ။

ထၢမ် – ၼႂ်းၵႄႈ မီးလွင်ႈယၢပ်ႇၽိုတ်ႇယူႇလၢႆလွင်ႈၼၼ်ႉ ႁဵတ်းႁႂ်ႈသေၶတ်းၸႂ် ႁႂ်ႈပေႃးယၢင်ႈ ၶဝ်ႈထိုင် ၵႂႃႇလႆႈၼႂ်းတူင်ႇဝူင်းၵၢၼ်ပၢႆးမွၼ်း ၸၼ်ႉမိူင်းႁူမ်ႈတုမ်မၢၼ်ႈၶႃႈ။

တွပ်ႇ – လွင်ႈၼၼ်ႉတႄႉ တေလႆႈဝႃႈ ပဵၼ်ယွၼ်ႉၵၢမ်ႇ လႄႈတင်း လွင်ႈၶတ်းၸႂ်ဢေႃႈ။ မိူၼ်ၼင်ႇ လႆႈ ၶိုၼ်ႈပၢင်သွၼ် ၾၢႆႇလဵၼ်ႈၸိူင်း၊ ပေႃး Director ၶဝ်ႁွင်ႉႁႂ်ႈ ၵႂႃႇထၢႆႇပၼ်ၸိူင်း ၼႆ မၢင်ပွၵ်ႈဢမ်ႇလႆႈ ငိုၼ်း သေတႃႉၵေႃႈၵႂႃႇထၢႆႇပၼ် ၸိူင်ႉၼၼ်ၵေႃႈမီး၊ ၸူၵ်းငိုၼ်းၼႂ်းထွင်းၸဝ်ႈၵဝ်ႇ သေၵႂႃႇၼၼ်ႉ ၶႃႈၼႃႇ ၼေႃႈ၊ မိူဝ်ႈပႆႇလႆႈၸိုဝ်ႈသဵင်တႄႉ ပိူၼ်ႈၸႂ်ႉသင်ၵေႃႈႁဵတ်းပၼ်ၸိူင်ႉၼၼ်ဢေႃႈ။ ၵူၺ်းၵႃႈမၢၵ်ပွၵ်ႈ ၵေႃႈ ပိူၼ်ႈတေဝူၼ်ႉဝႃႈႁဝ်းဢမ်ႇမီးၵႃႈၶၼ်ၼႆလႄႈ ဝၢႆးလင်ၼႆႉတႄႉ ဢမ်ႇႁဵတ်းၸိူင်ႉၼၼ်ယဝ်ႉၶႃႈ။

ထၢမ် – လိူဝ်သေ ၵၢၼ်လဵၼ်ႈၸိူင်းယဝ်ႉ ၵၢၼ်ပၢႆးမွၼ်းတၢင်ႇဢၼ် မိူၼ်ၼင်ႇ ႁွင်ႉၽဵင်းၵႂၢမ်း ၸိူဝ်းၼႆႉ လူး ၸွင်ႇသူၼ်ၸႂ်ယူႇၶႃႈႁႃႉ။

တွပ်ႇ – ၾၢႆႇႁွင်ႉၽဵင်းၵႂၢမ်းၵေႃႈ သူၼ်ၸႂ်ယူႇၶႃႈ။ ၸဵမ်မိူဝ်ႈၵေႃႉလဵၵ်ႉၵေႃႈ လႆႈထွမ်ႇၽဵင်းၵႂၢမ်းတႆးႁဝ်း မႃးလႄႈ ပေႃးပဵၼ်ၵႂၢမ်းတႆး၊ ၵႂၢမ်းဢင်းၵိတ်းၸိူဝ်းၼႆႉတႄႉႁွင်ႉလႆႈယူႇၶႃႈ၊ ၽဵင်းၵႂၢမ်းမၢၼ်ႈတႄႉ ဢမ်ႇပေႃးလႆႈၶႃႈ။

