ၼၢင်းမူဝ်ႁွမ် ၵူၼ်းမိူင်းၼမ်ႉၶမ်း ဢၼ်ၺႃးသိုၵ်းတဢၢင်း တီႉၺွပ်းၵႂႃႇႁိုင် ၶၢဝ်းတၢင်း 10 ဝၼ်း ယဝ်ႉပႆႇ လွတ်ႈမႃး ၶိုၼ်း။ လၢႆလၢႆၸုမ်းတုၵ်းယွၼ်းႁႂ်ႈပွႆႇတူဝ်ပၼ်ၶိုၼ်းလီလီ။
မိူဝ်ႈဝၼ်းတီႈ 24/08/2018 တူဝ်တႅၼ်းတပ်ႉသိုၵ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA တင်း တူဝ်တႅၼ်းတပ်ႉသိုၵ်းတဢၢင်း TNLA ႁူပ်ႉဢုပ်ႇၵၼ် တီႈလႅၼ်လိၼ်တႆး – ၶႄႇ တီႈၼိုင်ႈ ဢုပ်ႇဢူဝ်းၵၼ် ၵဵဝ်ႇလူၺ်ႈ လွင်ႈၵၢၼ်တီႉၺွပ်းၵူၼ်း ၼၢင်းမူဝ်ႁွမ် မိူင်းၼမ်ႉၶမ်းၼၼ်ႉ SSPP တုၵ်းယွၼ်းႁႂ်ႈပွႆႇပၼ်ၶိုၼ်း ။ တၢင်းၾၢႆႇ SSPP/ SSA မီး ၸဝ်ႈၼေႃႇလဵၵ်း ဢွၼ်ႁူဝ်။ တၢင်းၾၢႆႇ TNLA သမ်ႉ တႃႉဢၢႆႈမွင်း လႄႈ တႃႉပၢၼ်းလႃႉ ဢွၼ်ႁူဝ် ဢုပ်ႇၵုမ်ၵၼ်။
ၸဝ်ႈႁၢၼ် ၸၢႆးၸၢႆး လၢတ်ႈတီႈၽူႈတွႆႇႁွၵ်ႈဝႃႈ “ ႁဝ်းၶႃႈၶဝ် ဢွၼ်ၵၼ်ၵႂႃႇ ဢုပ်ႇဢူဝ်းတႃႇတေပွႆႇတူဝ်ၼၢင်းမူဝ်ႁွမ် ဢၼ်ၶဝ်တီႉၺွပ်းၵႂႃႇၼၼ်ႉ။ ဢၼ်ႁဝ်းဢုပ်ႇၵၼ်ၼၼ်ႉ ၶေႃႈထီႉ 1 ဢၼ်သိုၵ်းတဢၢင်း TNLA တီႉၺွပ်းၼၼ်ႉ ပဵၼ်ၼၢင်းယိင်း။ ၶေႃႈထီႉ 2 သမ်ႉ လွင်ႈဢၼ်ၶဝ်ႁဵတ်းသၢင်ႈၵႂႃႇၸိူင်ႉၼႆၼႆႉ မိူၼ်တင်း သိၵ်ႇယႃႉၼႃႈတႃ တပ်ႉသိုၵ်း တႆး တင်းသွင်ၾၢႆႇသေ ယွၼ်ႉၼၼ် ႁႂ်ႈပွႆႇပၼ်ၶိုၼ်းၽႂ်းၽႂ်း။ ယဝ်ႉၵေႃႈ ဝၢႆးလင်မႃး ယႃႇႁႂ်ႈလႆႈမီးထႅင်ႈ ပိူင်ပဵၼ်ၸိူင်ႉ ၼႆ” ဝႃႈၼႆ။
