တီႇမူဝ်ႇၶရႅတ်ႉတိၵ်ႉပႃႇတီႇၸၢဝ်းၶိူဝ်းတႆး SNDP ႁိုဝ်ပႃႇတီႇသိူဝ်ၽိူၵ်ႇလႄႈ ၸုမ်းၶွတ်ႇလိူတ်ႈ UP ဢွၵ်ႇလိၵ်ႈတုၵ်းယွၼ်းထိုင် တပ်ႉသိုၵ်းတဢၢင်း TNLA ႁႂ်ႈပွႆႇပၼ်တူဝ်ၼၢင်းမူဝ်ႁွမ်ဝႆးဝႆး။

လိၵ်ႈသူင်ႇၸူး TNLA မိူဝ်ႈဝၼ်းတီႈ 25/08/2018 ၼၼ်ႉပႃးဝႆႉဝႃႈ ႁႂ်ႈၸုမ်းသိုၵ်းတဢၢင်း TNLA တူၺ်းၼႃႈ ၵူၼ်းဝၢၼ်ႈၵူၼ်းမိူင်း ယိူင်းဢၢၼ်းထိုင်လွင်ႈငမ်းယဵၼ်သေ ပွႆႇပၼ်တူဝ် ၼၢင်းမူဝ်ႁွမ်ၶိုၼ်း ဝႆးဝႆးသေၵမ်းဝႃႈၼႆ။

လုင်းၸၢႆးဢၢႆႈပဝ်း ႁူဝ်ပဝ်ႈပႃႇတီႇသိူဝ်ၽိူၵ်ႇ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ – “ ဢၼ်ဝႃႈၽိတ်းပၵ်းပိူင် TNLA ဢၼ်ဝႃႈၼၼ်ႉ မၼ်းဢမ်ႇၸႂ်ႈလွင်ႈတၢင်းမၼ်း ယွၼ်ႉၶဝ်ဢမ်ႇၸႂ်ႈလူင်ပွင်ၸိုင်ႈလူး ၊ ၼင်ႇႁိုဝ်ဝၢၼ်ႈမိူင်းတေ ၶိုၼ်ႈယႂ်ႇၵတ်းယဵၼ်ၼၼ်ႉ ၵူႈၵေႃႉၵူႈၾၢႆႇမီးပုၼ်ႈၽွၼ်းယဝ်ႉ။ ၵွပ်ႈၼၼ် ဢၼ်တီႉၺွပ်းၵႂႃႇ ၼၢင်းမူဝ်ႁွမ်ၼႆႉ မၼ်းတုမ်ႉတိူဝ်ႉၵူၼ်းဝၢၼ်ႈ ၵူၼ်းမိူင်း မၼ်းတုမ်ႉတိူဝ်ႉလွင်ႈငမ်းယဵၼ်ၶႃႈယဝ်ႉ။ ၼၢင်းမူဝ်ႁွမ်ၼႆႉ မီးဝႆႉလုၵ်ႈ3 ၵေႃႉ။ ၶႅၼ်းတေႃႈတူၺ်းႁၼ်ၼႃႈလုၵ်ႈဢွၼ်ႇသေ ပွႆႇပၼ်တူဝ်ၼၢင်းမူဝ်ႁွမ်ဝႆးဝႆးသေၵမ်း ” ဝႃႈၼႆ။

ၼႂ်းဝၼ်းတီႈ 27/08/2018 ၼႆႉၵေႃႈ ယူႇတီႈပႃႇတီႇ SNDP သေ တႅမ်ႈလိၵ်ႈထိုင်ၸွမ်ၸိုင်ႈဢူးဝိၼ်းမိၼ်ႉလႄႈ တေႃႇဢွင်ႇသၢၼ်းၸုၵျီႇ ႁႂ်ႈၸွႆႈၵႄႈလိတ်ႈပၼ်ပၼ်ႁႃလွင်ႈၼႆႉ ၼႆယဝ်ႉ။

ၼၢင်းမူဝ်ႁွမ်ၼႆႉ ၺႃးၸုမ်းသိုၵ်း TNLA တီႉၺွပ်းၵႂႃႇမိူဝ်ႈဝၼ်းတီႈ 17/08/2018 ၾၢႆႇ TNLA မၢပ်ႇၼႄးဝႃႈ မၼ်း ၼၢင်းၽိတ်းပၵ်းပိူင် TNLA သေတီႉၺွပ်း၊ ၵူၺ်းၵႃႈၽိတ်းပၵ်းပိူင်ဢၼ်လႂ် ၶေႃႈလႂ်တႄႉဢမ်ႇပိုၼ်ၽၢဝ်ႇတႅၵ်ႇလႅင်း ယူႇတီႈၸုမ်းၵပ်းသၢၼ်ၵူၼ်းၼုမ်ႇၼမ်ႉၶမ်း၊ တပ်ႉသိုၵ်း ၸိုင်ႈတႆး SSPP ၊ ပႃႇတီႇၵၢၼ်မိူင်းၸိူဝ်းၼႆႉႁူမ်ႈ ၵၼ်သေ တႅမ်ႈလိၵ်ႈ တုၵ်းယွၼ်း ႁႂ်ႈပွႆႇပၼ်တူဝ်မၼ်းၼၢင်း။