ၸၢႆးႁဝ်းမီးယိူင်းဢၢၼ်းဝႆႉဝႃႈ ၶႂ်ႈသွၼ်ႁွင်ႉၽဵင်းၵႂၢမ်း ၼႆယူႇၶႃႈ။ မိူၼ်ၼင်ႇၾၢႆႇ လဵတ်းတိင်ႇ (guitar) ၸိူဝ်းၼႆႉၵေႃႈ ပႃးဝႃႇသၼႃႇဢေႃႈ တိုၵ်ႉႁႂ်ႈဢူၺ်းၵေႃႉၽိုၵ်းသွၼ်ပၼ်ဝႆႉယူႇၶႃႈ ႁိုမ်ႈ…ႁိုမ်ႈ…။

ထၢမ် – တီႈၼႂ်းတူင်ႇဝူင်း ၵၢၼ်ပၢႆးမွၼ်းၸၼ်ႉမိူင်းႁူမ်ႈတုမ်မၢၼ်ႈၼႆႉ ၸိူဝ်းပဵၼ်မၢဝ်ႇသၢဝ်တႆးသေ ၵႂႃႇႁဵတ်း ၸၢႆးၸိူင်း၊ ၼၢင်းၸိူင်းဝႆႉၶႃႈလူး…ၸင်ႇႁၼ်မႅၼ်ႈဝႃႈ မီးၼမ်ယူႇၶႃႈႁႃႉ။

တွပ်ႇ – မီးဝႆႉလၢႆၵေႃႉယူႇဢေႃႈ။ မိူၼ်ၼင်ႇၸိူဝ်းပဵၼ်လုၼ်ႈပီႈၼႆ တေမီး ၸၢႆးသီတုမ်ႇၶမ်း၊ ၼၢင်း ၸၼ်ႇတႃႇလႃႉထုၼ်း၊ ႁၢၼ်ႇလေး ၶဝ်ၸိူဝ်းၼႆႉဢေႃႈ။ ဢၼ်ၶိုၼ်းမႃးပၢၼ်လဵဝ်ၵၼ်သေ ပဵၼ် ဢူၺ်း ၵေႃႉၵၼ်သမ်ႉတေမီး ၸၢႆးႁိူင်းၸၢၼ်ႇ (Henry San) ၊ ၸၢႆးမဵဝ်းမိၼ်းတၢၼ်ႉ၊ ၸၢႆးၵွင်းမိၼ်းထႅတ်ႉ၊ ၸၢႆးၼေႇပလု ၸိူဝ်းၼႆႉဢေႃႈ၊ ဢၼ်ပဵၼ်တႆးၼႆႉ မီးၼမ်ယူႇၶႃႈ မီးမွၵ်ႈ 10 ပၢႆၼႆႉဢေႃႈ။ မိူဝ်ႈလဵဝ်ၵေႃႈ မီးမႃးထႅင်ႈ JK Sophia ၶႃႈၼႃႇၼေႃႈ။

ထၢမ် – ၵွၼ်ႇတေပဵၼ်မႃးၸၢႆးၸိူင်းၼႆႉ ၸွင်ႇမီးဝႆႉ idol ဢၼ်ပဵၼ်တႆးယူႇၶႃႁႃႉ။

တွပ်ႇ – Idol ၼႂ်းတႆးၼႆတႄႉပဵၼ် ၸၢႆးသီတုမ်ႇၶမ်း လႄႈတၢင်း ၸၢႆးလဵၵ်ႉဢေႃႈ။ ၸဵမ်မိူဝ်ႈ ၸၢႆးႁဝ်း ၵေႃႉလဵၵ်ႉၼၼ်ႉ ယၢမ်ႈထွမ်ႇၽဵင်းၵႂၢမ်း လႄႈတင်း ၸိူင်းဢၼ်ၸၢႆးလဵၵ်ႉၶဝ် ထၢႆႇမႃးၼၼ်ႉဢေႃႈ။  တေႃႈလဵဝ်ၵေႃႈၼႂ်း Facebook ၼႆႉပဵၼ်ဢူၺ်းၵေႃႉၵၼ်တင်း ၸၢႆးလဵၵ်ႉဝႆႉယူႇဢေႃႈ ႁိုမ်ႈ…ႁိုမ်ႈ။

ထၢမ် – ၸိူင်းဢၼ်ႁၢင်ႈႁႅၼ်းဝႆႉ တေဢွၵ်ႇမႂ်ႇလူး မီးဝႆႉလၢႆဢၼ်ၶႃႈ ယဝ်ႉၵေႃႈ တေပႂ်ႉပၼ်ႁႅင်းလႆႈ တီႈလႂ်ၽွင်ႈၶႃႈၼေႃ။

