ပၢႆႉတၢင်းၶဝ်ႈ/ ဢွၵ်ႇ ဝဵင်းၵဵင်းတုင်ၼၼ်ႉ ၵူၼ်းမိူင်းၵဵင်းတုင် တုၵ်းယွၼ်းႁႂ်ႈလႆႈပႃး လိၵ်ႈတႆး – လိၵ်ႈၶိုၼ်

ပၢႆႉတၢင်းၶဝ်ႈဢွၵ်ႇ ဝဵင်း ၵဵင်းတုင် တႃႇ 5 တီႈၼၼ်ႉ ၼင်ႇႁိုဝ် တေလႆႈသႂ်ႇလိၵ်ႈတႆး- လိၵ်ႈၶိုၼ်ၼၼ်ႉ ၵူၼ်းမိူင်း        ၵဵင်းတုင် တႅမ်ႈလိၵ်ႈတုၵ်းယွၼ်းဝႆႉလူင်ပွင်ၸိုင်ႈမိူင်းတႆး ယင်းပႆႇတွပ်ႇသင်ၶိုၼ်း။

ယူႇတီႈမုၵ်ႉၸုမ်းပူၵ်းပွင်ၶိုၼ်း ၶူဝ်းၶွင်ၵူၼ်းပိုၼ်ႉမိူင်း ၸႄႈဝဵင်းၵဵင်းတုင် တႅမ်ႈလိၵ်ႈထိုင် လူင်ပွင်ၸိုင်ႈမိူင်းတႆး           မိူဝ်ႈၼႂ်းလိူၼ်ၵျုၼ်ႊ ပီ 2018 ၼၼ်ႉ ဝႃႈပၢႆႉတၢင်းၶဝ်ႈ/ဢွၵ်ႇ ဝဵင်းၵဵင်းတုင်ၼၼ်ႉ ႁႂ်ႈပႃးလိၵ်ႈတႆး တင်းလိၵ်ႈတႆးၶိုၼ် ယွၼ်ႉ ၼၼ်လႄႈ ၶႂ်ႈႁႂ်ႈလူင်ပွင်ၸိုင်ႈမိူင်းတႆး ဢၼုၺၢတ်ႈ(ၶႂၢင်ႉ) ပၼ်ႁဵတ်းပၢႆႉမႂ်ႇ။ ယူႇတီႈၵူၼ်းမိူင်းသေ တေႁဵတ်း ပၢႆႉမႂ်ႇ 5 တီႈပဵၼ်တၢင်းၶဝ်ႈဢွၵ်ႇဝဵင်း မိူၼ်ၼင်ႇ ၵဵင်းတုင် – တူၼ်ႈတီး တီႈၼိုင်ႈ၊ ၵဵင်းတုင် – တႃႈၶီႈလဵၵ်းတီႈၼိုင်ႈ၊ ၵဵင်းတုင် – မိူင်းလႃး တီႈ ၼိုင်ႈ၊ ၵဵင်းတုင် – လွႆမူၺ် တီႈၼိုင်ႈလႄႈ ၵဵင်းတုင် – မိူင်းၶၢၵ်ႇ တီႈၼိုင်ႈ ဝႃႈၼႆ။

လုင်းၸၢႆးသၢမ်တိပ်ႉသိူဝ် ၵႅမ်ၽူႈၼမ်းၼႂ်းၶွမ်ႊမတီႊ မုၵ်ႉၸုမ်းပူၵ်းပွင်ၶိုၼ်း ၶူဝ်းၶွင်ၵူၼ်းပိုၼ်ႉမိူင်း ၸႄႈဝဵင်းၵဵင်းတုင် လၢတ်ႈတီႈၸုမ်းၶၢဝ်ႇၽူႈတွႆႇဝႃႈ “ ႁဝ်းၶႃႈ ႁဵတ်းလိၵ်ႈတၢင်ႇထိုင်တီႈလူင်ပွင်ၸိုင်ႈမိူင်းတႆးၼႆႉ မီးၶၢဝ်းတၢင်း 2 လိူၼ်  ယဝ်ႉ ၶဝ်ဢမ်ႇ လၢတ်ႈသင်မႃးၶိုၼ်း။ ၶဝ်ၵူဝ်မီးပၼ်ႁႃ မိူၼ်တၢင်းတႃႈၶီႈလဵၵ်း တင်းတူၼ်ႈတီးၼၼ်ႉႁိုဝ် ဢမ်ႇႁူႉ။  မိူၼ်တၢင်း တႃႈၶီႈလဵၵ်းၼၼ်ႉ ပၢႆႉၶဝ်ႈဝဵင်း ၺႃးၾႆးၽဝ်ၼႃႇ။ တီႈတူၼ်ႈတီးၵေႃႈ ဢမ်ႇပႃးလိၵ်ႈပဢူဝ်း ၸိူဝ်းၼႆႉႁိုဝ်  ဢမ်ႇႁူႉ။ လိူဝ်ၼၼ်ႉ ႁဝ်းၵေႃႈ ၶိုၼ်းႁဵတ်းလိၵ်ႈထႅင်ႈသေ သူင်ႇၸူးပၼ်ပႃႇတီႇၼူၵ်ႉယုင်း ၶဝ်ဝႃႈ တေတၢင်ႇပၼ်ထႅင်ႈ ၵမ်းၼိုင်ႈ” ဝႃႈၼႆ။