ၽူႈၵွၼ်းတပ်ႉ TNLA တႃႉဢၢႆႈမွင်း လၢတ်ႈဝႃႈ “ ဢၼ်ႁဝ်းၶႃႈတီႉၺွပ်းၼၢင်းမူဝ်ႁွမ် ၼမ်ႉၶမ်းၼၼ်ႉ ၸႂ်ႈၶႃႈဢေႃႈ။ ႁဝ်းယွမ်းႁပ်ႉယူႇၶႃႈ လွင်ႈဝႃႈႁဝ်းတီႉဝႆႉ။ ယွၼ်ႉသင်လႄႈၼႆ မိူဝ်ႈပီၵၢႆ ဢၼ်ၵူၼ်း သိုၵ်းႁဝ်းၶႃႈ 2 ၵေႃႉ ၺႃးယိုဝ်း တၢႆၼၼ်ႉပဵၼ်ယွၼ်ႉ မၼ်းၼၢင်းပွင်ႇၶၢဝ်ႇၸူးသိုၵ်းမၢၼ်ႈ။ ဢၼ်ၼႆႉမၼ်းၼၢင်း တေလႆႈဢဝ်ပုၼ်ႈ ၽွၼ်းမူတ်း မူတ်း။ ယွၼ်ႉၼၼ်လႄႈ ၸင်ႇ လႆႈၵုမ်းၶင်တူဝ်မၼ်းဝႆႉ။ ထႅင်ႈၾၢႆႇၼိုင်ႈၵေႃႈ ႁဝ်းၶႃႈ ဢမ်ႇမီးၸႂ်ပႅင်းၸင်း ၵူၼ်း ၸၢဝ်းတႆးသင်” ဝႃႈၼႆ။
မိူဝ်ႈဝၼ်းတီႈ 17/08/2018 ယၢမ်းၵၢင်ၼႂ် တပ်ႉသိုၵ်းတဢၢင်း TNLA ၶဝ်ႈတီႉၺွပ်းတူဝ် ၼၢင်းမူဝ်ႁွမ် တီႈပွၵ်ႉႁူဝ် ၼွင် ၸႄႈဝဵင်းၼမ်ႉၶမ်းၵႂႃႇ တေႃႇထိုင်ယၢမ်းလဵဝ် ပႆႇပွႆႇတူဝ်ၶိုၼ်း မီး 10 ဝၼ်းယဝ်ႉ။ ၼၢင်းမူဝ်ႁွမ်ၼႆႉ မီးလုၵ်ႈဝႆႉ 3 ၵေႃႉ ဝႃႈၼႆ။
မိူဝ်ႈၵၢင်ပီ 2017 ၼၼ်ႉ သိုၵ်း TNLA 2 ၵေႃႉ ၵဵပ်းၶွၼ်ႇ တီႈႁၢၼ်ႉၶၢႆၶိူင်ႈၶူဝ်းႁိူၼ်း ၼွင်မၢဝ်း (လၢၼ်ႉမႄႈၸဝ်ႈ ၼၢင်းမူဝ်ႁွမ်) 11 သႅၼ် ပျႃး။ မိူဝ်ႈၵူၼ်းသိုၵ်း TNLA 2 ၵေႃႉ ဢဝ်ငိုၼ်းသေ ဢွၵ်ႇႁိူၼ်းၵႂႃႇၼၼ်ႉ ၺႃးသိုၵ်းမၢၼ်ႈ ပဵၼ်တပ်ႉမ 88 ပႂ်ႉငွႆးယိုဝ်း ၵၢင်တၢင်းသေ တၢႆၵေႃႉၼိုင်ႈ၊ ၺႃးတီႉၺွပ်းၵႂႃႇၵေႃႉၼိုင်ႈ။ ၵဵဝ်ႇလူၺ်ႈလွင်ႈၼႆႉသေ သိုၵ်းတဢၢင်း TNLA ၵပ်းသိုပ်ႇၾူၼ်းၸူးမၼ်းၼၢင်း မၢပ်ႇၼႄးဝႃႈ မၼ်းၼၢင်းပဵၼ်ၵူၼ်းသူင်ႇ ၶၢဝ်ႇပၼ်သိုၵ်း လူင်ပွင်ၸိုင်ႈမၢၼ်ႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