တွပ်ႇ – ၸိူင်းဢၼ်ပဵၼ် series တႄႉမီးဝႆႉ 2 ဢၼ်ၶႃႈ၊ ဢၼ်ပဵၼ်ၸိူင်း ရုပ်ရှင် လူင်တႄႉမီးဝႆႉၼိုင်ႈ ဢၼ်ဢေႃႈ။ တေႃႈလဵဝ်တႄႉ တေပိုၼ်ၽႄႈၼႄတီႈလႂ်ၼႆ ပႆႇလႆႈႁူႉၶႃႈ၊ သင်ဝႃႈႁူႉယဝ်ႉၼႆတႄႉ ၸၢႆးတေၶိုၼ်း မွၵ်ႇလၢတ်ႈၼႄပီႈၼွင်ႉႁဝ်းၶႃႈ တီႈၼႂ်း TikTok လႄႈတၢင်း Facebook ယူႇဢေႃႈ။

ထၢမ် – မိူဝ်ႈၼႃႈမႃး ၸွင်ႇမီးဝႆႉၽႅၼ်ၵၢၼ် တႃႇတေထၢႆႇၸိူင်းတႆး ယူႇၶႃႈႁႃႉ။

တွပ်ႇ – ပေႃးမီးတိုဝ်ႉတၢင်း၊ မီး Director ၶဝ်ႁွင်ႉမႃးၼႆတႄႉ ၶႂ်ႈထၢႆႇယူႇၶႃႈ။ မိူဝ်ႈၸၢႆးၵေႃႉလဵၵ်ႉၼၼ်ႉ ယၢမ်ႈလႆႈတူၺ်းၸိူင်းတႆး “ဢၢႆႈၸွၵ်ႇၸၢင်ႈပႅတ်ႉ” ၼႆၼၼ်ႉဢေႃႈ၊ ယင်းတိုၵ်ႉတွင်းဝႆႉတေႃႇထိုင်ယၢမ်း လဵဝ်ယူႇၶႃႈ။ ၵူၺ်းၵႃႈ ၸိူင်းတႆးႁဝ်းၵေႃႈ ဢမ်ႇဢွၵ်ႇမႃး ႁိုင်ယဝ်ႉၶႃႈၼႃႇၼေႃႈ။

ထၢမ် – ၼႂ်းၵူၼ်းၼုမ်ႇတႆးႁဝ်းၶႃႈၼႆႉ ၸိူဝ်းမီးၼမ်ႉၵတ်ႉ၊ မီးႁၢင်ႈၾၢင် ႁၢင်ႈလီႁၢင်ႈငၢမ်းၵေႃႈ ၼမ်ၼႃႇ ၶႃႈၼေႃႈ။ ၵူၺ်းၵႃႈ ပႆႇလႆႈႁၼ်ပၢႆးမွၼ်းဢၼ်တႆးႁဝ်းၶႃႈ ႁဵတ်းဢွၵ်ႇမႃး ၵပ်းၵပ်းတၢမ်းတၢမ်း၊ ၵွပ်ႈ ၼၼ်လႄႈ ႁၼ်ထိုင်ဝႃႈ ၵၢၼ်ပၢႆးမွၼ်းတႆးႁဝ်းၶႃႈၼႆႉ ထုၵ်ႇလီယုၵ်ႉၸၼ်ႉၶိုၼ်ႈမႃးၸိူင်ႉႁိုဝ်ၽွင်ႈ ၼႆဢေႃႈ။

တွပ်ႇ –  ၼႂ်းၵၢၼ်ပၢႆးမွၼ်းတႆးႁဝ်းၶႃႈၼႆႉၵေႃႈ ထုၵ်ႇလီမီးၸိူင်းဢၼ်လီ ဢၼ်ၶႅမ်ႉၼမ်ၼမ်ယူႇၶႃႈ။ မိူဝ်ႈႁဝ်းၵေႃႉလဵၵ်ႉ မိူၼ်ၼင်ႇၸိူင်း “ဢၢႆႈၸွၵ်ႇၸၢင်ႈပႅတ်ႉ” ၼႆႉၵေႃႈ မီးၵူၼ်းၶတ်းၸႂ်ႁဵတ်းမႃးယူႇ။ တႃႇတေပဵၼ်ၸိူင်းမႃးၼၼ်ႉၵေႃႈ လူဝ်ႇမီးမိူၼ်ၼင်ႇ director ၶဝ်၊ ၵူၼ်းတႅမ်ႈၸိူင်း (script writer) ၶဝ်ၸိူဝ်းၼႆႉ ႁႂ်ႈပဵၼ်ၸုမ်း(Team) ဝႆႉယူႇဢေႃႈ။

