ၸဝ်ႈႁႆႈ/ ၼႃး ၼႂ်းၸႄႈဝဵင်းလႃႈသဵဝ်ႈ တင်း ႁွင်ႈၵၢၼ်လူင်ပွင်ၸိုင်ႈမၢၼ်ႈ ႁူပ်ႉထူပ်းၵၼ် တၢင်ႇလၢတ်ႈၼႄ လွင်ႈယၢပ်ႇၽိုတ်ႇၵူၼ်းမိူင်းလႄႈ ၸဝ်ႈႁႆႈၸဝ်ႈၼႃး ၼႂ်းပိုၼ်ႉတီႈ ၸႄႈဝဵင်းလႃႈသဵဝ်ႈ ဝႃႈၼႆ။

ဝၼ်းတီႈ 24/08/2018 ယၢမ်းၵၢင်ၼႂ် 9:00 မူင်း ထိုင် 12:30 မူင်း ၸုမ်းၵူၼ်းၼုမ်ႇတႆး Tai Youth Organization (TYO) ဢွၼ်ႁူဝ်သေ ၸတ်းႁဵတ်းပၢင်ႁူပ်ႉထူပ်းဢုပ်ႇဢူဝ်း ၸဝ်ႈႁႆႈ/ ၼႃး တင်း ႁွင်ႈၵၢၼ်လူင်ပွင်ၸိုင်ႈမၢၼ်ႈ တီႈ လုမ်းၵူၼ်းၼုမ်ႇတႆး TYO ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ဝႃႈၼႆ။

ၸၢႆးႁၢၼ် ႁူဝ်ပဝ်ႈၸုမ်းၵူၼ်းၼုမ်ႇတႆး TYO ၵိင်ႇၽႄၸိုင်ႈတႆးပွတ်းႁွင်ႇ လၢတ်ႈတီႈၽူႈတွႆႇႁွၵ်ႈဝႃႈ “ ယိူင်းဢၢၼ်း ဢၼ်ႁဝ်းၶႃႈ ၸတ်းႁဵတ်းၼႆႉ ၼႂ်းလူင်ပွင်ၸိုင်ႈလႄႈပေႃႈႁႆႈမႄႈၼႃးႁဝ်းၶဝ် ႁႂ်ႈလႆႈလွင်ႈ ၶဝ်ၸမ်ၸႂ်ၵၼ်ၵႂႃႇ ႁႂ်ႈမီးလွင်ႈႁတ်းလၢတ်ႈႁတ်းၸႃ တေႃႇၵၼ် မိူၼ်ၼင်ႇ ၾၢႆႇပေႃႈႁႆႈမႄႈၼႃးၵေႃႈ လူဝ်ႇၸိူင်ႉႁိုဝ် လူဝ်ႇဢီႈသင် ဢၼ်ႁဝ်းလူဝ်ႇယူႇၼႆႉ မၼ်းသမ်ႉ ၵပ်းၵၢႆႇႁွင်ႈၵၢၼ်လႂ်ၼႆၵေႃႈ ႁႂ်ႈပေႃးလႆႈႁူႉၵႂႃႇ” ဝႃႈၼႆ။

ၼႂ်းပၢင်ႁူပ်ႉထူပ်းၼႆႉ ၸဝ်ႈႁႆႈ/ၼႃး ၵူၼ်းမိူင်းၼႂ်းပိုၼ်ႉတီႈၶဝ်ႈႁူမ်ႈ မီး 70 ပၢႆ မိူၼ်ၼင်ႇ ဢိူင်ႇႁူဝ်ပိုၵ်ႉ၊ ဢီႇၼၢႆး၊ မိူင်းယေႃ၊ ၼမ်ႉပွင်ႈလႄႈ ၼွင်မွၼ် ၸိူဝ်းၼႆႉ ဝႃႈၼႆ။

ၼႂ်းႁွင်ႈၵၢၼ်လူင်ပွင်ၸိုင်ႈမၢၼ်ႈ ဢၼ်မႃးႁူပ်ႉထူပ်းၵူၼ်းမိူင်းသမ်ႉ မိူၼ်ၼင်ႇ ႁွင်ႈၵၢၼ်ၾၢႆႇတီႈလိၼ်၊ ႁွင်ႈၵၢၼ် ၽူႈၵွၼ်းၸႄႈဝဵင်း၊ ႁွင်ႈၵၢၼ်ၾၢႆႇပႃႇမႆႉ၊ ႁွင်ႈၵၢၼ်ၾၢႆႇၽုၵ်ႇသွမ်ႈလႄႈ ႁွင်ႈၵၢၼ်မုၼ်းလႅင်းဝၢၼ်ႈဢိူင်ႇ ၸိူဝ်းၼႆႉ။

ၸၢႆးႁၢၼ် လၢတ်ႈဝႃႈ “ မိူၼ်ၼင်ႇ ႁွင်ႈၵၢၼ် ၾၢႆႇတီႈလိၼ်ၼႆၵေႃႈ ၶဝ်သပ်းလႅင်း လွင်ႈတႃႇတေႁဵတ်း ဝႂ်တီႈ လိၼ် ၼၼ်ႉ ႁဝ်းၶႃႈ တေလႆႈတၢင်ႇၸိူင်ႉႁိုဝ် ႁဵတ်းၸိူင်ႉႁိုဝ်။ ၾၢႆႇၽုၵ်ႇသွမ်ႈသမ်ႉ တေလူင်းပိုၼ်ႉတီႈ ၸွႆႈႁူတ်းယႃပၼ် မူင်ႈမႅင်း ဢၼ်ၶူပ်းယႃႉၶဝ်ႈၵၢပ်ႇၼၼ်ႉ။ ၾၢႆႇမုၼ်းလႅင်း ၸွမ်းဝၢၼ်ႈဢိူင်ႇၵေႃႈ သပ်းလႅင်းၼႄဝႃႈ ႁိူၼ်းၵူၼ်းဝၢၼ်ႈ ႁဝ်း ၸိူဝ်းဢမ်ႇလႆႈၾႆးၸိူဝ်းၼၼ်ႉ ၶဝ်တေပၼ်ၾႆးသႅင်လႅတ်ႇလႆႈ။ ယဝ်ႉၵေႃႈ သင်ဝႃႈ ဝၢၼ်ႈၼိုင်ႈဝၢၼ်ႈ လင်ႁိူၼ်း တဵမ် 50 လင် တေပၼ်ငိုၼ်း 300 သႅၼ်ပျႃး တႃႇပူၵ်းပွင် ႁႂ်ႈမူႇဝၢၼ်ႈၶိုၼ်ႈယႂ်ႇ” ဝႃႈၼႆ။