ပၢႆႉဢၼ်တေၶႂ်ႈႁဵတ်းမႂ်ႇၼႆႉ ပဵၼ်တီႈဢၼ် ပၢႆႉၵဵင်းတုင် ယၢမ်ႈမီးၸဵမ်ပၢၼ်ပူႇမွၼ်ႇၼၼ်ႉ တေဢၢၼ်းတႅမ်ႈသႂ်ႇ          ထႅဝ်လိၵ်ႈ လိၵ်ႈမၢၼ်ႈ၊ လိၵ်ႈတႆးလႄႈ လိၵ်ႈတႆးၶိုၼ် 3 ၽႃသႃ ဝႃႈၼႆ။

လုင်းၸၢႆးသၢမ်တိပ်ႉသိူဝ် လၢတ်ႈဝႃႈ “ သင်ဝႃႈ ၶဝ်ပၼ်ၶႂၢင်ႉယဝ်ႉၸိုင် ႁဝ်းတေၵေႃႇသၢင်ႈႁဵတ်းပၢႆႉ 2 တီႈၵမ်းလဵဝ် တေ ပဵၼ် တၢင်းၶဝ်ႈဝဵင်း ၵဵင်းတုင် – တႃႈၶီႈလဵၵ်း တီႈၼိုင်ႈလႄႈ ၵဵင်းတုင် – တူၼ်ႈတီး တီႈၼိုင်ႈ။ မိူင်းႁဝ်းဝဵင်းႁဝ်း    ႁဝ်းၵေႃႈၶႂ်ႈႁႂ်ႈပႃးလိၵ်ႈႁဝ်းၶိုၼ်းၼၼ်ႉၼႃႇ၊ ဢၼ်မၢၼ်ႈၶဝ်ႁဵတ်းၼႆႉ ပႃးလိၵ်ႈမၢၼ်ႈတင်း ဢင်းၵိတ်းၵူၺ်းလူး။  လွင်ႈၼႆႉ ပေႃးၶဝ်မီးၸႂ်ၵႂၢင်ႈၼႆ မၼ်းဢမ်ႇယၢပ်ႇသင်လူး” ဝႃႈၼႆ။

တေႃႈလဵဝ် ပၵ်းပိူင် ၾၢင်ႁၢင်ႈ တႃႇတေၵေႃႇသၢင်ႈပၢႆႉၶဝ်ႈ/ဢွၵ်ႇ ဝဵင်းၵဵင်းတုင်ၼႆႉ ႁၢင်ႈႁႅၼ်းယဝ်ႉတူဝ်ႈလီငၢမ်းယဝ်ႉ။ သင်ဝႃႈ တၢင်းလူင်ပွင်ၸိုင်ႈမိူင်းတႆး ပၼ်ၶႂၢင်ႉမႃးၸိုင် တေလူင်းမိုဝ်းႁဵတ်းသၢင်ႈၵႂႃႇၵမ်းလဵဝ်။ ပၢႆႉၶဝ်ႈဝဵင်းၼိုင်ႈ ဢၼ်ၼႆႉ တေတူၵ်းမွၵ်ႈငိုၼ်း တႃႇ 50 သႅၼ်ပျႃး ဝႃႈၼႆ။