ယူႇတီႈသုၼ်ႇတူဝ် ၸၢႆးႁဝ်းတႄႉ ႁၼ်မႅၼ်ႈဝႃႈ တႆးႁဝ်းၼႆႉ တိုၵ်ႉႁဵတ်းၽႂ်ႁဵတ်းမၼ်း၊ ၶတ်းၸႂ်ၽႂ်ၶတ်း ၸႂ်မၼ်းဝႆႉယူႇ၊ ႁႂ်ႈဝႃႈ ၸွႆႈၵၼ်သေႁဵတ်းၼႆပႆႇႁၼ်ၼမ်၊ ပႆႇမီး။ ၾၢႆႇၼိုင်ႈၵေႃႈ ပေႃးတူဝ်ႁဝ်းပႆႇဢူဝ်း ၶေးၵေႃႈ ပႆႇၸၢင်ႈၸွႆႈပိူၼ်ႈ၊ တႃႇၸွႆႈၼၼ်ႉမၼ်းတေယၢပ်ႇၼၼ်ႉၶႃႈၼႃႇ။ သင်ဝႃႈမိူဝ်းၼႃႈမႃးတႄႉ ၵေႃႈ ၶႂ်ႈႁၼ်ၸိူင်းတႆးႁဝ်း မီးလွင်ႈၶိုၼ်ႈယႂ်ႇမႃးယူႇၶႃႈ။

ထၢမ် – သင်ၶႂ်ႈပၼ်ႁႅင်း ၸၢႆးၼုမ်ႇၾႃႉ (Z Go Han) ၼႆၸိုင် တေပၼ်ႁႅင်းလႆႈတီႈလႂ်လၢႆလၢႆၽွင်ႈၶႃႈ။

တွပ်ႇ – ဢေႃႈၶႃႈ…ပေႃးၶႂ်ႈပၼ်ႁႅင်းၸၢႆးႁဝ်းၼႆတႄႉ ပၼ်ႁႅင်းတီႈ Facebook လႄႈတၢင်း TikTok  လႆႈ ယူႇၶႃႈ။ ၵမ်ႈၼမ်တႄႉ ၸၢႆးၸႂ်ႉဝႆႉသွင်ဢၼ်ၼႆႉဢေႃႈ။ ၸိုဝ်ႈဢၵွင်ႉ(account) တႄႉသႂ်ႇဝႆႉတၢင်း လိၵ်ႈ ဢင်းၵိတ်းဝႃႈ “ Z Go Han ” ၼႆၶႃႈ၊  ႁိမ်းၶၢင်ႈၼၼ်ႉၵေႃႈ တႅမ်ႈသႂ်ႇပႃးလိၵ်ႈတႆးဝႃႈ “ၸၢႆးၼုမ်ႇၾႃႉ” ၼႆယူႇၶႃႈ။

ထၢမ် – ၼႂ်းၵႄႈငဝ်းလၢႆးဝၢၼ်ႈမိူင်း ဢမ်ႇၼိမ်သဝ်းၼႆႉ ယူႇတီႈပဵၼ်ၵူၼ်းၼုမ်ႇ ၵေႃႉၶတ်းၸႂ်ယၢင်ႈၸူး ယိူင်းမၢႆ ၵေႃႉၼိုင်ႈသေ  တေၶႂ်ႈၾၢၵ်ႇၶေႃႈၵႂၢမ်းပၼ်ႁႅင်းၸႂ်ၵူၼ်းၼုမ်ႇတႆးႁဝ်း ၸိူင်ႉႁိုဝ်ၽွင်ႈၶႃႈ။

