ၶွမ်ႊမသျိၼ်ႊ ပၢင်လိူၵ်ႈတင်ႈမိူင်းႁူမ်ႈတုမ် ပိုၼ်ၽၢဝ်ႇဝႃႈ ၼေႃႇၽူႈတႅၼ်းဢၼ်တေၶဝ်ႈၶႅင်ႇပၢင်လိူၵ်ႈတင်ႈ သွမ်ႈ ဢၼ်တေၸတ်းႁဵတ်း ၼႂ်းဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊ 2018 ၼၼ်ႉ ပေႃးႁူဝ်လိူၼ်ၼႃႈ ဝၼ်းတီႈ 3 လိူၼ် သႅပ်ႊထႅမ်ႊၿိူဝ်ႊမႃး တႄႇလူင်းသူၼ်းတုမ်လႆႈယဝ်ႉ ဝႃႈၼႆ။
ဝၼ်းတီႈ 24/08/2018 ၶွမ်ႊမသျိၼ်ႊ ပၢင်လိူၵ်ႈတင်ႈသွမ်ႈမိူင်းႁူမ်ႈတုမ် ပိုၼ်ၽၢဝ်ႇပဵၼ်တၢင်းၵၢၼ်ဝႃႈ ၼေႃႇၽူႈ တႅၼ်းသၽႃးလႄႈ ပႃႇတီႇ ၸိူဝ်းဢၼ်တေၶဝ်ႈၶႅင်ႇပၢင်လိူၵ်ႈတင်ႈသွမ်ႈၼၼ်ႉ ၵူႈပႃႇတီႇ၊ ၵူႈၵေႃႉ ႁႂ်ႈပေႃးမီး လွင်ႈ ထၢင်ႇႁၢင်ႈလႄႈ ၽဵင်ႇပဵင်းၼႂ်းၵၢၼ်သူၼ်းတုမ်ၵူၼ်းမိူင်းၼၼ်ႉ တေလႆႈတိုဝ်းၵမ်ၸွမ်းပၵ်းပိူင်မၢႆမီႈၵႂႃႇ ဝႃႈၼႆ။
ဢူးမိၼ်ႉၼၢႆႇ ၽူႈၶၢၼ်ပၢၵ်ႇ ၶွမ်ႊမသျိၼ်ႊပၢင်လိူၵ်ႈတင်ႈသွမ်ႈ မိူင်းႁူမ်ႈတုမ် လၢတ်ႈဝႃႈ “ ပႃႇတီႇလႄႈ ၼေႃႇၽူႈ တႅၼ်းသၽႃး ဢၼ်တေၶဝ်ႈလိူၵ်ႈတင်ႈၼၼ်ႉ ႁႂ်ႈတိုဝ်းၵမ်ၸွမ်းပၵ်းပိူင်မၢႆမီႈသေ ဢွၼ်ၵၼ်လူင်းလၢႆးမိုဝ်း ယဝ်ႉၵေႃႈ ၸင်ႇပိုၼ်ၽၢဝ်ႇဢွၵ်ႇ” ဝႃႈၼႆ။
ပၢင်သူၼ်းတုမ် တႃႇပၢင်လိူၵ်ႈတင်ႈသွမ်ႈၼႆႉ တႄႇၸတ်းႁဵတ်း ဝၼ်းတီႈ 3 လိူၼ်သႅပ်ႊထႅမ်ႊၿိူဝ်ႊ တေႃႇထိုင် ဝၼ်း တီႈ 1 လိူၼ်ၼူဝ်ႊဝႅမ်ႊၿိူဝ်ႊ 2018 တႃႇၶၢဝ်းတၢင်း 60 ဝၼ်း။
ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်းဝၼ်းတီႈ 3 လိူၼ်ၼူဝ်ႊဝႅမ်ႊၿိူဝ်ႊ 2018 ဢၼ်တေထိုင်မႃးၼႆႉ တင်း မူတ်း ပႃႇတီႇ ဢၼ်တေၶဝ်ႈၶႅင်ႇၵၼ် မီး 24 ပႃႇတီႇ၊ ၼေႃႇၽူႈတႅၼ်းသၽႃး ဢၼ်ယူႇၼႂ်းပႃႇတီႇသေ ၶဝ်ႈၶႅင်ႇ 62 ၵေႃႉ။ သုၼ်ႇလဵဝ်(သုၼ်ႇတူဝ်) သမ်ႉ 7 ၵေႃႉ ႁူမ်ႈၵၼ် တင်းမူတ်း 69 ၵေႃႉ ဝႃႈၼႆ။
တီႈၼင်ႈသၽႃးဢၼ်လုတ်ႈႁၢမ်းပဝ်ႇဝႆႉ တင်းမူတ်း မီး 13 တီႈၼင်ႈ။ ၼႂ်း 13 တီႈၼင်ႈၼၼ်ႉ ပႃးၼႂ်းမိူင်းတႆး ၼိုင်ႈတီႈၼင်ႈ ပဵၼ်တီႈၼင်ႈၽူႈတႅၼ်းသၽႃးၵူၼ်းမိူင်း ၸႄႈဝဵင်းလၢႆးၶႃႈ။ ၼႂ်းၸႄႈဝဵင်းလၢႆးၶႃႈ ဢၼ်တေၶဝ်ႈ ၶႅင်ႇၵၼ်သမ်ႉ ပဵၼ်ၸၢဝ်းတႆး 3 ၵေႃႉ မိူၼ် ပႃႇတီႇႁူဝ်သိူဝ် SNLD ၸၢႆးဢူၵ်ႉၵႃႇ(ႁွင်ႉ) ၸၢႆးၵွင်ၶမ်း၊ ပႃႇတီႇသိူဝ် ၽိူၵ်ႇ SNDP ၸၢႆးသူၺ်ႇသႅင်းလႄႈ ပႃႇတီႇၼူၵ်ႉယုင်း NLD သမ်ႉ ၸၢႆးဢွင်ႇထုၼ်းလေး ၸိူဝ်းၼႆႉ။
လိူဝ်ၼၼ်ႉ တီႈယူႇၽွင်းလူင်ၾၢႆႇၸၢဝ်းၶိူဝ်းတႆး တီႈဝဵင်းလိူဝ်ႇၼၼ်ႉၵေႃႈ ပဝ်ႇဝႆႉ ၼိုင်ႈတီႈၼင်ႈ။ ၼေႃႇၽူႈတႅၼ်း ၸၢဝ်းတႆး ၸိူဝ်းတေၶဝ်ႈၶႅင်ႇၵၼ် တေမီး ၼၢင်းထူၺ်းမုင်ႇ ပႃႇတီႇႁူဝ်သိူဝ်၊ ၻွၵ်ႊတိူဝ်ႊ ၸၢႆးၵျေႃႇဢုင်း ပႃႇတီႇ သိူဝ်ၽိူၵ်ႇ၊ ၸၢႆးပၢၼ်းသႅင် (ႁွင်ႉ) ၸၢႆးထုၼ်းၸိင်ႇ (ဢမ်ႇၼၼ်) ၸၢႆးၵျေႃႇၸိင်ႇ ပႃႇတီႇၼူၵ်ႉယုင်း၊ ၸၢႆးဢွင်ႇၵျီႇ ပႃႇတီႇသၢင်ႇသီႈလႄႈ သုၼ်ႇတူဝ် ဢူးဢွင်ႇထေး ၸဵမ်ၸိူဝ်းၼႆႉ ဝႃႈၼႆ။
