သိုၵ်းလူင်ပွင်ၸိုင်ႈမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ၼႂ်းဢိူင်ႇမိူင်းယေႃ ၸႄႈဝဵင်းလႃႈသဵဝ်ႈ ၵူၼ်း မိူင်း မွၵ်ႈ 100 ဢွၼ်ၵၼ်မႆႈၸႂ်သေ ပၢႆႈႁွတ်ႈၽႅဝ်ဝဵင်းလႃႈသဵဝ်ႈ ဝႃႈၼႆ။

မိူဝ်ႈဝၼ်းတီႈ 21/08/2018 ၼၼ်ႉ သိုၵ်းလူင်ပွင်ၸိုင်ႈမၢၼ်ႈ ပႃႈတႂ်ႈတပ်ႉမ 99 တင်း သိုၵ်းတဢၢင်း TNLA ပဵၼ် ပၢင်တိုၵ်းၵၼ် ၼႂ်းၵႄႈဝၢၼ်ႈပၢင်ထီး တင်း ဝၢၼ်ႈပၢင်ၶူၵ်ႉ ဢိူင်ႇမိူင်းယေႃ ၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။ ထိုင်မႃး ဝၼ်းတီႈ 22 ယၢမ်းၵၢင်ၼႂ် ၵူၼ်းမိူင်း ၸၢဝ်းတဢၢင်း မွၵ်ႈ 100 ၶီႈၵႃးလူင် 2 လမ်းသေ လူင်း မႃးထိုင် မိူင်းယေႃ သိုပ်ႇဢွၼ်ၵၼ်ပၢႆႈၵႂႃႇတၢင်းလႃႈသဵဝ်ႈ ဝႃႈၼႆ။

ၵူၼ်းလူင် ၼႂ်းဢိူင်ႇမိူင်းယေႃ ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်းတႄႉ ယဵၼ်ၵႂႃႇယဝ်ႉ။ မိူဝ်ႈၼႆႉ ယၢမ်း ၵၢင်ၼႂ် ၵူၼ်းဝၢၼ်ႈမွၵ်ႈ 100 ၶီႇရူတ်ႉၵႃး 2 လမ်း လူင်းမႃးတင်းမိူင်းယေႃသေ သိုပ်ႇၵႂႃႇတၢင်းလႃႈသဵဝ်ႈ။ ၼႂ်းဝၼ်း လဵဝ်ၼၼ်ႉၵူၺ်း ၵူၼ်းၸၢဝ်းၶႄႇၵေႃႈ ဢွၼ်ၵၼ်ပၢႆႈၽေးမႃးသွၼ်ႈဝႆႉၸွမ်းႁိူၼ်းပီႈၼွင်ႉၽႂ်မၼ်း ၼႂ်းဢိူင်ႇ မိူင်းယေႃ။ တၢင်းပွတ်းဝၢၼ်ႈၼၼ်ႉ တင်းသွင်ၾၢႆႇတိုၵ်ႉၶဵင်ႈၶႅင်ၵၢၼ်သိုၵ်းၵၼ်ဝႆႉယူႇ ယွၼ်ႉၼၼ် ၵူၼ်းမိူင်းဢွၼ် ၵၼ်မႆႈၸႂ် ၵူဝ်ပဵၼ်ပၢင်တိုၵ်းထႅင်ႈ” ဝႃႈၼႆ။

ၸၢႆးလူႇ ၵူၼ်းမိူင်းယေႃ လၢတ်ႈတီႈၽူႈတွႆႇႁွၵ်ႈဝႃႈ “ ပၢင်တိုၵ်းဢၼ်ပဵၼ်မိူဝ်ႈဝၼ်းတီႈ 21 ၼၼ်ႉ တၢင်းၾၢႆႇတပ်ႉ သိုၵ်းမၢၼ်ႈ လႆႈတိူဝ်ႉမၢတ်ႇၸဵပ်း ၽူႈမီးၸၼ်ႉၵေႃႉၼိုင်ႈလႄႈ သိုၵ်းႁၢၼ်ၵေႃႉၼိုင်ႈ လႆႈႁၼ်ၶဝ်ဢဝ် တူဝ်ၵူၼ်းၶဝ် သူင်ႇမႃးႁူင်းယႃမိူင်းယေႃယဝ်ႉ သိုပ်ႇသူင်ႇႁူင်းယႃ လႃႈသဵဝ်ႈ” ဝႃႈၼႆ။

ပၢင်တိုၵ်းၼႆႉ ပဵၼ်ၼႂ်းၵႄႈဝၢၼ်ႈပၢင်ထီး တင်း ဝၢၼ်ႈပၢင်ၶူၵ်ႉ ယၢၼ်ၵႆဢိူင်ႇမိူင်းယေႃ မွၵ်ႈ 8 လၵ်းလႄႈ မီးၾၢႆႇ ဢွၵ်ႇဝဵင်းလႃႈသဵဝ်ႈ ယၢၼ်ၵႆဝဵင်းလႃႈသဵဝ်ႈ 30 လၵ်းပၢႆ ဝႃႈၼႆ။

မိူဝ်ႈပူၼ်ႉမႃးဝူင်ႈၼိုင်ႈၼၼ်ႉ သိုၵ်းလူင်ပွင်ၸိုင်ႈတင်း သိုၵ်းတဢၢင်း ပဵၼ်ပၢင်တိုၵ်းၵၼ် ႁိမ်းဝၢၼ်ႈပၢင်ၶႃး ၾၢႆႇဢွၵ်ႇ ဢိူင်ႇမိူင်းယေႃ မွၵ်ႈ 2 -3 လၵ်းၼၼ်ႉ သိုၵ်းမၢၼ်ႈတိူဝ်ႉမၢတ်ႇ 8 ၵေႃႉ ဝႃႈၼႆ။