တွပ်ႇ – ဢိင်ၼိူဝ်ငဝ်းလၢႆးဝၢၼ်ႈမိူင်းႁဝ်း ဢမ်ႇၼိမ်သဝ်းသေ ၸၢႆးလႄႈတင်း ပေႃႈမႄႈၵေႃႈ ယၢမ်ႈလႆႈ ပၢႆႈၽေးသိုၵ်းမႃးယူႇၶႃႈ။ ၵူၺ်းၵႃႈ ၸိူင်ႉႁိုဝ်ၵေႃႈယဝ်ႉ ယႃႇပေၸႂ်တူၵ်း၊ လူဝ်ႇလႆႈဝႆႉၸႂ်ၵႅၼ်ႇ ၶႅင်ၶႃႈ ဢေႃႈ။ ဝၼ်းၼိုင်ႈ သင်ဝၢၼ်ႈမိူင်းႁဝ်းၵတ်းယဵၼ်လႄႈ ၾိင်ႈထုင်းႁဝ်းၶိုၼ်ႈယႂ်ႇမႃးၸိုင် လွင်ႈလႆႈမႆႈၸႂ် ၸိူဝ်းၼႆႉၵေႃႈ တေယွမ်းလူင်းၵႂႃႇ၊ ၵူၼ်းၼုမ်ႇၸိူဝ်းၽၢတ်ႇယၢၼ်မိူင်းၼႆၵေႃႈ တေၸၢင်ႈပွၵ်ႈ ၶိုၼ်းမိူင်း ႁဝ်းယူႇ ယၢမ်းလဵဝ်တႄႉလူဝ်ႇၶတ်းၸႂ်ယူႇသဝ်းၵႂႃႇႁႂ်ႈလႆႈဢေႃႈ၊ ၸၢႆးၵေႃႈၶတ်းၸႂ်ဝႆႉယူႇ၊ ႁႂ်ႈဝႃႈၵျေႃႇ ၼႆတႄႉ ၽႂ်ၵေႃႈဢမ်ႇၵျေႃႇၶႃႈ၊ ဢမ်ႇၵျေႃႇသေတႃႉၵေႃႈ ယႃႇပေၸႂ်တူၵ်းၶႃႈၼေႃႈ၊ ၶႂ်ႈႁႂ်ႈ ၶတ်းၸႂ်သေ ဝႆႉၸႂ်ၵႅၼ်ႇၶႅင်ၵႂႃႇၵူႈၵေႃႉဢေႃႈ…fighting ၶႃႈ။

ထၢမ် – ၵမ်းလိုၼ်းသုတ်း တေၶႂ်ႈသူင်ႇသင်ႇထိုင် ပီႈၼွင်ႉၽူႈပၼ်ႁႅင်းၸိူင်ႉႁိုဝ်ၽွင်ႈၶႃႈ။

တွပ်ႇ  – လိုၼ်းသုတ်းတႄႉၵေႃႈ ၸၢႆးႁဝ်းယိၼ်းၸူမ်းထိုင် ပီႈၼွင်ႉတႆးႁဝ်းၵူႈၵေႃႉ ၸိူဝ်းတႅမ်ႈ comments ပၼ်ႁႅင်းၸၢႆးႁဝ်းမႃးၼႂ်း TikTok လႄႈတင်း Facebook ၸိူဝ်းၼႆႉယူႇၶႃႈ၊ ၸိူဝ်းၼႆႉပဵၼ်ႁႅင်း ၸႂ် တႃႇၸၢႆးႁဝ်း တေသိုပ်ႇၶတ်းၸႂ်ၵႂႃႇမိူဝ်းၼႃႈတႄႉတႄႉဢေႃႈ၊ ယိၼ်းၸူမ်းၶွပ်ႈၸႂ်ထိုင်ၵူႈၵေႃႉတႄႉ တႄႉၶႃႈ။ ၸၢႆးၵေႃႈ တေသိုပ်ႇၶတ်းၸႂ်ၵႂႃႇ ၼင်ႇႁိုဝ်ပီႈၼွင်ႉတႆးႁဝ်း ပေႃးတေလႆႈဢဝ်ၵုင်ႇမုၼ်ႁူမ်ၸူမ်း ၸွမ်း ၶႃႈၸၢႆးယူႇဢေႃႈ။ မႂ်ႇသုင်ၶႃႈ…။